باتىس قازاقستاندا تاسقىن سۋ اۋىل شەتىندەگى وتكەلدى شايىپ كەتتى

ورال. قازاقپارات - باتىس قازاقستان وبلىسىندا تاسقىن سۋ اۋىل شەتىندەگى وتكەلدى شايىپ كەتتى، دەپ حابارلايدى قازاقپارات ءتىلشىسى.

قاراتوبە اۋدانىنىڭ اكىمى قادىرجان سۇيەۋعاليەۆتىڭ ءمالىم ەتكەنىندەي، وقيعا 30- ناۋرىز كۇنى قاراكول اۋىلدىق وكرۋگى اقتايساي اۋىلىندا بولدى.

اكىمنىڭ ايتۋىنشا، اۋا رايى كۇرت جىلىنىپ، قاردىڭ ەرۋى سالدارىنان تايان وزەنى ارناسىنداعى سۋ كوتەرىلگەن. تايان ءوز ارناسىنىڭ باعىتىمەن قۋاعاشقا، ال قۋاعاش جاقسىباي وزەنىنە قۇيادى.

«تاسىعان سۋ ەكپىنى ساعات 17.20 دا اقتايساي اۋىلىنىڭ كىرەبەرىسىندەگى جاقسىباي وزەنىنەن وتەتىن وتكەلدى (60 مەتر) تولىعىمەن بۇزىپ، شايىپ ءوتتى. تاسقىننان ەلدى مەكەنگە قاۋىپ جوق»، دەدى قازاقپارات تىلشىسىنە ق. سۇيەۋعاليەۆ.

ەسكە سالا كەتەيىك، بۇدان بۇرىن باتىس قازاقستاندا اۋىل مەكتەبىنە سۋ كىرگەنىن جازعان بولاتىنبىز.