كوكتەمدە بەت تەرىسىن قالاي كۇتۋ كەرەك. كوسمەتولوگپەن سۇقبات

نۇر-سۇلتان قازاقپارات - كوسمەتولوگ- ەستەت جانار سەرىكقالي قىزىمەن سۇقبات.

ءاربىر ايەل وزىنشە سۇلۋ. سۇلۋلىق ءاردايىم كۇتىم مەن ۇيلەسىمدىلىكتى تالاپ ەتەدى. بارلىعىمىز تەرىمىزدىڭ جۇمساق، بالعىن، ادەمى بولعانىن قالايمىز. بەت تەرىسىنىڭ جاس كۇيىن قالاي ساقتايمىز؟ بەزەۋ شىقپاس ءۇشىن نە ىستەۋ كەرەك؟ بەزەۋ مەن مەڭدى الدىرتۋ قاۋىپتى مە؟ وسى جانە وزگە دە سۇراقتار توڭىرەگىندە كاسىبي ماماندارمەن كەڭەسۋ ماڭىزدى. سۇراقتارىمىزعا كوسمەتولوگ- ەستەت جانار سەرىكقالي قىزى جاۋاپ بەردى.

- جانار سەرىكقالي قىزى، بەتكە قانشا جاستان باستاپ كۇتىم جاساۋ كەرەك؟

- بەتكە جاس ءوسپىرىم كەزدەن باستاپ كۇتىم جاساعان دۇرىس. سەبەبى ول كەزدە بالالاردا گورمانالدىق وزگەرىستەر پايدا بولا باستايدى. سونىڭ اسەرىنەن بەت تەرىسىندە ءتۇرلى سەپكىلدەر، بەزەۋلەر شىعۋى مۇمكىن. جالپى قاي مەزگىلدە بولماسىن بەت تەرىسىنە ەرەكشە كۇتىم كەرەك. بەت كۇتىمىندە كاسىبي (پروفەسسيونالدىق) كوسمەتيكانى تاڭداعان ءجون. ويتكەنى ولار بەلگىلى بىر لابوراتوريالىق تەكسەرىستەن وتكەن، زەرتتەلگەن جانە قۇرامىندا بەلسەندى قوسپاسى جوق.

- بەزەۋدى قالاي كەتىرەمىز، بەزەۋ شىقپاس ءۇشىن نە ىستەۋ كەرەك؟

- بەزەۋدى كەتىرۋ ءۇشىن نەمەسە بەزەۋ شىقپاس بۇرىن ەڭ الدىمەن ونىڭ سەبەبىن انىقتاپ العانىمىز دۇرىس. بەزەۋدىڭ پايدا بولۋىنىڭ ءار ءتۇرلى سەبەپتەرى بار. بىرىنشى - ىشكى قۇرىلىستان بولۋى مۇمكىن. ەگەر دە ادام دۇرىس تاماقتانبايتىن بولسا، اسقازان-ىشەك جولدارىندا وزگەرىس بولادى. ەكىنشى - گورمانالدىق وزگەرىستەر. ءۇشىنشى - ادامنىڭ دەنەسىندەگى پارازيتتەر ءار ءتۇرلى جاعدايلارعا بايلانىستى كوبەيگەن بولسا، ول دا بەزەۋدىڭ پايدا بولۋىنا سەبەپ بولۋى مۇمكىن. سونىمەن قاتار دۇرىس ۇيىقتاماۋ مەن سترەسستىك جاعدايلاردىڭ دا ۇلكەن اسەرى بولادى. سوندىقتان سەبەبىن انىقتاپ العاننان كەيىن كۇتىم جاساۋىمىز قاجەت. مىندەتتى تۇردە دەرماتولوگ ماماننان كەڭەس الۋ كەرەك. ەگەر دە اعزاڭىزدا پارازيتتەر بولاتىن بولسا، ارنايى ماماندارعا جىبەرەمىز. ونداي جاعدايدا بەلگىلى بىر انتيبيوتيكتەرمەن، ارنايى پرەپاراتتارمەن ەمدەلەدى.

