اتاقتى قاسىم حان تۋرالى تاريحي فيلم پروكاتقا شىقتى
تاريحي كينوتۋىندى قازاق حاندىعىندا جانىبەك حاننىڭ ۇلى - قاسىم حان بيلىك ەتكەن كەزدەرى تۋرالى باياندايدى. ءدال وسى جىلدارى قازاق حاندىعى وركەندەپ قانا قويماي، شىعىس دەشتى- قىپشاقتىڭ كەڭ اۋماعىنا باقىلاۋ ورناتىلىپ، قازاقتار دەربەس ەتنيكالىق قاۋىمداستىق رەتىندە ءبىزدىڭ اۋماقتان تىس جەرلەرگە دە بەلگىلى بولدى. قاسىم حان ادەت- عۇرىپتىق زاڭدارعا ارقا سۇيەپ، تاريحقا «قاسىم حاننىڭ قاسقا جولى» دەگەن اتپەن ەنگەن ءوزى دايىنداعان كونستيتۋتسيالىق قۇجاتتىڭ كومەگىمەن ەل باسقاردى.
تاريحي كينوتۋىندىنىڭ سەناريىن بەلگىلى كينودراماتۋرگ بەكبولات شەكەروۆ، نازيرا باقايەۆا جانە اقان ساتايەۆ جازدى. قاسىم حاننىڭ جاس كەزىن دانيار ورازايەۆ وينايدى، ەرەسەك قاسىم حان - بەرىك ايتجانوۆ، جاس بۇرىندىق حان - ايدوس ابدىقادىروۆ، ەرەسەك بۇرىندىق حان - ەرىك جولجاقسىنوۆ. مۇحاممەد شايباني - نۇرلان ءالىمجانوۆ. جاھان بەگىمنىڭ جاس كەزىن التىناي نوگەربەك، ەگدە جاھان بەگىمدى شامشاگۇل مەندياروۆا وينايدى. ءالي ءراشيدتىڭ جاس كەزىن - قۋانىش قۇدايبەرگەن، ەرەسەك ءالي ءراشيدتى - تۇڭعىشباي جامانقۇلوۆ سومدايدى.
«تاريحي فيلمدى تۇسىرۋگە 2500 ادام تارتىلدى. ولاردىڭ ءارقايسىسى ءوز جۇمىسىنا ۇلكەن جاۋاپكەرشىلىكپەن قارادى. ءبىزدىڭ كەڭەسشى- تاريحشىلارىمىزدىڭ ايتۋىنشا، بۇل عىلىمي جۇمىسقا ۇقساس بولعان. بارلىق تاريحي مالىمەتتەر، فاكتىلەر ەكراندا كورسەتىلەدى. 14-عاسىر ءبىزدىڭ حالقىمىزدىڭ ىرگەلى كەزەڭى ەكەنى بەلگىلى»، - دەدى اقان ساتايەۆ.
فيلمنىڭ ءتۇسىرۋ جۇمىستارى 2021 -جىلى اقپان ايىنىڭ سوڭىندا الماتى وبلىسى پانفيلوۆ اۋدانىندا باستالعان بولاتىن. ناۋرىزدىڭ ورتاسىندا تۇسىرىلىمدەر «قازاق فيلم» كينوستۋدياسىنىڭ پاۆيلوندارىندا تۇرعىزىلعان «سىعاناق قالاسى»، «بۇرىندىق حاننىڭ تاق زالى» جانە «سامارقاند - شايباننىڭ اۋلاسى» دەكوراتسيالارىندا جۇرگىزىلدى. جاز ايلارىندا قاپشاعاي قالاسىنىڭ ماڭىندا كۇردەلى ساحنالاردىڭ ءبىرى - ۇلىتاۋداعى شايقاس ءتۇسىرىلدى. بۇل ساحناعا Nomad Stunts كاسكادەرلەر توبى ارنايى تارتىلدى. فيلمنىڭ تريۋكتەرىن جايداربەك كۇنعوجينوۆ، ەسبولات ابدىبەرىك جانە ادىلەت اقماتوۆ ورىندادى.
اۆتور: الما مۇقانوۆا