تاجىك- قىرعىز شەكاراسىنداعى جانجال: احۋال قالاي ۋشىقتى

نۇر- سۇلتان. قازاقپارات - كۇنى كەشە تاجىكستان مەن قىرعىزستان شەكاراسىندا قاقتىعىس بولىپ، ەكى ەلدىڭ اسكەري قىزمەتشىلەرى باتكەن اۋدانىنا قاراستى ءتورت- كوچو دەگەن جەردە ءبىر- بىرىنە وق جاۋدىردى، دەپ حابارلايدى قازاقپارات ءتىلشىسى.

قارۋلى قاقتىعىس سالدارىنان شەكاراشىلار، سونىمەن قاتار تاجىك تاراپىنان بەيبىت تۇرعىندار مەرت بولعانى تۋرالى اقپارات بار. قىرعىزستاننىڭ اسكەري قىزمەتشىلەرى جاراقات العان. بۇعان دەيىن تاسس اگەنتتىگى قىرعىز ۇلتتىق قاۋىپسىزدىك مەملەكەتتىك كوميتەتىنىڭ اقپاراتىنا سىلتەمە جاساي وتىرىپ، قىرعىز- تاجىك مەملەكەتتىك شەكاراسىنداعى اۋالدىڭ شيەلەنىسىپ تۇرعاندىعىن حابارلاعان بولاتىن.

«قىرعىز رەسپۋبليكاسى مەن تاجىكستان رەسپۋبليكاسى شەكارا قىزمەتتەرىنىڭ وكىلدەرى اراسىندا جۇرگىزىلگەن كەلىسسوزدەردىڭ قورىتىندىسىندا ناقتىلانعان دەرەكتەرگە سايكەس، تاجىكستان ازاماتتارى جاۋىپ تاستاعان ءتورت- كوچو دەگەن جەردەگى باتكەن- يسفان جولىنىڭ ۋچاسكەسى جول ءجۇرۋ ءۇشىن قايتا اشىلدى»، - دەدى شەكارا ۆەدومستۆوسىنان.

اتالعان كوميتەتتىڭ ناقتىلاۋىنشا، ساعات 19:35-تە اۋدانداعى احۋال تاجىك تاراپىنىڭ قارۋ قولدانىپ باتكەن اۋدانىنداعى چىر- دوبو مەكەنىندە قىرعىز رەسپۋبليكاسى ۇلتتىق قاۋىپسىزدىك مەملەكەتتىك كوميتەتىنىڭ شەكارا بولىمشەسىنە وق اتۋىنا بايلانىستى ناشارلاي تۇسكەن.

«قىرعىزستان جانە تاجىكستاننىڭ شەكارا اسكەرلەرى بولىمشەلەرى اراسىنداعى نەگىزگى قارۋلى قاقتىعىس ءتورت- كوچو مەن چىر- دوبو دەگەن جەرلەردە ءجۇرىپ جاتىر. تاجىك تاراپى مينومەت پەن گراناتومەت قولدانۋدا»، - دەدى رەسمي ۆەدومستۆو.

قىرعىزدىڭ «كابار» اگەتتىگى جاريالاعان اقپاراتقا قاراعاندا، 27-قاڭتار كۇنى ساعات 23:50 دە قىرعىزستان مەن تاجىكستان اسكەري قىزمەتشىلەرى اراسىنداعى اتىس 10 مينۋتقا توقتاعان. اتىس توقتاعان ساتتە تاراپ وكىلدەرىنىڭ كەزدەسۋىن وتكىزۋ جوسپارلانعان. ءبىراق، تاراتىلعان اقپاراتتا تاجىك تاراپى اتىستى توقتاتۋ تۋرالى ەكىجاقتى ۋاعدالاستىقتى قايتادان بۇزىپ، قىرعىزستان اسكەري قىزمەتشىلەرىنىڭ پوزيتسياسىنا وق جاۋدىرۋىن جالعاستىرعان.

«2022 -جىلدىڭ 28-قاڭتارى كۇنى ساعات 00:20 داعى جاعداي بويىنشا ەكى ەلدىڭ اسكەري قىزمەتشىلەرى اراسىنداعى قارۋلى قاقتىعىس كوچو- بويۋ جانە داحما مەكەندەرىندە ءجۇرىپ جاتىر»، - دەپ ناقتىلايدى «كابار» اگەنتتىگى ۇلتتىق قاۋىپسىزدىك مەملەكەتتىك كوميتەتى شەكارا قىزمەتىنىڭ اقپارات جانە كوممۋنيكاتسيا باسقارماسىنا سىلتەمە جاساپ.

بۇقارالىق اقپارات قۇرالدارى شەكارا ماڭىنداعى ەلدى مەكەندەردىڭ تۇرعىندارى ۇيلەرىن تاستاپ كەتىپ جاتقانىن جازۋدا. وتكەن تۇندە قىرعىزستان پرەزيدەنتى سادىر جاپاروۆ ەل ازاماتتارىنا ۇندەۋ جاساپ، جانجالعا قاتىستى پىكىرىن ءبىلدىردى.

