پارلامەنت قاۋىپتى قالدىقتارعا قاتىستى زاڭدى قابىلدادى
10 ناۋرىز 11:26

پارلامەنت قاۋىپتى قالدىقتارعا قاتىستى زاڭدى قابىلدادى

نۇر-سۇلتان. قازاقپارات - سەناتتىڭ جالپى وتىرىسىندا «ەۋرازيالىق ەكونوميكالىق وداقتىڭ كەدەندىك اۋماعى ارقىلى قاۋىپتى قالدىقتاردى ترانسشەكارالىق وتكىزۋ تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.

كەلىسىم 2014 -جىلعى 29-مامىرداعى ەۋرازيالىق ەكونوميكالىق وداق تۋرالى شارت اياسىندا جاسالعان حالىقارالىق شارت بولىپ سانالادى. ەۋرازيالىق ەكونوميكالىق وداق تۋرالى شارت وسى ە ا ە و- عا مۇشە مەملەكەتتەردىڭ ءۇشىنشى ەلدەرمەن ساۋدا- ساتتىقتا تاريفتىك ەمەس رەتتەۋدىڭ ءبىرىڭعاي شارالارىن قولدانۋىن كوزدەيدى.

«قازاقستاندا قاۋىپتى قالدىقتاردى اكەلۋ، اكەتۋ جانە ترانزيتىن زاڭنامالىق رەتتەۋ بازەل كونۆەنتسياسى جانە ەكولوگيالىق كودەكس نورمالارىمەن جۇزەگە اسىرىلادى. ەۋرازيالىق ەكونوميكالىق وداققا كىرمەيتىن ەلدەرگە قاتىستى ليتسەنزيالىق ءتارتىپ قولدانىلادى. ليتسەنزيا بەرۋدى مينيسترلىك 2019 -جىلدان باستاپ، ياعني ول قۇرىلعاننان باستاپ جۇزەگە اسىرادى»، - دەدى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ.

سونىمەن قاتار ول جەكە تۇلعالاردىڭ جەكە پايدالانۋى ءۇشىن قالدىقتاردى ترانسشەكارالىق وتكىزۋىنە تىيىم سالىناتىنىن اتاپ ءوتتى.

«كەلىسىم تالاپتارىن ساقتاۋ ەۋرازيالىق ەكونوميكالىق وداققا مۇشە مەملەكەتتەر اراسىندا قاۋىپتى قالدىقتاردى وتكىزۋدىڭ ءبىرىڭعاي ءتارتىبىن بەلگىلەۋگە مۇمكىندىك بەرەدى، سونداي-اق قاۋىپتى قالدىقتاردى ەكولوگيالىق نەگىزدەلگەن تۇردە جويۋعا جانە قايتا وڭدەۋگە، قورشاعان ورتانىڭ لاستانۋىن بولعىزباۋعا الىپ كەلەدى»، - دەدى مينيستر.

وسىلايشا، تاراپتار وسى كەلىسىمگە جانە تاراپتار مەملەكەتتەرىنىڭ زاڭناماسىنا سايكەس، قالدىقتاردىڭ ترانسشەكارالىق ورنىنىڭ اۋىستىرىلۋىن باقىلاۋدى جانە قاداعالاۋدى جۇزەگە اسىراتىن بولادى. تاراپتار قالدىقتاردى كومۋ جانە زالالسىزداندىرۋ ماقساتىندا ولاردى ترانسشەكارالىق تاسىمالداۋىنا جول بەرمەيدى.

جاڭالىقتار