قازاقستان ازاماتتارى ۋكراينادان پولشا شەكاراسىنا قالاي امان جەتكەنىن ايتتى

نۇر-سۇلتان. قازاقپارات - ۋكرايناداعى جاعداي ۋشىققان كەزدە كيەۆ پەن ودەسسا قالالارىندا بولعان قازاقستان ازاماتتارى پولشا شەكاراسىنا قالاي جەتكەنىن ايتتى، دەپ حابارلايدى قازاقپارات ءتىلشىسى.

«مەنىڭ اتىم - رۋسلان. پەتروپاۆل قالاسىنىڭ تۇرعىنىمىن. قازىر پولشاداعى كاتوۆيتسە اۋەجايىنىڭ ماڭايىندامىز. بۇل جەرگە كەشە كەشكە جەتتىك.

21 -اقپاندا جىل سايىن كيەۆتە وتەتىن كونفەرەنتسياعا ۇشىپ كەلگەنبىز. كيەۆتە سوعىس جاعدايى جاريالانىپ، كونفەرەنتسيا جۇمىسىن توقتاتتى. اۋەلدە نە ىستەۋ كەرەگىن بىلمەدىك. احۋال تۇراقتانعانشا كيەۆتە قالا تۇرۋ كەرەك دەپ ويلاعانبىز. كەيىن لۆوۆ ارقىلى كەرى قايتۋعا ارەكەتتەندىك. ويتكەنى كيەۆتەگى قازاقستان ەلشىلىگى لۆوۆ ارقىلى باتىس شەكارامەن پولشا جاعىنا وتۋگە بولاتىنى تۋرالى مالىمەت تاراتقان ەدى»، - دەپ ەسكە الادى ۆيدەوداعى ازامات.

پولشا ەۋروپالىق وداقتىڭ مۇشەسى بولعاندىقتان، ەل اۋماعىنا كىرۋ ءۇشىن ءتولقۇجاتتا شەنگەن ۆيزاسى بولۋى مىندەتتى ەدى. بۇل ماسەلەنى قازاقستاننىڭ پولشاداعى ەلشىلىگى جىلدام رەتتەگەنگە ۇقسايدى.

«پولشا قازاقستان ازاماتتارىنا «جاسىل ءدالىز» ۇسىندى. قازاقستاننان كيەۆتەگى كونفەرەنتسياعا كەلگەن 15 ادام توپ- توپپەن كيەۆ قالاسىنان شىعا باستادى. ءبىزدىڭ توپتاعى 5 ادام ورتالىق تەمىرجول ۆوكزالىنان شىقتىق. بيلەت جوق ەكەن، جولسەرىكتەرمەن كەلىسۋگە تۋرا كەلدى. كەلەسى كۇننىڭ تاڭىندا لۆوۆ قالاسىنا جەتتىك. قازاقستاننىڭ ۋكراينا مەن پولشاداعى ەلشىلىك قىزمەتكەرلەرىنە ۋاقىتىندا جەدەل اقپارات بەرىپ، ءجون سىلتەپ وتىرعانى ءۇشىن العىس ايتقىمىز كەلەدى. لۆوۆتا ءبىزدى كۇتىپ الىپ، شەكارادان پولشا اۋماعىنا الىپ ءوتۋ جۇمىسىن ۇيىمداستىردى. پولشادا بىزگە «جاسىل ءدالىز» بەرىلدى. ويتكەنى ءبىزدىڭ ءتولقۇجاتىمىزدا شەنگەن ۆيزاسى جوق ەدى. وسى جۇمىستىڭ ءبارى جىلدام، جەدەل، ناقتى ىستەلدى. ءبىزدى پولشادا ق ر كونسۋلى كۇتىپ الىپ، كولىگىمەن جول باستاپ وتىرىپ، اۋەجايدىڭ جانىنداعى قوناقۇيگە اكەلدى»، - دەيدى رۋسلان.

پولشانىڭ كاتوۆيتسە قالاسىنا بۇگىن ۇشىپ شىققان ۇشاقتى كۇتىپ وتىرعانداردىڭ ءبىرى - سمايىل ابيبۋللا.

«سوڭعى جارتى جىلدا ۋكراينانىڭ ودەسسا قالاسىندا جۇمىس بابىمەن تۇرىپ جاتقانمىن. وسى ۋكرايناداعى سوڭعى وقيعالارعا بايلانىستى ەلدەن شىعۋعا ءماجبۇر بولدىق. وقيعالار باستالعان كەزدە وتباسىمىزبەن الاڭداپ، ۋكراينادان شىعۋدىڭ جولدارىن ىزدەدىك. ەلشىلىكتەگى شۇعىل جەلىلەر ارقىلى لۆوۆ قالاسىنا كەلۋ كەرەكتىگىن بىلدىك. سول جەردە جيناپ، پولشا ارقىلى قازاقستانعا قايتارماقشى ەكەن. امالىن تاۋىپ، لۆوۆ قالاسىنا امان جەتتىك. ول قالادان بىزگە اۆتوبۋس ۇيىمداستىرىلدى. سول اۆتوبۋسپەن پولشا شەكاراسىنا جەتتىك. پولشا شەكاراسىنان ءوتۋ دە وڭاي بولعان جوق. شەكاراعا 10 شاقىرىمداي قالعاندا كەپتەلىس باستالدى. ءبىراق ەلشىلىكتىڭ ارقاسىندا پوليتسيا قىزمەتكەرلەرى كومەك بەرىپ، قارسى جولاقپەن شەكاراعا كەدەرگىسىز جەتىپ الدىق. شەكارادا عانا ءسال ايالدادىق. شەكارادان وتكەن سوڭ ءبىزدى پولشاداعى ەلشىلىكتىڭ قىزمەتكەرلەرى، سول جەردەگى قۇرمەتتى كونسۋلدىڭ ءوزى قارسى الدى. پولشاعا كىرۋىمىزدى دە، ۆيزا ماسەلەسىن دە شەشىپ بەردى. ەشقانداي قيىندىق تۋىنداعان جوق»، - دەيدى ول.

قازاقستان ازاماتى ۋكراينا مەن پولشاداعى ەلشىلىك قىزمەتكەرلەرىنە العىس ايتىپ وتىر.

«ءارى قاراي ءبىزدى كاتوۆيتسە قالاسىنداعى وتەلگە ورنالاستىردى. جاعدايىمىزدى جاساپ جاتىر. پولشاداعى ەلشىلىك بولسىن، ۋكرايناداعى ەلشىلىك بولسىن، قولدان كەلگەنىن ىستەپ جاتىر. قىزمەتكەرلەرىنە العىسىمىز شەكسىز. قيىن كەزەڭدە قازاقستان ازاماتتارىنا ءتۇن ۇيقىسىن ءتورت ءبولىپ قىزمەت ەتىپ جاتقان سياقتى. قازىر ەلدەن كەلەتىن ۇشاقتى كۇتىپ وتىرمىز. ۇشاقپەن بىرگە ۋكراينادان قازاقستان ازاماتتارىن اكەلەتىن تاعى 2-3 اۆتوبۋستى كۇتىپ وتىرمىز. سولار كەلگەن بويدا، بۇيىرتسا، ءبارىمىز ەلگە ۇشامىز»، - دەيدى سمايىل ابيبۋللا.