ۋكرايناداعى اسكەري قاقتىعىس جاقىن ۋاقىتتا توقتامايدى – ب ۇ ۇ

نۇر- سۇلتان. قازاقپارات – ب ۇ ۇ باس حاتشىسى انتونيۋ گۋتەرريش ۋكرايناداعى اسكەري ارەكەتتەردى تەز ارادا توقتاتۋعا جانە جاقىن بولاشاقتا بەيبىت كەلىسسوزدەر جۇرگىزۋگە مۇمكىندىك جوق دەپ سانايدى.

ول بۇل مالىمدەمەنى سارسەنبىدە ۆەنادا ب ۇ ۇ ىشكى كونفەرەنتسياسىنىڭ اشىلۋى الدىندا جاسادى، دەپ حابارلايدى قازاقپارات Euronews-كە سىلتەمە جاساپ.

وتىرىستا گۋتەرريش تاعى دا رەسەي مەن ۋكراينا اراسىنداعى ديالوگقا ىقپال ەتۋگە تىرىسىپ جاتقانىن اتاپ ءوتتى.

ونىڭ ايتۋىنشا، ب ۇ ۇ گۋمانيتارلىق ماسەلەلەرگە، ونىڭ ىشىندە ماريۋپولدان ەۆاكۋاتسياعا ەرەكشە نازار اۋدارىپ جاتىر.

وندا قىزىل كرەستىڭ كومەگىمەن جۇزدەگەن ادام ەۆاكۋاتسيالاندى.

«بۇل سوعىس ماڭگىلىك بولمايدى. بەيبىت كەلىسسوزدەر جاسايتىن كۇن تۋادى»، - دەدى گۋتەرريش اۋستريا پرەزيدەنتى الەكساندر ۆان دەر بەللەنمەن بىرلەسكەن باسپا ءسوز ءماسليحاتىندا.

«مەن ونى تاياۋ ۋاقىتتا بولادى دەپ ويلامايمىن. ءبىراق، ءبىر نارسە ايتايىن. ءبىز ەشقاشان بەرىلمەيمىز»، - دەدى ب ۇ ۇ باس حاتشىسى.

ول سونداي-اق اشارشىلىقتىڭ تارالۋىنا قاتتى الاڭدايتىنىن ايتتى، ويتكەنى ۋكرايناداعى سوعىس الەمنىڭ ءارتۇرلى بولىكتەرىندەگى ازىق-تۇلىك قاۋىپسىزدىگىنە قاۋىپ ءتوندىرىپ جاتىر، دەپ جازدى Reuters.