قاڭتار وقيعاسى: زارداپ شەككەن كولىك يەلەرى قايدا حابارلاسۋى كەرەك
ازىرگە اكىمدىك زالالدىڭ ورنىن تولتىرۋ تەتىگىن پىسىقتاپ جاتىر. كولىك يەلەرى نە ىستەۋى كەرەك؟ بۇل ساۋالعا قازاقپارات ءتىلشىسى جاۋاپ ىزدەپ كوردى.
جاپپاي تارتىپسىزدىكتەن زارداپ شەككەندەردىڭ ءبىرى الماتى تۇرعىنى اگەنتتىك تىلشىسىنە باسىنان وتكەن وقيعانى ايتىپ بەردى. ونىڭ سوزىنشە، 6-قاڭتار كۇنى كەشكى ساعات التىلار شاماسىندا ول ءوز كولىگىمەن ۇيىنە كەلە جاتقان. جول بويى كولىگىنە بىرنەشە رەت وق تيگەن. ءوزىنىڭ امان قالعانىنا قۇدايعا شۇكىرشىلىك ەتەدى.
«سول كۇنى كەشكە كوشەدە ەشكىم بولعان جوق، ءبىراق الاڭ جاقتان اتىس دىبىستارى ەستىلىپ جاتتى. مەن تولە بي بويىمەن ساين كوشەسىنە بەت العان بولاتىنمىن، تولە بي مەن بايتۇرسىنوۆ كوشەسىنىڭ قيىلىسىنا جەتكەندە ورتەنىپ كەتكەن كولىكتەردى كوردىم. بۇل كوشەدە كەدەرگىلەر كوپ بولدى، سوندىقتان باعىتىمدى وزگەرتۋگە تۋرا كەلدى. بايتۇرسىنوۆ كوشەسىمەن جوعارى كوتەرىلىپ، قاراساي باتىر كوشەسىنە جاقىنداعاندا كولىگىمە وق اتىلدى. بۇرشاق جاۋعانداي بولدى. مەن ءجۇرىپ بارا جاتقان كولىكتەن سەكىرىپ كەتتىم. اسفالتقا قۇلادىم. سودان ورنىمنان اتىپ تۇرىپ كوپقاباتتى ۇيگە قاراي جۇگىردىم. كولىك 7-8 مەتر ءجۇرىپ، باعدارشامعا سوعىلدى. جاقىن ماڭداعى ءدامحانانىڭ ارتىنا بارىپ تىعىلدىم. سول كەزدە اياعىمنىڭ قاتتى اۋىرعانىن سەزدىم. ولار ماعان «توقتا» دەپ ايعايلادى. ولاردىڭ اسكەريلەر ەكەنىن سوندا عانا ءتۇسىندىم. مەنى بانديت دەپ ويلاپتى. قۇجاتتارىمدى تەكسەرىپ، بروندى جاۋىنگەرلىك ماشينامەن شىعارىپ سالدى. جەدەل جاردەم شاقىرىپ بەردى. اسكەريلەرگە شاعىمىم جوق. ولار ءوز جۇمىستارىن ىستەدى. قاراڭعى، ول كۇندەرى كوشەدە كىمنىڭ كىم ەكەنىن انىقتاۋ قيىن بولاتىن. ءبىر اجالدان امان قالعان مەن - وتە باقىتتىمىن»، - دەيدى ول.
قازىر زارداپ شەككەن الماتىلىق ءوزىن جاقسى سەزىنەدى.
«مەن كولىكتىڭ تەحنيكالىق جاعىن تۇزەتىپ قويدىم. كولىكتە وق تەسىگى كوپ. ءبىراق ءجۇرىپ تۇر. بولاشاقتا كولىگىمدى ساتاتىن بولسام، قيىندىقتار تۋىنداۋى مۇمكىن. ەندى مەن وسى ماسەلەمەن اينالىسقىم كەلەدى، «جەكە تۇلعالارعا كەلتىرىلگەن شىعىندى وتەۋ مۇمكىندىگى بار ما؟»، سونى بىلگىم كەلەدى»، - دەپ سۇرادى ول.
بەلگىلى بولعانداي، تارتىپسىزدىكتەر كەزىندە زارداپ شەككەن كولىك يەلەرىنە كەلتىرىلگەن شىعىندى وتەۋ ماسەلەسىمەن الماتى قالاسىنىڭ تىنىس- تىرشىلىگىن قالپىنا كەلتىرۋ جونىندەگى قالالىق شتاب اينالىسادى. الماتىلىق زاڭگەر دينارا تۇرديەۆانىڭ ايتۋىنشا، بۇگىنگى كۇنى زارداپ شەككەندەرگە وتەماقى تولەۋ باستالعان جوق. ويتكەنى وتەماقى تولەۋ ەرەجەلەرى ءالى ازىرلەنىپ جاتىر. ءوز كەزەگىندە زاڭگەر كولىك يەلەرىنە ءبىرقاتار ۇسىنىس بەردى.
«ەڭ الدىمەن كولىك يەسى كولىكتىڭ شىنىمەن زاقىمدالعانىن انىقتاۋ ءۇشىن پوليتسياعا ارىز بەرۋى كەرەك. سونىمەن قاتار، اۆتوكولىك ساقتاندىرىلعان ساقتاندىرۋ كومپانياسىنا تەرگەپ- تەكسەرۋدىڭ ءبىرىڭعاي تىزىلىمىنە تىركەلگەنىن راستايتىن تالوندى ۇسىنۋى ءتيىس. ساقتاندىرۋ تولەمىن وتەۋگە كەلەتىن بولساق، بۇل ماسەلە جاسالعان ساقتاندىرۋ شارتىنىڭ تۇرىنە قاراي جەكە قارالاتىن بولادى. جاپپاي تارتىپسىزدىكتەر كەزىندە مۇلكى بۇلىنگەن تۇلعالارعا كەلتىرىلگەن زالالدى وتەۋ تەتىگى ءالى دە ازىرلەۋ ساتىسىندا»، - دەپ ءتۇسىندىردى زاڭگەر.