قولدانىستاعى زاڭنامالىق اكتىلەرگە وزگەرىستەر قاجەت -  ابزال قۇسپان
11 اقپان 14:09

قولدانىستاعى زاڭنامالىق اكتىلەرگە وزگەرىستەر قاجەت -  ابزال قۇسپان

نۇر-سۇلتان. قازاقپارات - قولدانىستاعى زاڭنامالىق اكتىلەرگە وزگەرىستەر قاجەت.

بۇل تۋرالى «امانات» كوميسسياسىنىڭ ءتوراعاسى ابزال قۇسپان ءمالىم ەتتى، دەپ حابارلايدى قازاقپارات ءتىلشىسى.

«جۇمىسىمىز بارىسىندا قولدانىستاعى زاڭنامالىق اكتىلەرگە وزگەرىستەر قاجەت ەتەتىنىن دە تۇسىندىك. سول سەبەپتى الداعى اپتادا پارلامەنت دەپۋتاتتارىمەن دە كەزدەسۋدى جوسپارلاپ وتىرمىز. ياعني، ءبىز جەكەلەگەن ادامداردى قورعاپ، ولارعا قولدانىلعان باستى بۇلتارتپاۋ شاراسىن وزگەرتۋ جۇمىستارىنان جۇيەلى جۇمىستارعا كوشۋ باعىتىنا ىڭعايلانىپ وتىرمىز»، - دەدى ابزال قۇسپان ب ا ق وكىلدەرىنە ارنالعان بريفينگ بارىسىندا.

ونىڭ اتاپ وتۋىنشە، كوميسسيا مۇشەلەرى كەشە مەملەكەتتىك حاتشى ەرلان قارينمەن كەزدەسۋ بارىسىندا زاڭنامالىق اكتىلەرگە وزگەرىستەر ەنگىزۋ تۋرالى ۇسىنىستارىن جەتكىزگەن.

«ول ءوز تاراپىنان قاراستىرىپ جاتىر. بۇل جۇمىستى پارلامەنت دەپۋتاتتارىمەن تالقىلاۋعا ۇسىندى. الداعى اپتادا وسى جۇمىستاردى اتقارماقپىز. كوميسسيانىڭ جۇمىسى مۇنىمەن اياقتالدى دەگەندى بىلدىرمەيدى. ءالى دە اتقاراتىن جۇمىس كوپ. كوپتەگەن ساراپتامالىق ماتەريالدار دايىندادىق. باس پروكۋراتۋرا مەن پرەزيدەنت اكىمشىلىگىنە جولدادىق. وسى باعىتتا جۇمىسىمىزدى جالعاستىرا بەرەمىز»، - دەدى كوميسسيا ءتوراعاسى.


اۆتور: مارلان جيەمباي

سونداي-اق... وقىڭىز

جاڭالىقتار