«قۇرمەتتى قىرعىزستاندىقتار! شەكاراداعى احۋال العاشقى مينۋتتان باستاپ تولىقتاي مەنىڭ باقىلاۋىمدا تۇر. قۇداي قالاسا، بارلىعىن دا كەلىسسوزدەرمەن، بەيبىت جولمەن شەشەمىز. الاڭداماڭىزدار. وزگە ەلدەردىڭ مۇددەسىن ۇستاناتىن جەكەلەگەن بۇقارالىق اقپارات قۇرالدارى مەن ساياساتكەرلەردىڭ احۋالدى ۋشىقتىرۋ ماقساتىندا تاراتقان جالعان اقپاراتتارىنا سەنبەڭىزدەر»، - دەپ جازدى سادىر جاپاروۆ Facebook-تەگى پاراقشاسىندا.

تاجىكستان اقپارات اگەنتتىگىنىڭ حابارىنا قاراعاندا، تاجىك تاراپىنان 10 ادام جاراقات الدى. ونىڭ ىشىندە 6 اسكەري قىزمەتشى مەن 4 بەيبىت تۇرعىن بار.

«وكىنىشكە وراي، قاقتىعىس بارىسىندا تاجىكستاننىڭ ەكى ازاماتى قازا بولدى: حودجاي الو اۋىلىنىڭ تۇرعىنى، 1986 -جىلى دۇنيەگە كەلگەن وبيدجون تۋيچيەۆ پەن 1964 -جىلى دۇنيەگە كەلگەن شاريپوۆ ابدۋلاتيف رابييەۆيچ»، - دەلىنگەن تاراتىلعان اقپاراتتا.

سوڭعى مالىمەتتەرگە سايكەس، قىرعىز- تاجىك شەكاراسىنداعى قاقتىعىس سالدارىنان قىرعىزستاننىڭ 11 اسكەري قىزمەتشىسى زارداپ شەككەن. بۇل جايىندا «كابار» اقپارات اگەنتتىگى ەلدىڭ دەنساۋلىق ساقتاۋ مينيسترلىگىنە سىلتەمە جاساپ حابارلادى.

قىرعىز رەسپۋبليكاسى دەنساۋلىق ساقتاۋ مينيسترلىگىنىڭ اقپاراتىنا قاراعاندا، تورتەۋىنە گراناتا جارىقشاعى، ال ەكەۋىنە وق تيگەن. ءسال كەيىنىرەك قىرعىزستان تۇرعىندارى مەن اسكەري قىزمەتشىلەرى اراسىندا قازا بولعانداردىڭ جوق ەكەنى ءمالىم ەتىلدى. بۇگىن شەكاراداعى احۋالدىڭ تۇراقتانعانى بەلگىلى بولدى. قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ شەكارا قىزمەتى مالىمدەمەسىنە قاراعاندا، قىرعىزستان مەن تاجىكستان شەكاراداعى اتىستى تولىقتاي توقتاتۋ تۋرالى ۋاعدالاستىققا قول جەتكىزگەن. بۇل جايىندا «كابار» اگەنتتىگى جازدى.

تاراپتاردىڭ كەلىسسوزدەرىنەن كەيىن تاتۋلاسۋعا قول جەتكىزىلدى. اتاپ ايتقاندا، تاراپتار مىناداي كەلىسىمدەرگە كەلدى:

- اتىستى تولىقتاي توقتاتۋ؛

- تاراپتاردىڭ ءارقايسىسى شەكارا ماڭىنا شوعىرلاندىرىلعان كۇشتەرى مەن قۇرالدارىن تۇراقتى ورنالاسقان جەرلەرىنە قايتارۋ؛

- باتكەن- يسفان جولىندا قوزعالىستى اشۋ؛

- قىرعىزستان مەن تاجىكستاننىڭ قۇقىق قورعاۋ ورگاندارى قىزمەتكەرلەرىنىڭ شەكارالىق اۋدانداردا جانجالعا جول بەرمەۋ ءۇشىن بىرگە شولعىنداۋى.

قازىرگى ۋاقىتتا تاجىكستان مەن قىرعىزستاننىڭ مەملەكەتتىك شەكاراسىنداعى احۋال تۇراقتى.

«2022 -جىلدىڭ 28-قاڭتارى كۇنى ساعات 08:00 دەگى جاعداي بويىنشا ساماركاندىك، ءتورت- كوچو، كوك- تاش، داحما، كوچو- بويۋ جانە گولوۆنوي دەگەن جەرلەردەگى قىرعىز- تاجىك مەملەكەتتىك شەكارا ۋچاسكەسىندەگى احۋال تۇراقتى دەپ سيپاتتالادى»، - دەلىنگەن «كابار» اقپارات اگەنتتىگى تاراتقان حابارلامادا.

«قازىرگى ۋاقىتتا شەكارادا احۋال سالىستىرمالى تۇردە تۇراقتى جانە باقىلاۋعا الىندى. كەشەگى جانجالدىڭ بارلىق ءمان- جايىن ارناۋلى كوميسسيا تەرگەيتىن بولادى. قازىر ەكى ەلدىڭ كۇشتىك قۇرىلىمدارى بىرگە شولعىنداۋ جۇرگىزىپ جاتىر»، - دەپ ناقتىلادى قىرعىزستاننىڭ ۇلتتىق قاۋىپسىزدىك كوميتەتىنىڭ ءتوراعاسى كامچىبەك تاشيەۆ.