التىن بەلگى ۇمىتكەرلەرى ەمتيحاندى جاڭا تالاپ بويىنشا تاپسىرادى
26 ءساۋىر 14:35

التىن بەلگى ۇمىتكەرلەرى ەمتيحاندى جاڭا تالاپ بويىنشا تاپسىرادى

نۇر-سۇلتان. قازاقپارات - ق ر ءبىلىم جانە عىلىم ۆيتسە- ءمينيسترى شولپان كارينوۆا بيىلعى «التىن بەلگى» ۇمىتكەرلەرى تاپسىراتىن ەمتيحاندارعا قاتىستى وزگەرىستەر جايىندا ءمالىم ەتتى، دەپ حابارلايدى قازاقپارات ءتىلشىسى.

«بيىل «التىن بەلگى» توسبەلگىسىن يەلەنۋ ەرەجەسىنە وزگەرىس ەنگىزىلدى. ونداعى ماقسات - اشىقتىق پەن ادىلدىكتى قامتاماسىز ەتۋ. وقۋشىلار ەمتيحاندى 5 ءپان بويىنشا تاپسىرادى. وسى ورايدا ەسكەرەتىن جايت، ەمتيحان پاندەرى، تاپسىرمالاردىڭ مازمۇنى وزگەرگەن جوق. «التىن بەلگى» ەمتيحاندارى 5-11-سىنىپ ارالىعىنداعى وقۋ باعدارلاماسى اياسىندا ازىرلەنەدى. بيىلعى باستى وزگەرىس ۇمىتكەرلەر ماتەماتيكا پانىنەن ەمتيحاندى نازاربايەۆ زياتكەرلىك مەكتەبى بازاسىندا تاپسىرادى. ياعني، اتالعان مەكتەپكە بارادى. وسى شارا اكادەميالىق ادالدىقتى قامتاماسىز ەتۋ ءۇشىن قولعا الىنىپ وتىر. ويتكەنى وقۋشى ءوز مەكتەبىندە ەمتيحان تاپسىرعاندا، وعان ءمۇعالىمى كومەكتەسۋى مۇمكىن»، - دەدى شولپان كارينوۆا مينيسترلىكتە وتكەن تىكەلەي ەفير بارىسىندا. ونىڭ ايتۋىنشا، ن ز م بازاسىندا وتەتىن ەمتيحاننىڭ مازمۇنى مەن دەڭگەيى بويىنشا وزگەرىس جوق. ەمتيحان تاپسىرماسى مەكتەپ باعدارلاماسىنا ساي ازىرلەنەدى.

«وقۋشى «التىن بەلگىگە» ۇمىتكەر بولۋ ءۇشىن 5-11-سىنىپ ارالىعىندا بارلىق توقساندىق باعالارى تەك «5» بولۋى ءتيىس. سونىمەن قاتار، وقۋشى نەمەسە اتا-اناسىنىڭ شەشىمىمەن «التىن بەلگىگە» ۇمىتكەر بولۋدان باس تارتۋعا دا بولادى. تاڭداۋ وقۋشىنىڭ ءوز ەركىندە. باس تارتقان جاعدايدا وقۋشى بارلىق ەمتيحاندى ءوز مەكتەبىندە تاپسىرادى. سول سياقتى «التىن بەلگىدەن» باس تارتقان وقۋشى ۇزدىك اتتەستات الا الادى»، - دەيدى ول.

ەسكە سالا كەتسەك، بىلتىر ءبىلىم ءمينيسترى «التىن بەلگىگە» ۇمىتكەرلەر ءۇشىن تالاپتىڭ كۇشەيتىلەتىنىن ايتقان ەدى.

اۆتور: ءالي يبرايەۆ

جاڭالىقتار