بەيجىڭ وليمپياداسىندا تانىلعان قانداسىمىز اقنار اداق قىزىنا اۋىلداستارى ات مىنگىزدى
تالاي مارتە رەسپۋبليكالىق جانە حالىقارالىق جارىستاردىڭ باس جۇلدەسىن جەڭىپ العان، تاياۋدا عانا بەيجىڭ قىسقى وليمپياداسىنا قاتىسىپ ونەر كورسەتكەن، ەل مەرەيىن اسىرىپ جۇرگەن اقنار اداق قىزىنا اۋىلداستارى 27- ناۋرىز كۇنى اۋىلدا ءدۇبىرلى توي جاساپ، قوس بىردەي تۇلپار مىنگىزدى جانە اتان تۇيە جەتەلەتتى.
وسىلايشا قىتايدىڭ شىڭجاڭ ولكەسى قۇتىبي اۋدانى تاسباسپالداق اۋىلىنىڭ حالقى سپورتتا توپ جارعان قىزىنا قازاق سالتى بويىنشا ەرەكشە ىقىلاسى مەن قۇرمەتىن كورسەتكەن.
ايتا كەتەيىك، اقنار اداق قىزى 1999-جىلى قىتايدىڭ شىڭجاڭ ولكەسىنىڭ قۇتىبي اۋدانىندا تۋعان. اقنار 5 جاسىنان باستاپ كونكي تەبەدى. 10 جاسىندا سپورتقا دەگەن اۋەستىگىنە كاسىبي تۇردە قاراپ، جاتتىقتىرۋشىسىنىڭ باعىت-باعدارىمەن شۇعىلدانا باستايدى.
2014-جىلى شىڭجاڭ قىسقى ويىندارىندا قاتارىنان 5 رەت چەمپيون اتانعان. ءسويتىپ، 15 جاسىندا رەسمي تۇردە شىڭجاڭ قۇراماسىنىڭ مۇشەلىگىنە ءوتىپ، ۇلتتىق جارىسقا قاتىسۋ قۇقىعىنا يە بولادى.
ال 2016-جىلى قىتايدىڭ ۇلتتىق قۇراماسىنا الىنادى. اقنار اداق قىزى كونكيمەن جۇگىرۋدەن 2018-2019-جىلعى ۇلتتىق چەمپيوناتتا ايەلدەر اراسىندا 5000 مەتر قاشىقتىق بويىنشا چەمپيون اتاندى.
ال جاستار اراسىنداعى كونكيمەن جۇگىرۋدەن 2019-2020-جىلعى الەم كۋبوگىنىڭ ەكى كەزەڭىنە قاتىسقان اقنار اداق قىزى التىننان القا تاققان.
ول سول جولعى نورۆەگيادا وتكەن 3000 مەتر قاشىقتىقتا جاستار اراسىنداعى كونكيمەن جۇگىرۋدەن الەم كۋبوگىنىڭ 1-كەزەڭى مەن نيدەرلاندتا وتكەن 2-كەزەڭىندە قاتارىنان ەكى باس جۇلدەنى قانجىعالاعان. سونىمەن قاتار نيدەرلاندتا وتكەن الەم كۋبوگىنىڭ ەكىنشى ماتچىندا ايەلدەر اراسىنداعى سپرينتەرلىك كوپسايىستا اقناردىڭ كومانداسى قولا مەدال جەڭىپ الدى.
ال بىلتىرعى الەم چەمپيوناتىندا اقنار كونكيمەن جۇگىرۋدەن كوماندالىق جارىسقا قاتىسىپ، قىتايدىڭ قورجىنىنا قولا مەدال سالادى. XXIV قىسقى وليمپيادا ويىندارىندا قىتاي قۇرامىندا سىنعا تۇسكەن اقنار اداق قىزى 5- اقپاندا بەيجىڭدەگى قىسقى وليمپيادا ويىندارىندا ايەلدەر اراسىنداعى 3000 مەترگە كونكيمەن جۇگىرۋ جارىسىندا 4:12.28 ۋاقىتىمەن 17-ورىنعا، 7- اقپاندا 1500 مەترگە كونكيمەن جۇگىرۋ جارىسىندا 1:58.59 ۋاقىتىمەن 17-ورىنعا يە بولدى. سونداي-اق، 15- اقپاندا سپرينتەرلىك كوپسايىستا اقناردىڭ كومانداسى نورۆەگيا كومانداسىن جەڭىپ، 5-ورىندى قانجىعالادى.
اۆتور: باقىتجول كاكەش