- بەتتەگى مەڭ مەن سۇيەلدى الدىرۋ قاۋىپتى مە؟

- بەتتەگى مەڭ مەن سۇيەلدى الدىرماس بۇرىن الدىن الا لابوراتوريالاردا اناليز جاسالادى. سيستولوگيا، گيستولوگياعا تاپسىرادى. ەگەر دارىگەرلەر الۋ كەرەك دەپ ساناسا، الىپ تاستاعان دۇرىس. كەيبىر سۇيەلدەر اعزانىڭ يممۋنيتەتىنە بايلانىستى پايدا بولادى. ەگەر دە يممۋنيتەيى جاقسى بولاتىن بولسا، ءوزىنىڭ قورعانىشتىق قاسيەتىمەن كەيبىرەۋلەرى جويىلىپ كەتۋى دە مۇمكىن.

- بەتتى سابىنمەن جۋۋ قانشالىقتى دۇرىس؟ ماماندار «سابىن بەتتى قارتايتادى» دەپ جاتادى. بۇل قانشالىقتى راس؟

- سابىن بەتىڭىزدىڭ تەرىسىن قۇرعاتۋى مۇمكىن. سوندىقتان مامان رەتىندە بەرەر كەڭەسىم بەتتى سابىنمەن جۋماعان دۇرىس. ونىڭ انالوگتارى رەتىندە ءتۇرلى جۋىناتىن زاتتار ( گەل، سكراب، تونيك ) قولدانعانىڭىز ابزال.

- بەتكە كۇندىز دە، جاتار مەزگىلدە دە كرەم جاعىپ جاتامىز. بۇل دۇرىس پا، الدە تەرى تۇندە بىر ۋاقىت دەمالۋى كەرەك پە؟

- بەتكە كرەم جاعىپ جاتقان دۇرىس. مىسالى جاس بالالارعا كەرى كورسەتكىشتەرى بولماسا مىندەتتى تۇردە كرەم جاعىپ جۇرۋگە بولادى. 13 جاستان باستاپ ىلعالداندىراتىن كرەمدەردى پايدالانسا بولادى. 20-25 جاستان باستاپ قىز- كەلىنشەكتەرگە بەت كۇتىمىنە كوڭىل بولگەندەرى دۇرىس. كرەم كۇندىزگى جانە تۇنگى كرەم بولىپ بولىنەدى. ولاردىڭ ءارقايسىسىنىڭ وزىندىك فۋنكتسيالارى بار. تۇندە جاعاتىن كرەمدەر قورەكتىك كرەم (پيتاتەلنىي كرەم) سىڭىمدى. ول قالىپتى جاعدايدا بەتتەگى كوللاگەندەردى، ەلاستيندەردى سينتەزدەۋگە كومەكتەسەدەى.

- كوپ ادامدار بەتىمدى تازالاتسام، حيميالىق زاتتارمەن ءبۇلدىرىپ، زيان كەلتىرىپ الامىن با دەپ قورقادى. سالونعا بارىپ بەتتى تازالاتقان قانشالىقتى ورىندى؟

- ءار ادامدا بەت تەرىسى ءار ءتۇرلى بولادى. بىرىندە مايلى تەرى بولسا، ەكىنشىسى قۇرعاق بولۋى مۇمكىن. مايلى تەرىلەر بەزەۋگە بەيىم كەلەدى. سول سەبەپتى ولاردا كورسەتكىش بولاتىن بولسا ەكى ايدا بىر رەت تازارتقان ءجون. قالىپتى بەت تەرىسى بولسا، 3-4 ايدا تازالاتسا بولادى. ەگەر تەرىڭىز تازا بولسا، 7-8 ايدا تازارتقان ءجون.

- ماسساج بەن ماسكالاردىڭ بەتكە پايداسى...

- ماسساج كوپ نارسەنىڭ الدىن الادى. ماسساج تەك اجىمدەردى كەتىرمەيدى. بەت تەرىسىنىڭ قان اينالىمىن جاقسارتادى. نەگىزى بەتىڭىزگە ۇنەمى كۇتىم جاسايتىن بولساڭىز بەتىڭىز جارقىراپ، ءوڭىڭىز اشىلىپ جۇرەدى.

