ديماش داۋلەتوۆ «ۋكراينا داۋىسى» بايقاۋىندا ءتورت تالىمگەردى دە وزىنە قاراتتى
27 جاستاعى دىنمۇحامەد داۋلەتوۆ - قوستاناي وبلىسى، رۋدنىي قالاسىنىڭ تۋماسى. قازىر الماتى قالاسىندا تۇرادى. ايتۋىنشا، وتباسىندا جالعىز بالا. 6 جاسىنان باستاپ ءان ايتادى.
«مەن ءان ايتقاندى بۇرىننان جاقسى كورەم. وتباسىندا اتام مەن اكەم دە ءان ايتادى. بالا كەزىمنەن ءوزىم ءۇشىن، شاعىن ورتادا تۋىستارىم ءۇشىن ءان سالاتىنمىن. مەكتەپتەن كەيىن «ەكسكاۆاتور مەن بۋلدوزەردىڭ ءماشينيسى» ماماندىعى بويىنشا تەحنيكالىق كوللەدجگە وقۋعا ءتۇستىم.
ەكسكاۆاتورشى بولىپ 4 جىل ىستەدىم. سونىمەن قاتار، كوپتەگەن بايقاۋلارعا قاتىستىم، كەيىن ءانشى بولۋعا دەگەن ىنتا- ىقىلاسىم پايدا بولدى. ۋاقىت وتە كەلە قالالىق شارالاردا ونەر كورسەتە باستادىم. كەيىن جانىما نە جاقىن دەپ ويلاي باستادىم. «X- Factor Kazakhstan»، «قازاقستان داۋىسى»، «i 'am a singer» ءان بايقاۋلارىنا قاتىستىم. وسىلايشا تاجىريبە جيناقتاي باستادىم. 2017 -جىلى «قازاقستان داۋىسىنىڭ» فينالدىق شوۋىنىڭ جەڭىمپازى اتاندىم»، - دەدى دىنمۇحامەد داۋلەتوۆ.
«قازاقستان داۋىسى» شوۋىندا جەڭىسكە جەتكەن سوڭ ديماش داۋلەتوۆ ت. جۇرگەنوۆ اتىنداعى قازاق ونەر اكادەمياسىنا «ەسترادالىق ۆوكال» بويىنشا وقۋعا تۇسەدى. مۇندا 4 جىل وقىپ، ءبىلىم الدى. «ونەر اكادەمياسىن بىلتىر ءبىتىردىم. بيىل شەتەلدە وتەتىن اۋقىمدى بايقاۋعا، اتاپ ايتقاندا، «ۋكراينا داۋىسى» شوۋىنا قاتىسقىم كەلدى. مەن بۇل شوۋدى بىرنەشە جىل بويى قاراپ، ءوزىمدى وسى ساحنادا ەلەستەتەتىنمىن. مەن قاتتى دايىندالدىم»، - دەدى جاس ءانشى.
«ۋكراينا داۋىسى» شوۋىنىڭ تىڭدالىمىندا ءتورت تالىمگەر دە ديماش داۋلەتوۆكە بۇرىلدى.
«مەن ۋكراينالىق ءانشى وليا پولياكوۆانى تاڭدادىم. سەبەبى، ول ماعان ەڭ ءبىرىنشى بولىپ بۇرىلدى. مەن تالىمگەرلەردىڭ رەاكسيالارىنا كوبىرەك نازار اۋداردىم. ماعان وليانىڭ ەموتسيالارى مەن رەاكسياسى ۇنادى. سوندىقتان كوپ ويلانباي مەن ونىڭ كومانداسىنا بارۋدى شەشتىم»، - دەدى ول.
ديماشتىڭ ومىرلىك قاعيداسى - ارمانداۋ، ماقسات قويۋ جانە وعان قالاي بولسا دا جەتۋ. ول BRuno Mars, The Weekend, موناتيكا، الەكسەي چۋماكوۆتى تىڭداعاندى ۇناتادى. بولاشاقتا ءوزىنىڭ ترەكتەرىن جازىپ، البومدارىن شىعارىپ، بۇكىل قازاقستاندى گاسترولدىك ساپارمەن ارالاۋدى جوسپارلاپ وتىر.