انادولىدا قازاق مادەنيەتىن دارىپتەپ جۇرگەن پولياك قىزى تۇرادى - تۇركيا

نۇر-سۇلتان. قازاقپارات - ۇلتى پولياك بولعانىمەن، جانى قازاق ليۋدميلا قوناعىنا ەت اسىپ، باۋىرساق ءپىسىرىپ بەرۋگە دايىن.

انكاراداعى وتانداسىمىزدىڭ ۇيىنەن مەنشىكتى ءتىلشىمىز مەرۋەرت قاناعات ءدام تاتىپ قايتتى، دەپ حابارلايدى «حابار 24». بىرنەشە جىل بۇرىن تۇركياعا كوشىپ كەتكەن ليۋدميلا ءساتى تۇسكەن سايىن اق داستارحان جايىپ، قازاقتىڭ اس ءمازىرىن دايىندايدى.

ەت اسىپ، باۋىرساق ءپىسىرىپ، ۇلتىمىزدىڭ ءداستۇرىن انادولىدا تانىستىرادى.

«قازاقستاندى شىن سۇيەمىن. قازاققا ءتان بارلىق دۇنيەنى جاقسى كورەم. قوستانايعا بارعاندا، دوستارىم «ءبىزدىڭ قازاق كەلدى» دەپ قارسى الادى. سۇتپەن ءشاي دەمدەيىك دەپ ايتادى. جالپى قازاقتىڭ سالت- ءداستۇرى ۇنايدى. ءبىر ۇعىم بار. قوناقجايلىلىق. كۇندەلىكتى باسقا بىرەۋدىڭ ۇيىنە باراسىڭ نەمەسە سەنىڭ ۇيىڭە قوناق كەلەدى. مەن دە سول ءداستۇردى، وسىندا ۇستانۋعا تىرىسامىن. قوناق شاقىرعاندا بارىمدى جايامىن. تۇرىك قوناقتارىم ءجيى كەلەدى. ءبارى ءدان ريزا»، دەيدى انكارا تۇرعىنى ليۋدميلا دولەك.

ليۋدميلانىڭ جۇبايى - انكارانىڭ ۆيتسە- گۋبەرناتورى. ابدۋللاح مىرزانىڭ ايتۋىنشا، ۇيىنە كەلگەن قوناقتارعا ەلدە تابىلمايتىن ەرەكشە تاعام ۇسىنىلادى. سەبەبى تۋىستاس جۇرت جىلقى ەتىن جەمەيدى. ونىڭ ءتۇرلى وزىندىك سەبەبى بار. دەگەنمەن ۇناتاتىندار دا بارشىلىق.

«قازاقستانعا التى رەت باردىق. تۇڭعىش ساپارىمدا قازاقستاندىقتار مەنى بايراقتارىمەن قارسى الدى. ۇلكەن داستارحان جايدى. باستى اس ءمازىرى - قازاقشا ەت ەدى. سول كەزدە، اس جىلقىنىڭ ەتىنەن ازىرلەنەتىنىن ءبىلدىم. تاڭقالدىم. ويتكەنى انادولىداعى جۇرت جىلقى ەتىن جەمەيدى. سوندا دا ءدامىن كورۋگە بەل بۋدىم. ۇنادى. جۇبايىم دا ءجيى ازىرلەيدى. قوناقتارىمىزدى ەلىمىزدە تابىلمايتىن وسىنداي تاعاممەن كۇتەمىز. ەتپەن بىرگە باۋىرساق، بالىشپەن ءسۇتتى شاي ىشەمىز. بىردە قاساپشى تانىسىم حابارلاسىپ، جۇبايىڭىز 10 ك گ ەت الىپ جاتىر. بۇل وتە كوپ قوي. بەرەيىن بە دەپ سۇرادى. مەن بەرە بەر دەدىم. قازاقتاردىڭ اسىندا ەت بولماسا، تاعام دەپ ەسەپتەمەيدى دەپ ايتتىم»، دەيدى انكارا قالاسىنىڭ ۆيتسە-گۋبەرناتورى ابدۋللاح دولەك.

تۇرىك جۇرتىنىڭ اس ءمازىرى باي. دەگەنمەن ەتتى قازاقتار سەكىلدى كوپ قولدانا بەرمەيدى. ليۋدميلا كەلگەن سوڭ دولەك اۋلەتىندە ءداستۇر وزگەرگەن.

دولەك شاڭىراعىندا قازاقتىڭ ءداستۇرى بەينەلەنگەن كارتينالار ءىلىنىپ تۇر. ساۋكەلە كيگەن قىزدار مەن بەسىك تەربەتكەن انا كارتيناسىن ليۋدميلا ءوزى سالعان. سۋرەت سالۋدى ەندى ۇيرەنە باستاعان. دەگەنمەن قىل قالامنان شىققان دۇنيەلەرى جۇرەككە جىلىلىق سىيلادى. ليۋدميلا، ءداستۇرلى مەيرامداردى قالت جىبەرمەي، اتاپ وتەدى.

ماسەلەن، ساناۋلى كۇن بۇرىن دوستارىمەن ناۋرىز تويلاپ، كوجە ءپىسىرىپتى. مۇنداي شارالار، اسىرەسە، تۇركيادا تۋىپ-وسكەن قازاقتار ءۇشىن ماڭىزدى ەكەنىن ايتادى. ويتكەنى الىستاعى وتانعا دەگەن ساعىنىشتى سالت-ءداستۇر باسادى.