قاڭتار وقيعالارى «نۇر وتان» دەپۋتاتتارىنىڭ لايىقتى بەدەلى جوقتىعىن كورسەتتى - پرەزيدەنت

نۇر- سۇلتان. قازاقپارات - ءماسليحات دەپۋتاتىنىڭ توسبەلگىسىن جوعارى كابينەتتەرگە رۇقساتتاما دەپ قاراستىرماۋ كەرەك. بۇل تۋرالى ەل پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات.

«پارتيا مۇشەلەرىنىڭ وڭىرلەردەگى وزەكتى الەۋمەتتىك- ەكونوميكالىق پروبلەمالاردى شەشۋگە قاتىسۋىن كۇشەيتۋ قاجەت. ءماسليحات دەپۋتاتىنىڭ توسبەلگىسىن وڭىرلىك ەليتاعا قاتىسىن بىلدىرەتىن الدامشى اتريبۋت نەمەسە جوعارى كابينەتتەرگە رۇقساتتاما دەپ قاراستىرماۋ كەرەك. بۇل ونىڭ حالىق اتىنان سايلانعانىن جانە حالىق مۇددەسى ءۇشىن جۇمىس ىستەۋى قاجەتتىگىنىڭ ايعاعى. دەپۋتاتتار وسى تۇبەگەيلى ايىرماشىلىقتى ناقتى ءتۇسىنۋى كەرەك. ازىرگە ءبىزدىڭ دەپۋتاتتاردىڭ ازاماتتار اراسىندا لايىقتى بەدەلى جوق. بۇل قاڭتارداعى قايعىلى وقيعالار كەزىندە ايقىن كورىندى»، - دەدى مەملەكەت باسشىسى «Nur Otan» پارتياسىنىڭ كەزەكتەن تىس XXI سەزىندە.

«پارتيا قۇرىلىمىن قايتا قاراپ جانە وڭتايلاندىرۋ ارقىلى ءوزىنىڭ ۇيىمداستىرۋشىلىق تيىمدىلىگىن ارتتىرۋى كەرەك. پارتيا اپپاراتىن سەرۆيستىك مودەلگە قاراي قۇرۋعا باسىمدىق بەرىلۋى ءتيىس»، - دەدى ق ر پرەزيدەنتى.

مەملەكەت باسشىسى پارتيانىڭ ۇيىمداستىرۋشىلىق قۇرىلىمىن دا قايتا قاراۋ كەرەكتىگىن باسا ايتتى.

«اتاپ ايتقاندا، پارتيا ءتوراعاسىنىڭ ءبىرىنشى ورىنباسارىنىڭ ورنىنا اتقارۋشى حاتشى، سونىمەن قاتار ءتيىستى باعىتتار بويىنشا وزگە دە حاتشىلار پوزيتسياسىن قاراستىرۋ كەرەك. پارتيانىڭ جانىنان قۇرىلعان قوعامدىق كەڭەستەر اشىق جانە ناقتى الاڭدارعا اينالۋى، ولاردا ەڭ وتكىر تاقىرىپتار بويىنشا ۇسىنىمدار ازىرلەنۋى ءتيىس. ولار وزەكتى پروبلەمالاردى شەشۋدىڭ ءىس جۇزىندەگى شىنايى تەتىگىنە ترانسفورماتسيالانۋى قاجەت»، - دەدى قاسىم- جومارت توقايەۆ.

ايتا كەتەيىك، نۇر- سۇلتاندا «Nur Otan» پارتياسىنىڭ كەزەكتەن تىس XXI سەزى جابىق رەجيمدە ءوتىپ جاتىر. بەكىتىلگەن كۇن تارتىبىنە سايكەس، وندا - پارتيانىڭ ءتوراعاسىن سايلاۋ تۋرالى، جارعىعا وزگەرىستەر مەن تولىقتىرۋلار ەنگىزۋ تۋرالى جانە ساياسي كەڭەس قۇرامىنا وزگەرىستەر ەنگىزۋ تۋرالى ءۇش ماسەلە قارالادى.

اۆتور: ايجان سەرىكجان قىزى