بەتتەگى ءاجىمنىڭ پايدا بولۋى ول بىزدىڭ بەتىمىز ەمەس، بەت تەرىسىنىڭ استىنداعى بۇلشىق ەتتەرىمىزدىڭ اسەرىنەن بولادى. سول ءۇشىن بۇلشىق ەتتەرىمىز ءارقاشاندا بوساڭسىعان (راسسلاببلەننىي) كۇيدە بولۋى كەرەك. ماسساجدى 20-25 جاستان باستاپ جاساعان دۇرىس. بىراق مامان رەتىندە ءار ادامنىڭ بەت- كەلبەتىنىڭ جاعدايىنا بايلانستى ماسساج تاعايىندايمىز. ماسساجدىڭ تۇرلەرى كوپ. كەيبىر ادامداردىڭ بەتىندە ىسىك بولۋى مۇمكىن. بەتكە ارنالعان ماسساجدى ورتا ەسەپپەن 15 سەانسقا دەيىن الۋعا بولادى.

ماسكالاردىڭ تۇرلەرى كوپ. كوكتەمگى كۇتىمگە بايلانىستى كوبىنە بەت تەرىسىن ىلعالداندىرۋ ءۇشىن (تكانيەۆىي ماسكالاردى) قولدانامىز. جاس وزگەرىستەرىنە بايلانىستى نارلەندىرەتىن ماسكالاردى (پيتاتەلنىي ماسكالاردى) پايدالانعان دۇرىس. ماسكالاردى اپتاسىنا 2 رەت جاساۋعا بولادى. ايىنا بىرنەشە رەت جۇيەلى تۇردە جاساپ تۇرۋ كەرەك.

- اجىمنەن قۇتىلۋ ءۇشىن نە ىستەۋ كەرەك؟

- ءاجىمنىڭ پايدا بولۋى ول گينەتيكاعا بايلانىستى. كەيبىر ايەلدەر 45 جاستا 30 جاستاعىداي كورىنۋى مۇمكىن. جانە دە ادامنىڭ كۇندەلىكتى ورتادا ءوزىن ۇستاۋى، سپورتپەن شۇعىلدانۋى، دۇرىس تاماقتانۋى دا بەت تەرىسىنە اسەر ەتەدى. ەكىنشى ارينە ول كۇتىم. كەيبىر ادامدار بەتىنە كۇتىم جاسامايدى. بەت تەرىڭىزگە مىندەتتى تۇردە كۇتىم جاساڭىز. ىلعالداندىراتىن كرەم جاعىڭىز، ماسساج جاساپ، ءتۇرلى كومەتولوگيالىق پروتسەدۋرالاردى الىپ ءجۇرىڭىز. قازىر زامان دامىعان. ءار ءتۇرلى جاس ەرەكشەلىكتەرىنە بايلانىستى بەت كۇتىمىنە ارنالعان پروگراممالار بار. تاعى بىر ايتاتىنىم ادام بىرىنشى كەزەكتە ءوزىن ءوزى جاقسى كورۋى كەرەك. روللەر، شاريكتەرمەن كۇندەلىكتى 5-8 مينۋت ماسساج جاساساڭىز بەتىڭىزدىڭ ادەمى قالپىن ساقتاپ قالاسىز.

- بەتتى كۇن كوزىنەن قالاي قورعاۋ كەرەك؟

- كوكتەمدە SPF- تى قولدانعان ءجون. SPF نەگىزىنەن تەرىنىڭ تيپىنە بايلانىستى بولىنەدى. ول كۇن ساۋلەسىنە بايلانىستى. ەگەر قىستىڭ كەزىندە SPF-15،20 جەتكىلىكتى بولاتىن بولسا، جاز مەزگىلدەرىندە SPF 5-تى قولدانۋ كەرەك.

- توكسيندەردەن ارىلۋ جولدارى

- توكسيندەر اعزادا شلاك ارقىلى ءبولىنىپ وتىرۋى كەرەك. كوپ نارسە بىزدىڭ جەگەن تاعامىمىزبەن كەلەدى. سودان اسقازانعا ءتۇسىپ، بەتىمىزدە كورىنىس تاۋىپ جاتادى. كوپ سۋ ىشۋ، اشىعۋ پروتسەستەرى توكسيندەردەن ارىلۋدىڭ قاراپايىم تۇرلەرىنە جاتادى. نەمەسە دارىگەرگە بارىپ، ارنايى مەديتسينالىق پروتسەدۋرالاردى الۋعا بولادى.

- سۇقباتىڭىزعا راقمەت!

EL. KZ