ساراپشى تاجىك- قىرعىز شەكاراسىنداعى جانجالعا قاتىستى: ساياساتكەرلەر ناقتى شەشىمگە بارۋى ءتيىس
«وسىنداي قاقتىعىستار مەن شيەلەنىستەردىڭ باستى سەبەبى تاجىكستان مەن قىرعىزستان شەكاراسىنىڭ اياعىنا دەيىن انىقتالماۋىنا بايلانىستى. وزدەرىڭىز بىلەسىزدەر، شەكارانى ايقىنداۋدا دەليميتاتسيا مەن دەماركاتسيا دەگەن ەكى كەزەڭ بولادى. 900 شاقىرىمنان استام شەكارانىڭ 500 شاقىرىمعا جۋىعى عانا قۇجاتتارمەن بەكىتىلگەن. قالعان بولىگى بويىنشا كوپتەگەن داۋ- داماي ءالى كۇنگە دەيىن تۋىنداپ كەلەدى. اتاپ ايتقاندا، بىشكەك تە، دۋشانبە دە مۇنداي قادامعا بارۋعا ءوزىنىڭ ساياسي كۇش- جىگەرىنىڭ ازدىعىن كورسەتىپ وتىر. قىرعىز جانە تاجىك بيلىگى ءۇشىن بۇل وتە سەزىمتال ماسەلە. كەز كەلگەن قوعامدا بيلىك ءوزىنىڭ رەيتينگىلەرىن ءتۇسىرىپ الماۋ ءۇشىن شەكارا ماسەلەسىنە كەلگەندە، ۇلتشىل پوزيتسيانى ۇستانادى»، - دەدى ج. سارابەكوۆ.
ونىڭ پايىمىنشا، ەكى ەل اراسىنداعى شەكارا ماسەلەسىنىڭ تولىقتاي شەشىلمەۋى قوس مەملەكەتتەگى ساياسي ويىنشىلاردىڭ مۇددەلى بولماۋىنا بايلانىستى بولىپ وتىر.
«جالپى، شەكارانى قۇجات جۇزىندە ايقىنداۋ شىنىمەن دە قيىن پروتسەسس. كوپ جاعدايدا شەكارالاردى تەحنيكالىق تۇرعىدا انىقتاۋ وڭاي ەمەس. بۇل تۇرعىدا كەيبىر ەلدى مەكەندەر قىرعىزستان نەمەسە تاجىكستان جاعىندا قالىپ كەتۋى مۇمكىن. ودان بولەك، كەيبىر جاعدايدا كەلىسسوزدەر بارىسىندا مەملەكەتتەر شەكارا ماسەلەسىن شەشۋ ءۇشىن ەلدى مەكەندەرمەن الماسادى. بۇل جاعداي دا كۇردەلى پروتسەسس، شەكارا ماڭىنداعى جەرگىلىكتى تۇرعىندار دا قارسىلىق تانىتاتىنى تۇسىنىكتى. سوندىقتان كەز كەلگەن مەملەكەت پەن قوعام ءۇشىن ۇلتتىق شەكارا تاقىرىبى وتە سەزىمتال ماسەلە. شەكارالاس ايماقتارداعى اۋىلدار تىعىز ورنالاسقاندىقتان، قاقتىعىستار تۇرمىستىق شيەلەنىستەن باستالادى. كەيىننەن ەكى مەملەكەتتىڭ قارۋلى كۇشتەرىنىڭ قاقتىعىسىنا ۇلاسىپ كەتۋى وكىنىشتى جاعداي»، - دەدى ساراپشى.
جۇمابەك سارابەكوۆتىڭ سوزىنە قاراعاندا بۇل ماسەلەنى جاقىن ارادا شەشۋدە تاراپتاردىڭ ۇلتتىق سەزىمدەرگە اسا ءمان بەرۋى كەدەرگى بولۋى مۇمكىن. ساياساتكەرلەر ناقتى شەشىمدەرگە بارماسا، قاقتىعىستار ارى قاراي جالعاسۋى ىقتيمال. بۇدان بۇرىن حابارلانعانداي، ەكى ەلدىڭ اسكەري قىزمەتشىلەرى باتكەن اۋدانىنا قاراستى ءتورت- كوچو دەگەن جەردە ءبىر- بىرىنە وق جاۋدىردى.
اۆتور: رۋسلان عابباسوۆ