الماتىدا «جاڭا قازاقستان» جاستار قوزعالىسى قۇرىلادى

الماتى. قازاقپارات - الماتىدا كاسىپكەرلەر، جاستار ۇيىمدارى مەن شىعارماشىلىق ورتانىڭ باستاماسىمەن «جاڭا قازاقستان» جاستار قوزعالىسى قۇرىلادى، دەپ حابارلايدى قازاقپارات ءتىلشىسى.

مۇنداي باستامانى العاشقى بولىپ كاسىپكەر، مەتسەنات سىرىمبەك تاۋ كوتەردى.

«ءبىز زاڭدى تۇلعا نەمەسە ساياسي قوزعالىس ەمەسپىز. ءبىز قوعام بەلسەندىلەرىمىز. تەك جاستاردى بىرلىككە شاقىرعىمىز كەلەدى. ءبىز ەلىمىزدى بىرگە دامىتۋىمىز كەرەك»، - دەدى ول باسپا ءسوز ءماسليحاتىندا.

سپيكەر قازاقستان رەسپۋبليكاسى پرەزيدەنتىنىڭ جاڭا قازاقستاندى قۇرۋ تۋرالى باستاماسىن قولدايتىنىن جەتكىزدى.

«ارينە بۇل باستامانى قۋانا قولدايمىز. جاستار بولىپ ەلدى بىرلىككە، بەرەكەگە شاقىراتىن اكسيالار وتكىزۋ تۋرالى ۇسىنىسىمىزدى قالانىڭ كوپتەگەن وقۋ ورىندارىنداعى جاستار قولداپ وتىر. بۇل اكسيا ناۋرىزدىڭ 18 -كۇنى وتەدى»، - دەدى سىرىمبەك تاۋ.

ايتۋىنشا، 18-ناۋرىز كۇنى ساعات 14:00 دە الماتى جاستارىنا جاقسى سەرپىلىس بەرۋ ءۇشىن «الماتى ارەنادا» جەكە كاسىپكەرلەردىڭ قولداۋىمەن كونسەرت ۇيىمداستىرىلادى.

«بۇل ستۋدەنتتەر فەستيۆالى بولادى. كونسەرتكە تانىمال ونەر جۇلدىزدارى، كاسىپكەرلەر، قوعام بەلسەندىلەرى مەن سپورتشىلار قاتىسادى، ولار مەرەكەلىك باعدارلامامەن قوسا، ونەگەلى اڭگىمە ايتىپ، ءوز تاجىربيەسىمەن بولىسەدى»، - دەدى سىرىمبەك تاۋ.

G-38 ستۋدەنتتەر قوزعالىسىنىڭ نەگىزىن قالاۋشى ايسۇلۋ ەرنيازوۆا ستۋدەنتتەر بۇل اكسيا جايلى الەۋمەتتىك جەلىدەن وقىپ، ونى قۋانا قولداعانىن جەتكىزدى.

«قالاداعى ونعا جۋىق ۋنيۆەرسيتەتتىڭ ستۋدەنتەرى دە بۇل اكسياعا قولداۋ كورسەتتى. ويتكەنى پاندەميا كوپشىلىگىمىزگە تەرىس اسەر ەتكەنى بەلگىلى، مۇنداي كوڭىلدى شارالار اسىرەسە جاستار ءۇشىن قاجەت. قازىرگى 3- كۋرستا وقىپ جۇرگەندەردىڭ ستۋدەنتتىك ءومىرى پاندەميا باستالعان كەزدە، ياعني 1-كۋرستىڭ ءبىرىنشى سەمەستىرىنەن كەيىن توقتاپ قالدى. ال، 1-2 كۋرستا وقيتىندار تىپتەن ستۋدەنتتىك ءومىردى سەزىنگەن جوق. سوندىقتان قازىر قالاداعى ستۋدەنتتەردىڭ باسىن قوساتىن مۇنداي شارالارعا دەگەن سۇرانىس وتە جوعارى. جوعارى بۋىن ءارى بيزنەس قاۋىمداستىق وسىنداي شارانى وتكىزۋدى قولعا العاندىقتان ونى ستۋدەنتتەر قۋانا قارسى الىپ وتىر»، - دەدى ايسۇلۋ ەرنيازوۆا.

ءوز كەزەگىندە شىعارماشىل جاستاردىڭ وكىلى وڭداسىن قۇلىمبەت اۋقىمدى اكسيا ستۋدەنتتەردىڭ ءبىر- بىرىمەن ءتىل تابىسىپ، تاجىريبە الماسۋعا مۇمكىندىك بەرەتىنىن اتاپ ءوتتى. بەلگىلى كاسىپقوي بوكسشى جانقوش تۇراروۆ تا قولداۋ كورسەتىپ، قازاقستان حالقىن بىرلىككە، قوعامدىق ومىرگە بەلسەنە ارالاسۋعا شاقىردى.