سەنات مەدياتسياعا قاتىستى زاڭدى قابىلدادى
7 ءساۋىر 11:25

سەنات مەدياتسياعا قاتىستى زاڭدى قابىلدادى

نۇر-سۇلتان. قازاقپارات - بۇگىن پارلامەنت سەناتىنىڭ جالپى وتىرىسىندا «بىرىككەن ۇلتتار ۇيىمىنىڭ مەدياتسيا ناتيجەسىندە قول جەتكىزىلگەن حالىقارالىق تاتۋلاسۋ كەلىسىمدەرى تۋرالى كونۆەنتسياسىن راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.

«بۇگىنگى تاڭدا مەدياتسياعا دەگەن سۇرانىس نەعۇرلىم ارتۋدا. مەدياتسيانىڭ كومەگىمەن ەكى تاراپتىڭ مۇددەلەرىن قاناعاتتاندىرا وتىرىپ، داۋدى شەشۋگە بولاتىندىعى ازاماتتاردى قىزىقتىرادى. 2019 -جىلعى 7-تامىزدا سينگاپۋردا قازاقستان ب ۇ ۇ- نىڭ مەدياتسيا ناتيجەسىندە قول جەتكىزىلگەن حالىقارالىق تاتۋلاسۋ كەلىسىمدەرى تۋرالى كونۆەنسياسىنا قول قويدى. كونۆەنسيانىڭ ماقساتى - مەدياتسيا ناتيجەسىندە قول جەتكىزىلگەن حالىقارالىق كەلىسىمدەردى قاتىسۋشى مەملەكەتتەردىڭ اۋماعىندا تانۋ جانە ورىنداۋ. وسى ۋاقىتقا دەيىن مەدياتسيا ناتيجەسىندە قول جەتكىزىلگەن حالىقارالىق كەلىسىمدەردى تانۋ جانە ساقتالۋىن قامتاماسىز ەتۋ ءۇشىن ءبىرىڭعاي تەتىك بولعان جوق. سايكەسىنشە، داۋ تاراپتارى ءۇشىن تاتۋلاسۋ كەلىسىمىن باسقا يۋريسديكتسيادا تانۋ جانە ورىنداۋ ءۇشىن سوتقا جۇگىنۋگە مۇمكىندىك تۋىندايدى»، - دەدى ق ر ادىلەت ءمينيسترى قانات مۋسين.

قۇجاتقا سايكەس تاتۋلاسۋ كەلىسىمىن ورىنداۋ ۇلتتىق زاڭناماعا سايكەس جۇزەگە اسىرىلادى. مەدياتسيا ناتيجەسىندە قول جەتكىزىلگەن كەلىسىمدەردى ورىنداۋ ءتارتىبى «مەدياتسيا تۋرالى» قر زاڭىنىڭ جانە ق ر ازاماتتىق پروتسەستىك كودەكسىنىڭ ەرەجەلەرىندە كوزدەلگەن. كونۆەنتسيا قاتىسۋشى مەملەكەتتەردىڭ ەكى جانە ودان دا كوپ كومپانيالارى اراسىنداعى حالىقارالىق كوممەرتسيالىق داۋلارىنا عانا قولدانىلادى. كونۆەنتسيانى راتيفيكاتسيالاۋ سوتتان تىس مەدياتسيانى جەتىلدىرۋدە وڭ قادام بولىپ وتىر. «ول حالىقارالىق ساۋداعا جاردەمدەسۋدىڭ ماڭىزدى قۇرالى بولىپ سانالادى جانە كوممەرتسيالىق تاراپتاردىڭ حالىقارالىق كەلىسىمدەرىن جۇزەگە اسىرۋعا ىقپال ەتەدى. قازاقستاننىڭ كونۆەنتسيانىڭ قاتىسۋشى رەتىندەگى مارتەبەسى ەلدىڭ حالىقارالىق بيزنەس- بەدەلىنە جانە ينۆەستيتسيالىق تارتىمدىلىعىنا وڭ اسەر ەتەدى»، - دەدى مينيستر.

ايتا كەتەيىك، جاقىندا «قوعامدىق كەلىسىم» ر م م ديرەكتورى عالىمجان قۇسمانعالي مەدياتسيا كابينەتتەرىنىڭ تۇرمىستىق داۋ- دامايلاردى شەشۋگە قانداي كومەك كورسەتكەنىن ايتىپ بەرگەن ەدى. قازىرگى ۋاقىتتا بۇكىل وبلىس ورتالىقتارىندا 20 مەدياتسيا كەڭەسى، ءبىر رەسپۋبليكالىق جانە 19 وڭىرلىك كابينەت بار. اسسامبلەيا تىركەۋىندە 2318 مەدياتور بار، ولار 2016 -جىلدان باستاپ 134 مىڭ ءوتىنىشتى قاراعان، ونىڭ %51 ى مەدياتيۆتىك ىمىراعا كەلۋ جولىمەن شەشىلدى،

قالعان %49 ىنا مەدياتور كونسۋلتاتسيا بەرگەن.

اۆتور: رۋسلان عابباسوۆ

جاڭالىقتار