ماڭعىستاۋداعى مال شارۋاشىلىعى بيىل دا قۋاڭشىلىقتان جاپا شەگۋى مۇمكىن

نۇر-سۇلتان. قازاقپارات - ماڭعىستاۋ وبلىسىنىڭ اكىمدىكتەرى تاراپىنان مال ازىعى بازاسىن دامىتۋ جۇمىستارى ءوز دەڭگەيىندە ەمەس، دەپ حابارلايدى قازاقپارات اۋىل شارۋاشىلىعى مينيسترلىگىنە سىلتەمە جاساپ.

بۇل تۋرالى اۋىل شارۋاشىلىعى جانۋارلارىن مال ازىعىمەن قامتاماسىز ەتۋ جانە مال جايۋ ءۇشىن جايىلىمداردىڭ قولجەتىمدىلىگى ماسەلەلەرى جونىندەگى كەڭەستە ايتىلدى.

اۋىل شارۋاشىلىعىنىڭ ءبىرىنشى ۆيتسە-ءمينيسترى ايداربەك ساپاروۆ اتاپ وتكەندەي، «قازگيدرومەت» بولجامىنا سايكەس، بيىل ماڭعىستاۋدا قۇرعاقشىلىق كۇتىلۋدە.

وڭىردە وتكەن جىلى دا قۇرعاقشىلىق بولىپ، سالدارىنان مال ءولىمى فاكتىلەرى تىركەلگەن.

«ۇكىمەتتىڭ جەدەل قولداۋ شارالارىنىڭ ارقاسىندا، مال ازىعىمەن قامتاماسىز ەتۋ سالاسىنداعى جاعداي تۇراقتالدى. كورسەتىلگەن بولجامداردى ەسكەرىپ، بىزگە قازىردەن باستاپ ازىقپەن قامتاماسىز ەتۋ جۇمىستارىن جۇرگىزۋدى باستاۋ جانە وتكەن جىلعى جاعدايدىڭ قايتالانۋىنا جول بەرمەۋ قاجەت. ازىقپەن قامتاماسىز ەتۋ جۇمىستارىنىڭ نەگىزگى بولىگى جەرگىلىكتى اتقارۋشى ورگاندار تاراپىنان اتقارىلۋى ءتيىس»، - دەپ اتاپ ءوتتى ايداربەك ساپاروۆ.

ۇكىمەت ءوز تاراپىنان جاعدايدىڭ قايتالانۋىن بولدىرماۋ ءۇشىن 2022-2025-جىلدارعا ارنالعان جەم-ءشوپ ءوندىرىسى سالاسىن دامىتۋ جونىندەگى جول كارتاسىندا كورىنىس تاپقان جۇيەلى شارالاردى قابىلدادى.

مال شارۋاشىلىعى دەپارتامەنتى ديرەكتورىنىڭ م. ا قايرات مۇتايەۆتىڭ ايتۋىنشا، وبلىستا 31,3 مىڭ باس ءىرى قارا بار، بۇل وتكەن جىلدىڭ سايكەس كەزەڭىمەن سالىستىرعاندا %2,2 عا ارتقان. تۇيە سانى 95 مىڭ باستى قۇرادى، ءوسىم - %10,6. جىلقى سانى 144,6 مىڭ باستى قۇراپ، ءوسىم %16,5 بولدى. ال قوي سانى %6,1 عا ازايىپ، 430,6 مىڭ باستى قۇرادى.

كەڭەس بارىسىندا پروبلەمالىق ماسەلەلەر دە ايتىلدى. وتكەن جىلعى قۋاڭشىلىققا قاراماستان، مال باسىنىڭ وسۋىنە بايلانىستى جەرگىلىكتى اتقارۋشى ورگاندار جەمشوپ بازاسىن دامىتۋ جانە جايىلىمدىق القاپتاردى جاقسارتۋ پروبلەمالارىن شەشۋ بويىنشا ءالسىز جۇمىس جۇرگىزۋدە. اۋداندىق اكىمدىكتەر بەكىتكەن جايىلىمداردى باسقارۋ جانە ولاردى پايدالانۋ جونىندەگى جوسپارلار فورمالدى سيپاتتا، جەردى قايتا ءبولۋ جۇمىستارى جۇرگىزىلمەيدى.

«ايتا كەتۋ كەرەك، وبلىستىڭ اگروقۇرىلىمدارىنىڭ كوپشىلىگىندە مال ازىعىن دايىنداۋ تەحنيكاسى جوق. تيىسىنشە جەم-ءشوپ داقىلدارىن ەگۋ جۇمىستارى باياۋ»، - دەپ حابارلادى دەپارتامەنت وكىلى.

قازىرگى ۋاقىتتا اۋىل شارۋاشىلىعى جانە قوعامدىق پايدالانۋ قاجەتتىلىكتەرى ءۇشىن بولىنگەن جايىلىمدىق جەرلەردىڭ اۋدانى شامامەن 3,2 ميلليون گەكتاردى قۇرايدى، ونىڭ جارتىسىنان كوبى، 1,7 ميلليون گەكتارى توزعان.

«سونىمەن قاتار، وبلىستا 8,6 ميلليون گەكتارعا جۋىق بوسالقى جەر بار، ولاردى سۋلاندىرۋ پروبلەمالارىن شەشۋ ارقىلى جايىلىم رەتىندە پايدالانۋعا بولادى. جەم-ءشوپ ءوندىرىسىن دامىتۋ ماسەلەسىندە بەلسەندىلىك بايقالمايدى نەمەسە مۇلدە جۇرگىزىلىپ جاتقان جوق دەگەن قورىتىندى جاساۋعا بولادى»، - دەپ تۇيىندەدى قايرات مۇتايەۆ.