پرەزيدەنت جارلىعىمەن اباي، جەتىسۋ جانە ۇلىتاۋ وبلىستارى قۇرىلدى

نۇر- سۇلتان. قازاقپارات - پرەزيدەنت جارلىعىمەن ەلىمىزدە ءۇش جاڭا وبلىس قۇرىلدى. قازاقپارات پرەزيدەنتتىڭ ءتيىستى جارلىعىن جاريالايدى.

قازاقستان رەسپۋبليكاسىنىڭ اكىمشىلىك- اۋماقتىق قۇرىلىسىنىڭ كەيبىر ماسەلەلەرى تۋرالى

«قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» قازاقستان رەسپۋبليكاسى زاڭىنىڭ 9-بابىنا سايكەس قاۋلى ەتەمىن:

1. الماتى وبلىسىنىڭ اكىمشىلىك ورتالىعى تالدىقورعان قالاسىنان قونايەۆ قالاسىنا كوشىرىلسىن.

2. مىنالار: 1) شىعىس قازاقستان وبلىسىنىڭ قۇرامىنان اقسۋات، اباي، اياگوز، بەسقاراعاي، بورودۋليحا، جارما، ءۇرجار، كوكپەكتى اۋداندارىن، سەمەي جانە كۋرچاتوۆ قالالارىن ءبولۋ جولىمەن اكىمشىلىك ورتالىعى سەمەي قالاسىندا ورنالاساتىن اباي وبلىسى؛

2) الماتى وبلىسىنىڭ قۇرامىنان اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ، سارقان اۋداندارىن، تالدىقورعان جانە تەكەلى قالالارىن ءبولۋ جولىمەن اكىمشىلىك ورتالىعى تالدىقورعان قالاسىندا ورنالاساتىن جەتىسۋ وبلىسى؛

3) قاراعاندى وبلىسىنىڭ قۇرامىنان جاڭاارقا، ۇلىتاۋ اۋداندارىن، جەزقازعان، قاراجال جانە ساتبايەۆ قالالارىن ءبولۋ جولىمەن اكىمشىلىك ورتالىعى جەزقازعان قالاسىندا ورنالاساتىن ۇلىتاۋ وبلىسى قۇرىلسىن.

3. الماتى وبلىسىنىڭ جەرگىلىكتى وكىلدى جانە اتقارۋشى ورگاندارى، سونداي- اق ورتالىق مەملەكەتتىك ورگانداردىڭ اۋماقتىق بولىمشەلەرى مەن ۆەدومستۆولىق باعىنىستى مەكەمەلەرى قونايەۆ قالاسىنا كوشىرىلگەنگە دەيىن تالدىقورعان قالاسىندا ورنالاسادى دەپ بەلگىلەنسىن.

4. قازاقستان رەسپۋبليكاسىنىڭ ۇكىمەتى قازاقستان رەسپۋبليكاسىنىڭ جوعارعى سوتىمەن، قازاقستان رەسپۋبليكاسىنىڭ جوعارى سوت كەڭەسىمەن، قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگاندارمەن بىرلەسىپ، ءبىر اي مەرزىمدە ۇيىمداستىرۋ ءىس- شارالارىنىڭ جوسپارىن (جول كارتاسىن) بەكىتسىن جانە وسى جارلىقتى ىسكە اسىرۋ جونىندە وزگە دە شارالاردى قابىلداسىن.

5. ورتالىق مەملەكەتتىك ورگاندار، اباي، جەتىسۋ، ۇلىتاۋ وبلىستارىنىڭ، سونداي- اق شىعىس قازاقستان، الماتى، قاراعاندى وبلىستارىنىڭ جەرگىلىكتى وكىلدى جانە اتقارۋشى ورگاندارى ورتالىق مەملەكەتتىك ورگانداردىڭ ءتيىستى اۋماقتىق بولىمشەلەرىنىڭ، جەرگىلىكتى وكىلدى جانە اتقارۋشى ورگاندار مەن ۇيىمداردىڭ ىركىلىسسىز جانە ءتيىمدى جۇمىس ىستەۋىن قامتاماسىز ەتۋ جونىندە شارالاردى قابىلداسىن.

6. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

7. وسى جارلىق 2022 -جىلعى 8- ماۋسىمنان باستاپ قولدانىسقا ەنگىزىلەدى جانە رەسمي جاريالانۋعا ءتيىس.

قازاقستان رەسپۋبليكاسىنىڭ پرەزيدەنتى ق. توقايەۆ

نۇر- سۇلتان، اقوردا، 2022 -جىلعى 3- مامىر № 887