USD 416.91 EUR 446.47
RUB 7.34 CNY 62.53
جاڭالىقتار

ەرلىك جاساۋعا ەشكىم دايىندالمايدى - ءبۇلدىرشىندى قۇتقارعان ءسابيت شونتاقبايەۆتىڭ ايەلى

12 مامىر 14:37
:ءبولىسۋ
ەرلىك جاساۋعا ەشكىم دايىندالمايدى - ءبۇلدىرشىندى قۇتقارعان ءسابيت شونتاقبايەۆتىڭ ايەلى

قىزىلوردا. قازاقپارات - نۇر-سۇلتان قالاسىندا كوپقاباتتى ءۇيدىڭ بالكونىنان ءۇش جاستاعى قىزدى قۇتقارىپ العان ءسابيت شونتاقبايەۆتىڭ ايەلى ايگەرىم جولداسى جايىندا قازاقپارات تىلشىسىنە ايتىپ بەردى.

- الدىمەن ءسابيتتىڭ وسكەن ورتاسى، وتباسى، مىنەزى جايىندا ايتىپ بەرسەڭىز؟

- ءسابيت قىزىلوردا وبلىسى جالاعاش اۋدانىنا قاراستى اققۇم اۋىلىندا دۇنيەگە كەلگەن. اكەسى - سەرىك، اناسى - گۇلبارشىن. بۇل وتباسىندا 4 ۇل، 1 قىز بار. ءسابيت وتباسىنىڭ ءۇشىنشى پەرزەنتى. قازىر اتا- اناسىنىڭ جاسى 70-كە كەلىپ قالدى. وتباسى - قاراپايىم. ونىڭ اتا- اناسى بالالارىنا ءاردايىم جاقسى ونەگە بەرىپ كەلەدى. ءسابيت ەكەۋمىز 3 ۇل، 1 قىز تاربيەلەپ وتىرمىز. ۇلدارىمىز ءمادي – 13، ساعي -12، نۇر- داۋلەت - 2,5 جاسقا كەلسە، قىزىمىز ساعىنىش 9 جاستا. ءسابيت جۇمىس جاساۋعا ەلورداعا كەلىپ، قۇرىلىس سالاسىندا ەڭبەك ەتىپ ءجۇر. وقيعا بولاتىن كۇنى جۇمىسقا بارا جاتقان ەكەن. وزدەرى سول ماڭدا پاتەر جالداپ تۇرعان. تاڭەرتەڭگى ۋاقىتتا سەگىزىنشى قاباتتان كىشكەنتاي ءبۇلدىرشىننىڭ بالكوننان سالبىراپ ءىلىنىپ تۇرعانىن بايقايدى. ەشبىر ويلانباستان ونى قۇتقارۋعا كىرىسەدى. دوسى ساعي ەكەۋى وسىلايشا ءبىر پەرىشتەنىڭ ءومىرىن ساقتاپ قالدى. شىنىن ايتقاندا، بۇل وقيعانى ەستىگەندە ءبىز دە تاڭعالدىق. ارينە، ەرلىك جاساۋعا ەشكىم دايىندالمايدى عوي. ءوزىنىڭ ومىرىنە قاتەر ءتوندى. سوعان قاراماستان سىن ساتتە سىر بەرگەن جوق. ونىڭ مۇنداي ەرلىگىنە ەلدىڭ العىسىن ەستىگەندە مەرەيىمىز ءوستى. بۇرىن مۇنداي قاسيەتتەردى بايقاعان جوقپىن.


- ەلوردادا بەلگىلى قۇرىلىس كومپانياسى سابيتكە ءۇش بولمەلى پاتەردىڭ كىلتىن تابىس ەتتى. وتباسىسىن استاناعا كوشىرۋ ويىندا بار ما؟

- قازىر ءسابيت سول پاتەردىڭ قۇجاتتارىن دايىنداۋ قامىمەن ءجۇر. تاعى ءبىر قۋانىشتىسى، سىن ساتتە قاسىندا بولعان دوسى ساعي دا پاتەرلى بولىپ جاتىر. ارينە، ولار سول ۋاقىتتا حالىق تاراپىنان مۇنداي قۇرمەتكە يە بولامىز دەپ ويلاعان جوق شىعار. باستى ماقساتتارى - ءبۇلدىرشىندى قۇتقارۋ ەكەنى بەلگىلى. ۋاقىتى كەلگەندە ەلورداعا بارامىز. ءسابيتتى ارنايى قابىلداعان نۇر-سۇلتان قالاسىنىڭ اكىمى التاي كولگىنوۆ جۇزدەسۋدە وعان جۇمىسقا ورنالاستىرۋعا كومەكتەسەتىنىن ايتتى. ال مەنىڭ ماماندىعىم - بانك قىزمەتكەرى. الايدا وتباسىلى بولعاننان كەيىن قىزمەت اتقارعان ەمەسپىن. نۇر-سۇلتانعا بارعاننان كەيىن كورە جاتارمىز. ال بالالاردى مەكتەپكە ورنلاستىرۋعا قالا اكىمى ۋادە بەرىپتى.


- سابيتپەن بىرگە ءبۇلدىرشىندى قۇتقارعان ساعيمەن تۋىسقاندىق بايلانىس بار ما؟

- ول جايىندا ءسابيت تەلەارناعا بەرگەن سۇحباتىندا ايتىپ بەردى. تۋىسقاندىق بايلانىسىمىز بار. ول دا جالاعاش اۋدانىنىڭ اقارىق اۋىلىندا تۋعان، وتباسىلى.


ەسكە سالساق، كەشە تاڭەرتەڭ ەلوردادا ۋاقىتشا تۇرىپ جاتقان قىزىلوردا تۇرعىنى 8-قاباتتا تەرەزەدەن سالبىراپ تۇرعان ءبۇلدىرشىندى قۇتقارىپ قالدى. بۇل وقيعانىڭ ۆيدەوسى جەلىدە كەڭ تارالىپ، ءسابيت شونتاقبايەۆتىڭ باتىل ارەكەتىنە كوپشىلىك ءتانتى بولدى. ق ر توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمبايەۆ ازاماتتى «توتەنشە جاعدايداعى ەرلىگى ءۇشىن» توسبەلگىسىمەن ماراپاتتاسا، نۇر-سۇلتان اكىمى التاي كولگىنوۆ جەكە قابىلداپ، ونىڭ لوكوموتيۆ زاۋىتىنا جۇمىسقا ورنالاستىرىلاتىنىن ايتتى. ال «G- پارك» قۇرىلىس كومپانياسى وعان ءۇش بولمەلى پاتەر سىيعا تارتتى. كەيىننەن سابيتكە كىشكەنتاي قىزدى قۇتقارۋعا ساعي ەسىمدى جىگىتتىڭ كومەك كورسەتكەنى بەلگىلى بولىپ، الەۋمەتتىك جەلى قولدانۋشىلارى وعان دا پاتەر بەرۋ كەرەكتىگىن جازعان ەدى. كوپتىڭ قالاۋى ورىندالىپ، ەندى بۇگىن ساعي دا باسپانا كىلتىن الدى.

اۆتور: ءادىلجان ۇمبەت


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات