ىلە وڭىرىندەگى قىسقى تۋريزم ناسيحاتتالۋدا - شەتەلدەگى قازاق ءتىلدى باسپا سوزگە شولۋ

None
None
نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ىلە وڭىرىندە قىسقى تۋريزىمدى ناسيحاتتاۋعا ارنالعان ءىس-شارا ءوتتى - «ىلە اقپارات» پورتالى

ىلە قازاق اۆتونوميالى وبلىسىنىڭ تەكەس اۋدانىنداعى قاراجون، اقتاس سەكىلدى تۋريستىك ايماقتارىندا وڭىردەگى قىسقى تۋريزىمدى ناسيحاتتاۋعا ارنالعان ەرەكشە ءىس-شارا ءوتتى، - دەپ جازادى «ىلە اقپارات» پورتالى.

اتالعان ب ا ق- تىڭ جازۋىنشا، مەرەكەلىك ءىس-شارادا تۋريستىك نىساندار كەلۋشىلەرگە ءارتۇرلى قازىرگى زامانعى قاردا جۇرگىش كولىكتەر مەن شاڭعى، شانا، شانا-باللون سەكىلدى قاردا سىرعانايتىن سپورتتىق قۇرال-جابدىقتاردى ۇسىنعان.


ساياحاتشىلار وسى ءىس-شارادا قىسقى سپورتتتىق ويىندارعا قىزىعا قاتىناسىپ، ەرەكشە اسەرگە بولەنگەن. سونىمەن بىرگە قارلى دالادا ساماۋىرىن قايناتىپ، ىستىق سورپا ءىشىپ، تابيعات اياسىندا تاماقتانىپ، قاقاعان سۋىق پەن مازداعان وتتىڭ وزگەشە اسەرىن سەزىنگەن.

سونداي-اق، قىستىڭ قىراۋلى كۇنىندە ات بايگەسى، قىزقۋار، كوكپار، تەڭگە ءىلۋ سەكىلدى قازاق حالقىنىڭ ۇلتتىق ات ويىندارى دا ءوز ەرەكشەلىگىمەن ۇيىمداستىرىلعان.


وسى ۇلتتىق ونەر قازىرگى كۇنى جەرگىلىكتى جەردىڭ ءتۇرلى مەرەكەلىك ءىس-شارالارىندا كوپشىلىككە كورسەتىلىپ، اسىرەسە سىرتتان كەلەتىن تۋريستەردىڭ قىزىعا تاماشالايتىن دۇنيەسىنە اينالعان.

سونىمەن بىرگە اتالعان ب ا ق قازاقتار مەكەن ەتكەن وسى قاراجون، اقتاس سەكىلدى جايلاۋلاردىڭ قىسقى اسەم تابيعاتى مەن وسىندا وتكەن ەرەكشە تۋريستىك ءىس-شارانىڭ عاجايىپ كوركەم كورىنىستەرىنەن فوتورەپورتاج ۇسىنعان.

مەكتەپ كىتاپحاناسى قازاق بالالار ادەبيەتىنىڭ انتولوگياسىمەن تولىقتى - «ءو ز ا» اقپاراتتىق اگەنتتىگى

وزبەكستان رەسپۋبليكاسىنداعى قازاقستان رەسپۋبليكاسىنىڭ ەلشىلىگى تاشكەنت وبلىسىنداعى 2№ مەكتەپكە «قازاق بالالار ادەبيەتىنىڭ انتولوگياسى» اتتى 10 تومدىق كىتاپ سىيلادى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«اقىن، قازاقستان جازۋشىلار وداعىنىڭ مۇشەسى بايبوتا قوشىم- نوعاي قۇراستىرعان «قازاق بالالار ادەبيەتىنىڭ انتولوگياسى» اتتى ون تومدىق جيناق «قۋىر-قۋىر، قۋىرماش» ، «اعايىنبىز ءبارىمىز»، «بەيبىت كۇن»، «عاجايىپ قۇمىرا»، «بالاپان»، «التىن كيىك»، «ورتانشى ۇل»، «الاتاۋ ەرتەگىسى»، «قارلىعاشتىڭ ۇياسى»، «مىناۋ عازيز دۇنيە» اتتى ون كىتاپتان تۇرادى.

توپتامادا قازاقتىڭ كورنەكتى جازۋشىسى، اعارتۋشى ىبىراي التىنسارين، احمەت بايتۇرسىن ۇلىنان باستاپ ورتا بۋىن جانە جاڭا تولقىن جازۋشى، اقىنداردىڭ شىعارمالارىمەن قوسا اۋىز ادەبيەتى، تاقپاقتار، ساناماقتار، جۇمباقتار، جاڭىلتپاشتار، اڭگىمەلەر، مىسالدار، ەرتەگىلەر، حيكاياتتار سىندى ءار الۋان جانرداعى تۋىندىلارى ەنگەن.

تۇڭعىش رەت جارىق كورگەن قازاق بالالار ادەبيەتىندەگى وسىناۋ انتولوگيا اقپاننىڭ 8- جۇلدىزى كۇنى تاشكەنت وبلىسى جوعارى شىرشىق اۋدانىنداعى 2-مەكتەپتە تانىستىرىلىمى ءوتتى.

بۇگىنگى تاڭدا اۋدانداعى مەكتەپتەر اراسىندا جانە رەسپۋبليكالىق سايىستاردا ءبىلىم، سپورت، ونەر مەن ءتۇرلى باعىتتردا وزىندىك ەرەكشەلىگىمەن كوزايىم بولعان ءبىلىم وشاعىنىڭ كىتاپحاناسى وسىنداي قىمباتتى قازىنامەن تولىعىپ وتىر»، - دەپ جازادى «ءو ز ا» اقپارات اگەنتتىگى.

ەردوعان اقساقالدار كەڭەسى دەلەگاتسياسىن قابىلدادى - TRT

پرەزيدەنت رەجەپ تايىپ ەردوعان تۇركى مەملەكەتتەرى ۇيىمى اقساقالدار كەڭەسى دەلەگاتسياسىن قابىلدادى، دەپ حابارلايدى تۇركيا راديو تەلەۆيزيا پورتالى.

«ىستامبۇلداعى ۆاحدەتتين سارايىنداعى قابىلداۋدا تۇركى مەملەكەتتەرى ۇيىمىنىڭ اقساقالدار كەڭەسى ءتوراعاسى بينالي يىلدىرىم، پرەزيدەنتتىك اپپاراتتىڭ كوممۋنيكاتسيا باسقارماسى فاحرەتتين التۋن، پرەزيدەنتتىك اپپاراتتىڭ باسپا ءسوز حاتشىسى يبراحيم كالىن جانە پرەزيدەنتتىڭ حاتشى حاسان دوعان قاتىستى. تۇركى مەملەكەتتەرى ۇيىمىنىڭ اقساقالدار كەڭەسىنە مۇشە ەلدەر قاتارىندا تۇركيا، ازەربايجان، قازاقستان، وزبەكستان جانە قىرعىزستان ەلدەرى بار. تۇركىمەنستان مەن ۆەنگريا كەڭەستە باقىلاۋشى ەل بولىپ قابىلدانعان»، - دەپ جازادى TRT.

ايتا كەتەيىك، تۇركى مەملەكەتتەرى ۇيىمىنىڭ اقساقالدار كەڭەسىنىڭ جاڭارتىلعان قۇرامىنداعى ءۇش كۇندىك وتىرىسىنا قازاقستان رەسپۋبليكاسىنىڭ وكىلى يكرام ادىربەكوۆ قاتىستى. كەزدەسۋ 2021-جىلعى 11- قاراشادا تۇركىتىلدەس مەملەكەتتەردىڭ ىنتىماقتاستىق كەڭەسىنىڭ سىرتقى ىستەر مينيسترلەرى كەڭەسىندە قابىلدانعان اقساقالدار كەڭەسىنىڭ جاڭا ەرەجەلەرىنە سايكەس العاش رەت وتكىزىلىپ وتىر.

اقساقالدار كەڭەسىنىڭ كەزەكتى وتىرىسىن 2022-جىلدىڭ شىلدە ايىندا قىرعىزستاندا وتكىزۋ جوسپارلانۋدا.

قازاقستان استاناسىندا يران تۋى مەن ەلتاڭباسى كورسەتىلدى - فارس

«يسلام ريەۆوليۋتسياسىنىڭ جەڭىسى كۇنىنە وراي قازاقستان استاناسىنداعى «ەكسپو» حالىقارالىق كورمەسىنىڭ مۇراسىنا اينالعان «نۇر الەم» پاۆيلونىنىڭ ۇستىندە ي ي ر تۋى مەن ەلتاڭباسى پارسى جانە قازاق تىلدەرىندەگى قۇتتىقتاۋ ماتىنىمەن بىرگە جارىقتاندىرىلدى»، - دەپ جازادى يراننىڭ Parstoday اقپارات اگەنتتىگى.

اۆتور: باقىتجول كاكەش

سوڭعى جاڭالىقتار