قاجىمۇقانعا تاتار قىزى تارتۋ ەتكەن سۇلگى تەمىرلاندا ساقتاۋلى تۇر

تۇركىستان. قازاقپارات - كۇش اتاسى قاجىمۇقانعا تاتار قىزىنىڭ تارتۋ ەتكەن سۇلگىسى تۇركىستان وبلىسىنىڭ تەمىرلان اۋىلىندا ساقتاۋلى تۇر.

پالۋانعا عاشىق بولعان بويجەتكەن كەستە تىگىپ، ۇلكەن ماتاعا سۋرەتىن سالعان ەكەن. قانشاما جىلدار بويى ساقتالىپ كەلگەن سۇلگى بۇگىندە تۇتىگىپ، جىپتەرى سوگىلە باستاعان. سوندىقتان اعايىندار اقىلداسا كەلە قۇندى جادىگەردىڭ مۇراجايدا ساقتالعانىن ءجون دەپ تاپقان، دەپ حابارلايدى قازاقپارات.

قاجىمۇقان مۇڭايتپاس ۇلى ءومىرىنىڭ سوڭعى كەزدەرىن ورداباسى اۋدانىنداعى تەمىرلان اۋىلىندا وتكىزگەن. قاراشاڭىراق ءۇيى دە سوندا ورنالاسقان. دەگەنمەن ىرگەتاسى جوق ءۇي كوپتەگەن جىلداردان سوڭ قۇلاۋعا اينالعاندىقتان، تۋىستارى بۇزىپ، جاڭادان سالىپتى. قازىر مۇندا پالۋاننىڭ شوبەرەسى قۋانىشبەك ەسكەرمەسوۆ وتباسىمەن تۇرىپ جاتىر.

«اتامىز ۇلى جىبەك جولىنداعى 5 وزەننىڭ ساعاسىندا ورنالاسقان تەمىرلان اۋىلىنا قونىستانۋدى ءجون كورىپتى. سودان شاۋىلدىردەن وسىندا كوشىپ كەلگەن. ءۇيدى 46 -جىلدارى اسارلاتىپ سالعان. 60 جىلعا جۋىق وسىندا تۇردىق. 2005 -جىلدارى ارىق سۋى تاسىپ، اۋىلىمىزدى سۋ الدى. سول كەزدە ءبىزدىڭ ءۇي سۋ ورتاسىندا قالىپ كەتتى. تۇرۋعا جارامسىز بولدى. سودان بۇزىپ، جاڭا ءۇي سالدىق»، - دەيدى قۋانىشبەك ەسكەرمەسوۆ.

بۇگىندە ءۇي يەلەرى قاراشاڭىراقتىڭ ءبىر بولمەسىن مۇراجايعا اينالدىرعان. وندا قاجىمۇقان مۇڭايتپاس ۇلىنىڭ قولدانعان زاتتارى قويىلعان. ماسەلەن، سۋ ىشكەن وجاۋى، جاتقان كەرەۋەتى، ساندىعى، دارەت العان ىدىسى، وشاعى وسىندا تۇر. سونداي- اق، ەسىك الدىندا قاجىمۇقان قازدىرعان قۇدىق تا بار. ەسكى ۇيدەن شىققان تابالدىرىق پەن پولشادان الىپ كەلگەن چەمودانى دا ساقتالىپتى.

«ۇيىمىزگە كوپتەگەن قوناق كەلەدى. قاجىمۇقان اتامىزدىڭ قاراشاڭىراق ءۇيى دەپ ارنايى ىزدەپ كەلەتىندەر كوپ. ءتىپتى، اراسىندا شەتەلدىكتەر دە بار. كوپشىلىگى سپورتشىلار مەن تاريحشىلار جانە تۋريستەر. ولار جادىگەرلەر تۇرعان بولمەدە تۇنەگىلەرى كەلەدى. ىشىنە 2,5 ليتر سۋ سياتىن وجاۋىمەن قۇدىعىنان سۋ ءىشىپ، كەرەۋەتىنە جاتۋعا تالاسادى. ءاربىر زاتىن تەبەرىك كورىپ، سۇرايتىندار بار»، - دەيدى كەلىنى روزا تىنىشبەك قىزى.

پالۋان قولدانعان زاتتاردى تەبەرىك كورىپ، ءبىر- ەكى ادام الىپ تا كەتىپتى. تاماق جەگەن لەگەنى مەن تاعى ءبىر چەموداندى قوناق بولىپ كەلگەن جاندار قويماي سۇراپ العان. ءتىپتى كەيىن الىپ كەلىپ بەرەتىندىكتەرىن ايتىپ، ۋادە دە بەرگەن. دەگەنمەن، ءالى كۇنگە دەيىن قايتارماعان. سوندىقتان بولار، قۋانىشبەك ەسكەرمەسوۆ تۋىستاردان تابىلعان جادىگەرلەردى مۇراجايعا وتكىزگەن.

سونداي- اق، ۇزىندىعى 2 مەتر، ەنى 1,5 مەتر بولاتىن سۇلگىنى ۋفادا جۇرگەندە تاتار قىزى سىيعا تارتقان ەكەن. ماتاعا پالۋاننىڭ سۋرەتىن كەستە جىپپەن تىگىپ، كوركەمدەپ شىققان. ونى 150 جىلدىعىنا وراي بەرىلگەن استا رەسەيدە تۇراتىن تۋىسى باعيرا الىپ كەلىپ، قاراشاڭىراققا قويىپتى. كەيىننەن اعايىندار ءوزارا اقىلداسا كەلە قۇندى جادىگەردى دە مۇراجايعا تابىس ەكەن.

«اۋىلىمىزدا ق. مۇڭايتپاس ۇلى اتىنداعى وبلىستىق سپورت مۋزەيى بار. 2001 -جىلى اشىلعان مۇراجايدا دا كوپتەگەن جادىگەرلەر ساقتاۋلى تۇر. كوپشىلىگى ۇيدەن الىندى، تۋىستاردان جينالدى. وندا كەلگەن كوپشىلىك قوناقتار، پالۋاننىڭ قاراشاڭىراعىنا كىرىپ شىعۋدى دا قۇپ كورەدى. ءبىزدىڭ دە ەسىگىمىز ءاردايىم اشىق»، - دەيدى وتاعاسى قۋانىشبەك ەسكەرمەسوۆ.