پارلامەنت ەلباسى تۋرالى زاڭعا تۇزەتۋدى قابىلدادى
2 اقپان 12:40

پارلامەنت ەلباسى تۋرالى زاڭعا تۇزەتۋدى قابىلدادى

نۇر-سۇلتان. قازاقپارات - ءماجىلىستىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋتسيالىق زاڭ جوباسىنا سەنات ەنگىزگەن وزگەرىسپەن كەلىستى، دەپ حابارلايدى قازاقپارات ءتىلشىسى.

«بۇل كونستيتۋتسيالىق زاڭ جوباسى ق ر ۇكىمەتىنىڭ 2021 -جىلعى 23-جەلتوقسانىنداعى قاۋلىسىنا سايكەس، پارلامەنت ماجىلىسىنە ەنگىزىلدى. زاڭ جوباسىن بيىلعى 19-قاڭتاردا ءماجىلىس ماقۇلداپ، قابىلدانعان ەكى پوزيتسيامەن سەناتقا جىبەردى. سەنات بۇل تۇزەتۋلەردى ءبىراۋىزدان قابىلدادى. الايدا زاڭ جوباسىن پارلامەنت سەناتىندا قاراۋ بارىسىندا تاعى ءبىر قوسىمشا تۇزەتۋ ەنگىزىلدى. اتاپ ايتقاندا، سەنات مەملەكەتتىڭ ىشكى جانە سىرتقى ساياساتىنىڭ نەگىزگى باعىتتارى بويىنشا ازىرلەنەتىن باستامالار ق ر تۇڭعىش پرەزيدەنتى- ەلباسىمەن كەلىسۋدى كوزدەيتىن «قازاقستان رەسپۋبليكاسىنىڭ تۇڭعىش پرەزيدەنتى- ەلباسى تۋرالى» كونستيتۋتسيالىق زاڭنىڭ 1-بابى 6-بولىگىن الىپ تاستاۋدى ۇسىندى.

قورىتا كەلگەندە، «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋتسيالىق زاڭ جوباسىنا سەناتى ەنگىزگەن وزگەرىسپەن كەلىسۋدى سۇرايمىن»، - دەدى ءماجىلىستىڭ زاڭناما جانە سوت- قۇقىقتىق رەفورما كوميتەتىنىڭ ءتوراعاسى ارمان قوجاحمەتوۆ.

قۇجاتتى قاراۋ كەزىندە ءماجىلىس دەپۋتاتتارى بۇل ۇسىنىسقا قولداۋ ءبىلدىردى. بۇدان بۇرىن حابارلانعانداي، جاقىندا دەپۋتاتتار «قاۋىپسىزدىك كەڭەسى تۋرالى» جانە «قازاقستان حالقى اسسامبلەياسى تۋرالى» زاڭدارعا بۇرىن ۇسىنىلعان وزگەرىستەر مەن تولىقتىرۋلاردى تالقىلادى. تۇزەتۋلەردە ەلباسىنىڭ قاۋىپسىزدىك كەڭەسىندە جانە قازاقستان حالقى اسسامبلەياسىنا ءومىر بويى ءتوراعالىق ەتۋ قۇقىعىنىڭ كۇشىن جويۋ كوزدەلگەن. جوعارعى پالاتا دەپۋتاتتارى ماجىلىسمەندەردىڭ بۇرىن ايتىلعان بارلىق وزگەرىستەرىن ماقۇلدادى.

سونىمەن قاتار قۇجاتتى تالقىلاۋ بارىسىندا سەناتتا ءبىر نورما ەنگىزىلدى. ول - «تۇڭعىش پرەزيدەنت تۋرالى» زاڭنان مەملەكەتتىڭ ىشكى جانە سىرتقى ساياساتىنا بايلانىستى باستامالاردى ەلباسىمەن كەلىسىلۋگە ءتيىس دەگەن نورما الىپ تاستالىپ وتىر. سوندىقتان دا 27-قاڭتاردا سەنات زاڭناماعا ەنگىزىلگەن وزگەرىستەردى تۇجىرىمدامالى تۇردە قولداپ، ءبىر وزگەرىسپەنەن ماجىلىسكە قايتارعان ەدى.

اۆتور: رۋسلان عابباسوۆ

جاڭالىقتار