قازاقستاننان مەتال قالدىقتارىن شىعارۋعا ۋاقىتشا تىيىم سالىندى

نۇر-سۇلتان. قازاقپارات - ەل اۋماعىنان قارا جانە ءتۇستى مەتالداردىڭ سىنىقتارى مەن قالدىقتارىن شىعارۋعا ۋاقىتشا تىيىم سالىندى.

شەكتەۋدى ەنگىزۋگە ەلىمىزدىڭ قايتا وڭدەۋشىلەرى ءۇشىن شيكىزاتتىڭ تاپشىلىعى مەن ءوندىرىستىڭ ءتيىستى دەڭگەيدە جۇكتەلمەۋى اسەر ەتتى، دەپ حابارلايدى قازاقپارات ءتىلشىسى.

بۇل تۋرالى ق ر ي ي د م يندۋستريالىق دامۋ كوميتەتى ءتوراعاسىنىڭ ورىنباسارى تۇرار جولماعامبەتوۆ ايتتى.

«قازىرگى ۋاقىتشا شەكتەۋ - بۇل تاكتيكالىق قادام. ونىڭ جالپى ستراتەگياسى ءبىرازدان بەرى كەلە جاتقان يندۋستريالاندىرۋ ساياساتىنا بايلانىستى. اتاپ ايتقاندا، مەملەكەت باسشىسى يندۋستريالاندىرۋ ساياساتى اياسىندا بارىنشا دايىن ءونىم شىعارۋعا ەرەكشە ءمان بەرىپ وتىر»، - دەدى ت. جولماعامبەتوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، مەتال سىنىقتارىن شەكارادان تەمىرجول كولىگىمەن تاسىمالداۋعا بولادى. ال ءتۇرلى ءتۇستى مەتال سىنىقتارى مەن قالدىقتار ءۇشىن تولىق شەكتەۋ ەنگىزىلگەن. قازىرگى كەزدە قازاقستاندىق قايتا وڭدەۋشىلەرگە ءتىپتى ىشكى مەتال اينالىمى جەتىسپەيدى جانە ولار كورشى مەملەكەتتەردەن يمپورتتاۋعا ءماجبۇر.

«نەگىزگى سەبەپ وتاندىق كاسىپورىنداردىڭ ءتيىستى دەڭگەيدە قامتاماسىز ەتىلمەۋىنە بايلانىستى. وسى ورايدا قارا مەتال سىنىقتارىن پايدالاناتىن مەتاللۋرگيا سەكتورى ماسەلەسىن اتاپ وتۋگە بولادى. ولاردىڭ جۇكتەمەسى تەك ۇشتەن ءبىر دەڭگەيدە عانا. ءبىزدىڭ ماقسات - ولاردى ءتيىستى دەڭگەيدە قامتاماسىز ەتۋ، ياعني كەم دەگەندە ءوندىرىستى 70-80 پايىزعا كولەمىندە جۇكتەۋ»، - دەدى ۆەدومستۆو وكىلى.

تۇرار جولماعامبەتوۆتىڭ سوزىنە قاراعاندا، قازاقستاندا مەتال سىنىقتارى مەن قالدىقتارىن نەگىزگى شيكىزات رەتىندە پايدالاناتىن 20 دان استام كاسىپورىن جۇمىس ىستەيدى. بۇل كومپانيالار ءوندىرىسىنىڭ جيىنتىق كولەمى 2 تريلليون تەڭگەدەن، ال ەكسپورت 2,5 ميلليارد ا ق ش دوللارىنان اسادى.

اتالعان كاسىپورىنداردا 37 مىڭنان استام ادام ەڭبەك ەتەدى جانە جىلىنا 119 ميلليارد تەڭگەدەن استام سالىق تولەيدى.

بۇدان بۇرىن حابارلانعانداي، قارا جانە ءتۇستى مەتال سىنىقتارى مەن قالدىقتارى تۇرىندەگى شيكىزاتتى سىرتقا شىعارۋعا ۋاقىتشا تىيىم ەنگىزىلدى.