كولىك ارزانداۋى مۇمكىن بە؟
بۇعان ءبىر جاعىنان ۋتيليزاتسيالىق الىم سەبەپ بولدى دەپ تە جاتىرمىز. بۇل الىمدى زاڭنامادان مۇلدە الىپ تاستاساق، كولىك باعاسى ارزانداۋى مۇمكىن بە؟ وسى ساۋالعا جاۋاپ ىزدەپ كورەيىك.
شىنداپ كەلگەندە، 2021-2022-جىلدارى كولىك باعاسىنىڭ بۇلاي كۇرت ءوسىپ كەتكەنىنە ناقتى سەبەپ جوق. الەم ەلدەرىندە كولىك پەن تەحنيكا باعالارىنىڭ كوتەرىلۋى قازاقستاننىڭ دا قالتاسىنا اسەر ەتكەنى تۇسىنىكتى.
بىرىنشىدەن، كولىك باعاسىنىڭ كوتەرىلۋىنە جاناما بولسا دا باستى سەبەپتىڭ ءبىرى - پاندەميا. كولىك ساتىلىمى قىزعان ۋاقىتتا الەمدىك اۆتوكونتسەرن كومپانيالاردىڭ كونۆەيەرلەرى توقتاپ قالدى. ءوندىرۋشى مەن ديلەر قويمالارىندا ەشتەڭە قالمادى. ءبارى ساتىلىپ كەتتى. سودان كولىك دەفيتسيتى پايدا بولدى.
ەكىنشى سەبەپ - ەلەكترونيكا قۇرالدارىنىڭ نارىقتا ازايىپ كەتۋى. اسىرەسە، چيپتى تابۋ قيىنعا سوقتى. اۆتووندىرۋشىلەردىڭ كەيبىرى ءتىپتى ەلەكترونيكاسىن ورناتپاي-اق زاۋىتتان شىعارىپ جاتتى. ال ونى ورناتقىڭىز كەلسە، تولەڭىز.
ءۇشىنشى سەبەپ - كولىككە دەگەن سۇرانىستىڭ كوبەيۋى. ⅩⅩ عاسىردا كولىك ءوندىرىسى الىپ نارىققا اينالدى. كولىككە دەگەن سۇرانىس جىلدا ارتىپ بارادى. ونىڭ ۇستىنە، جاڭا كولىكتەردىڭ تەحنولوگيالىق جاعى دا دامىپ بارا جاتقانى راس. ال جاڭا تەحنولوگيا باعاسىنىڭ وسۋىنە اكەلەدى.
ءتورتىنشى سەبەپ - ينفلياتسيا. تەڭگەنىڭ قۇنسىزدانۋى. 2021-جىلى تەڭگە 9 پايىزعا دەيىن قۇنسىزداندى. دەمەك، 3 ميلليون تەڭگە تۇراتىن كولىك ءبىر جىلدىڭ ىشىندە كەم دەگەندە 3,3 ميلليون تەڭگە بولدى دەگەن ءسوز.
ەگەر قازاقستاندا ۋتيل الىم توقتاتىلىپ، شەتەلدەن كولىك ەنگىزۋدىڭ وڭتايلى جولدارى زاڭدىق تۇرعىدان ماقۇلدانسا جانە ينفلياتسيا دەڭگەيى تومەندەسە، الەمدىك كولىك نارىعى تۇراقتالسا، وندا ەلدەگى تەمىر تۇلپاردىڭ باعاسى ءوز ارناسىنا ءتۇسۋى مۇمكىن.
ەڭ پەسسيميستىك كوزقاراسقا تۇراقتاساق، وندا قازاقستاندا كولىك قىمباتتاماي، قازىرگى ستاتيكالىق قالپىنا قالماق. ال وپتيميستىك كوزقاراسقا سەنسەك، وندا ەسكى كولىكتىڭ باعاسى 1 ميلليون تەڭگەگە دەيىن ارزانداۋى مۇمكىن. قالاي دەسەك تە، كەز كەلگەن جاعدايدا پەسسيميستىك باعالاۋعا يىق ارتقان ءجون.
massaget.kz