بەلارۋس وتباسى روزا باعلانوۆانىڭ اندەرى جازىلعان كونە ديسكىنى ساقتاپ كەلگەن - فوتو
جەرگىلىكتى تۇرعىن جيىنعا ءانشىنىڭ تانىمال قوس ءانى جازىلعان كونە ديسكىنى الىپ كەلدى. بۇل تۋرالى ق ر سىرتقى ىستەر مينيسترلىگىنىڭ رەسمي سايتىندا جاريالانعان، دەپ حابارلايدى قازاقپارات. قاتىسۋشىلار روزا باعلانوۆانىڭ «ادام جۇرەگىنە قالاي تەرەڭ اسەر ەتىپ، جانىنىڭ نازىك پەرنەسىن قوزعاي العانىنا» تاڭداندى.
«قازاق پەن بەلارۋس حالقى ءار ءتۇرلى، مادەنيەتىمىز دە ۇقساس ەمەس. دەگەنمەن، ورتاق نارسەلەرىمىز دە بار ەكەنى مەنى قاتتى تاڭ قالدىردى. روزا باعلانوۆا - سونىڭ دالەلى. الەمنىڭ ونداعان تىلىندە ءان ايتىپ، ءار ءتۇرلى حالىققا ولاردىڭ انا تىلىندە سويلەۋى - تەك قازاقتىڭ عانا ەمەس، الەمدىك مادەنيەتتى ناسيحاتتايتىن تۇلعا بولعانىن بىلدىرەدى»، - دەدى بەلارۋس مەملەكەتتىك مۋزىكا اكادەمياسىنىڭ رەكتورى ەلەنا كۋراكينا.
شارا بارىسىندا ءانشىنىڭ سۇحباتىنا نەگىزدەلگەن «وتكەننىڭ نۇرى» دەرەكتى فيلمى كورسەتىلدى، ەستەلىكتەرىنەن ۇزىندىلەر كەلتىرىلدى. سولاردىڭ بىرىندە حالىق ءارتىسى بىلاي دەپتى: «ساحنا مەن ءۇشىن ءارقاشان قۋانىشقا تولى بولدى. مەن ساحنادا باۋىرىمدى جانە جاقىن ادامىمدى قۇشاقتاپ، سۇيگەندەي بولامىن. مەن ونى سوڭعى دەمىمە دەيىن جاقسى كورۋگە جانە ودان اتاق، مانساپ نەمەسە پايدا ىزدەمەۋگە ۋادە بەردىم». روزا ءتاجىباي قىزى بۇل ۇستانىمدى ەشقاشان وزگەرتپەدى.
باسقوسۋعا جەرگىلىكتى تۇرعىن ءانشىنىڭ ەڭ تانىمال اندەرى - «سامارا- گورودوك» پەن لاتيف حاميديدىڭ «قازاق ءۆالسى» جازىلعان راريتەت ديسكىنى الىپ كەلگەن. ول روزا باعلانوۆانىڭ مۋزىكا مەن ادامدارعا دەگەن سۇيىسپەنشىلىككە تولى ۇلى تالانتىن مويىنداۋدىڭ ايعاعى رەتىندە سوعىستان كەيىنگى جىلدارى جازىلعان بۇل ديسك وتباسىلىق مۇراعاتتا ساقتالىپ كەلگەنىن ايتتى.
سونداي-اق، شاراعا مۋزىكاتانۋشىلار، ونەرتانۋشىلار جانە ءتۇرلى مەملەكەتتەردىڭ ازاماتتارى، ونىڭ ىشىندە 1941 -جىلعى مايداننان باستاپ، وتكەن عاسىردىڭ سوڭىنا دەيىن ساحنالارىندا روزا باعلانوۆا ونەر كورسەتكەن ەلدەردىڭ وكىلدەرى قاتىستى.
ايتا كەتسەك، يۋنەسكو دەڭگەيىندە تويلاناتىن تۇلعالار تىزىمىنە ەنگەن داڭقتى ءانشىنىڭ 100 جىلدىعىنا ارنالعان شارالار رەسمي تۇردە ەلوردادا باستالعان بولاتىن.
