پرەزيدەنت قىلمىستىق ىستەردى تەرگەۋ كەزىندە زاڭدىلىقتىڭ ساقتالۋىن قامتاماسىز ەتۋدى تاپسىردى

نۇر- سۇلتان. قازاقپارات - مەملەكەت باسشىسى قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى.

پرەزيدەنتكە قارجىلىق مونيتورينگ اگەنتتىگىنىڭ بيىلعى ءبىرىنشى توقساندا اتقارعان جۇمىستارىنىڭ ناتيجەلەرى تۋرالى باياندالدى، دەپ حابارلايدى قازاقپارات اقورداعا سىلتەمە جاساپ.

اتاپ ايتقاندا، 552 قىلمىستىق ءىس قوزعالعان. ولاردىڭ جارتىسىنان كوبى - اۋىر جانە اسا اۋىر قىلمىستار. ۇيىمداسقان قىلمىستىق توپ قۇرۋ فاكتىلەرى بويىنشا 14 ىسكە قاتىستى سوتقا دەيىنگى تەرگەۋ امالدارى باستالعان. مەملەكەتكە 62 ميلليارد تەڭگە كولەمىندە شىعىن كەلتىرىلگەن. جانات ەليمانوۆتىڭ ايتۋىنشا، 2021-2023 -جىلدارعا ارنالعان كەشەندى جوسپار اياسىندا كولەڭكەلى ەكونوميكانىڭ دەڭگەيىن تومەندەتۋ ءۇشىن جۇيەلى شارالار قابىلدانىپ جاتىر.

كەدەن سالاسىندا 34 قىلمىستىق ءىس قوزعالدى. دەكلاراتسياعا ەنگىزىلمەگەن تاۋارلاردىڭ جالپى قۇنى 10 ميلليارد تەڭگەدەن اسادى. قاسىم- جومارت توقايەۆقا مۇناي وڭدەۋ زاۋىتتارىن جاڭعىرتۋعا بولىنگەن 20,5 ميلليارد تەڭگە قارجىنى جىمقىرۋ فاكتىلەرىنە قاتىستى قىلمىستىق ىستەر بويىنشا تەرگەۋ جۇرگىزىلىپ جاتقانى تۋرالى مالىمەت بەرىلدى.

اگەنتتىك ءتوراعاسىنىڭ ايتۋىنشا، قوعامداعى الەۋمەتتىك ماسەلەلەردى شەشۋگە ەرەكشە كوڭىل بولىنەدى. «تاريف» جوباسى اياسىندا كوممۋنالدىق قىزمەتتەر سالاسىنداعى تاريفتەردىڭ نەگىزسىز ءوسۋ دەرەكتەرىن انىقتاۋ جانە مونوپوليالاردان ارىلتۋ جۇمىستارى جالعاسادى. ماڭعىستاۋ وبلىسىندا سۇيىتىلعان گازدى ساتۋ كەزىندەگى الىپ- ساتۋ بەلگىلەرى بويىنشا ەنەرگەتيكا مينيسترلىگىنىڭ، وبلىس اكىمدىگىنىڭ لاۋازىمدى تۇلعالارىنا جانە ەلەكتروندى ساۋدا الاڭدارىنا قاتىستى ءىس تەرگەپ- تەكسەرىلىپ جاتىر.

پرەزيدەنتتىڭ تاپسىرماسى اياسىندا قارجىنى قازاقستاننان تىس جەرلەرگە زاڭسىز جىلىستاتۋعا قارسى جۇمىستار وندىرىستە. بۇگىندە 7 قىلمىستىق ءىس تەرگەلىپ جاتىر جانە 28 ميلليون ا ق ش دوللارى بۇعاتتالعان.

مەملەكەت باسشىسى اگەنتتىكتىڭ قىلمىستىق جولمەن الىنعان كىرىستەردى زاڭداستىرۋعا جانە كولەڭكەلى ەكونوميكانىڭ دەڭگەيىن تومەندەتۋگە قارسى ءىس- قيمىل جونىندەگى جۇمىستارىنىڭ ماڭىزدى ەكەنىن ەرەكشە اتاپ ءوتىپ، جانات ەليمانوۆقا بيزنەسكە قاتىستى جۇرگىزىلىپ جاتقان بارلىق قىلمىستىق ءىستى تەرگەپ- تەكسەرۋ كەزىندە زاڭدىلىقتىڭ مۇلتىكسىز ساقتالۋىن قامتاماسىز ەتۋدى تاپسىردى.

پرەزيدەنتتىڭ پىكىرىنشە، قۇقىق قورعاۋ جانە باقىلاۋشى ورگاندار كاسىپكەرلەردىڭ وتىنىشتەرىنە جەدەل نازار اۋدارۋعا جانە ولاردىڭ قۇقىعىن شەكتەمەۋگە ءتيىس. قاسىم- جومارت توقايەۆ شاعىن جانە ورتا بيزنەسكە مەملەكەت تاراپىنان ەرەكشە قولداۋ قاجەت ەكەنىن ايتتى جانە بۇل جەردە قارجىلىق مونيتورينگ اگەنتتىگى ماڭىزدى ءرول اتقارادى دەپ سانايدى. قۇقىق قورعاۋ جانە باقىلاۋشى ورگانداردىڭ ورتاق مىندەتى - ەكونوميكامىزدىڭ ورنىقتى دامۋىن قامتاماسىز ەتۋ ءۇشىن ەلىمىزدە قولايلى بيزنەس- ورتا قالىپتاستىرۋعا اتسالىسۋ.