ۇكىمەت جانىنان سۋ كەڭەسى قۇرىلادى

نۇر-سۇلتان. قازاقپارات - سۋ ماسەلەسى بويىنشا وتەتىن مەملەكەتارالىق كەلىسسوزدەردە قازاقستاننىڭ مۇددەسىن تاباندى قورعاۋعا نەگىزدەلگەن سۋ كەڭەسى قۇرىلادى.

ەكولوگيا، گەولوگيا جانە تابيعي رەسۋرستار مينيسترلىگى وسىنداي باستاما كوتەرىپ وتىر، حابارلايدى قازاقپارات ءتىلشىسى.

ۆيتسە-مينيستر سەرىك قوجانيازوۆ ورتالىق كوممۋنيكاتسيالار قىزمەتىندە وتكەن بريفينگىدە اتالمىش كەڭەستى ق ر پرەمەر-ءمينيسترى باسقاراتىنىن ءمالىم ەتتى.

ونىڭ ايتۋىنشا، ۆەدومستۆو سۋ رەسۋرستارى سالاسىنداعى احۋالدى جاقسارتۋ ءۇشىن بىرنەشە شارانى جوسپارلاپ وتىر.

«ءبىرىنشى، مەملەكەتارالىق ءوزارا قارىم-قاتىناستاردىڭ اسا ماڭىزدى ماسەلەلەرى بويىنشا شەشىمدەر ازىرلەۋ ءۇشىن كەلىسسوزدەر پروتسەستەرىندەگى قازاقستاننىڭ ۇستانىمىن كۇشەيتۋ ءۇشىن ق ر پرەمەر-ءمينيسترىنىڭ باسشىلىعىمەن سۋ كەڭەسى قۇرىلماقشى. بۇل كەڭەستىڭ نەگىزگى مىندەتى سىرتقى سۋ ساياساتىن ازىرلەۋ بارىسىندا ۇكىمەتتىڭ بارلىق قۇرامىنىڭ ءىس-قيمىلىن ۇيلەستىرۋ بولادى»، - دەدى ءمينيستردىڭ ورىنباسارى.

سونداي-اق، مينيسترلىك سۋ رەسۋرستارى كوميتەتى مەن ونىڭ باسسەيندىك ينسپەكتسيالارىن كۇشەيتۋگە جول اشپاقشى.

«سۋ رەسۋرستارىن باسقارۋدىڭ قولدانىستاعى جۇيەسى ءبىرىنشى كەزەكتە سۋ شارۋاشىلىعى قۇرىلىستارىن قايتا جاڭارتۋ جانە سالۋ جونىندەگى جوبالاردى ىسكە اسىرۋعا باعىتتالعان. سۋ رەسۋرستارىن ەسەپكە الۋ، سۋ ۇنەمدەۋ، تالداۋ جانە جاعدايدىڭ دامۋىن بولجاۋ سياقتى ماسەلەلەر ءتيىستى نازاردان تىس قالىپ كەلەدى. باسسەيندىك ينسپەكتسيالاردى سۋ رەسۋرستارىن مەملەكەتتىك باسقارۋدىڭ نەگىزى رەتىندە قاراۋ قاجەت»، - دەدى ول.

ايتۋىنشا، ينسپەكتورعا تۇسەتىن جۇكتەمە تىم اۋىر.

«بۇگىندە باسسەيندىك ينسپەكتسيانىڭ ءبىر قىزمەتكەرى 93 اۋىلدىق ەلدى مەكەن ورنالاسقان 41 مىڭ شارشى شاقىرىم اۋماققا قىزمەت كورسەتەدى. باسسەيندىك ينسپەكتسيالاردى ماتەريالدىق- تەحنيكالىق قامتاماسىز ەتۋ دەڭگەيى وزەكتى بولىپ تابىلادى»، - دەدى سەرىك قوجانيازوۆ.