عالىمدار عارىشتان ەشتەڭەگە ۇقسامايتىن جۇمباق نىسان تاپتى
استرونومدار جەردەن نەبارى 4000 جارىق جىلى قاشىقتىقتا بۇرىن-سوڭدى عارىشتا كەزدەسپەگەن جۇمباق نىساندى تاپتى. ولاردىڭ پىكىرىنشە، بۇل نەيتروندىق جۇلدىز نەمەسە اسا قۋاتتى ماگنيت ءورىسى بار اق ەرگەجەيلى (تەرمويادرولىق ەنەرگيا كوزدەرىنەن ايىرىلعان، ەلەكتروندى-يادرولىق پلازمادان تۇراتىن جۇلدىزدار) بولۋى مۇمكىن.
العاشقى تابىلعاننان بەرى وقيعالاردى باقىلاعان استروفيزيك جانە توپ جەتەكشىسى ناتاشا حەرلي- ۋولكەردىڭ ايتۋىنشا، نىسان ءاربىر 18 مينۋت سايىن ەنەرگيا يمپۋلستارىن شىعارادى.
«راديوتولقىندى كارتاعا ءتۇسىرۋ توبى استرونومدار بۇرىن كورگەن ەشتەڭەگە ۇقسامايتىن، ساعاتىنا ءۇش رەت ۇلكەن ەنەرگيا بولەتىن ەرەكشە نارسەنى تاپت»، - دەپ جازدى بەيسەنبىدە حالىقارالىق راديواسترونوميانى زەرتتەۋ ورتالىعى (ICRAR) Twitter- دە.
بۇل جاڭالىق اۋستراليانىڭ باتىس شەتىندە ورنالاسقان Murchison Widefield Array دەپ اتالاتىن تومەن جيىلىكتى راديوتەلەسكوپتىڭ كومەگىمەن انىقتالدى، دەپ حابارلايدى Daily Mail.
حەرلي- ۋولكەر جاڭالىقتىڭ عىلىمي ورتادا ۇلكەن رەزونانس تۋدىرعانىن اتاپ ءوتتى.
«بۇل مۇلدەم كۇتپەگەن جاعداي بولدى. استرونومدار ءۇشىن بۇل ازداپ قورقىنىشتى، ويتكەنى اسپاندا وعان ۇقسايتىن ەشتەڭە جوق. بارلىعىن مۇقيات ەسەپتەسەڭىز، جۇلدىزدىڭ ءاربىر 20 مينۋت سايىن راديوتولقىنداردى شىعارۋعا جەتكىلىكتى ەنەرگياسى بولمايتىنىنا كوز جەتكىزەسىز. بۇل مۇمكىن ەمەس»، - دەدى ول.
كوماندا جەتەكشىسى بۇل باستاپقىدا بوتەن تىرشىلىك فورماسىنىڭ سيگنالى بولۋى مۇمكىن دەپ ويلاعانىن ايتتى.
«مەنى ولاردىڭ جاتپلانەتالىقتار ەكەنى الاڭداتتى. الايدا سيگنال ءارتۇرلى جيىلىكتە بايقالدى، ياعني بۇل جاساندى سيگنال ەمەس، تابيعي پروتسەسس»، - دەپ تۇيىندەدى ول.
توپتىڭ زەرتتەۋى اپتا سايىنعى Nature عىلىمي جۋرنالىندا جاريالاندى.
بۇعان دەيىن اۋستراليالىق پاركس وبسەرۆاتورياسى مۇنداي ەرەكشە سيگنالدى العاش رەت 2019-جىلى تىركەگەن بولاتىن. سيگنال ءبىر رەت پايدا بولىپ، جوعالىپ كەتكەن.
massaget.kz