باي ادامداردىڭ ءبىرتۇرلى ادەتتەرى
ايگىلى ينجەنەردىڭ بايلىعى (ارينە، Tesla كومپانياسىنىڭ اكسياسىنىڭ وسۋىنە بايلانىستى) 244,2 ميلليارد دوللارعا باعالاندى. امەريكالىق ميللياردەردىڭ يەلىگىندە وتە سيرەك كەزدەسەتىن Ford Model T (تاريحتاعى كونۆەيەر لەنتاسىندا جاپپاي شىعارىلعان العاشقى كولىكتەردىڭ ءبىرى) بار.
سونىمەن بىرگە ونىڭ ءۇيى جوق، كاسىپكەر قۇنى 50000 دوللار تۇراتىن شاعىن كونتەينەردە تۇرادى.
ءبىر قىزىعى، باي ادامداردى ءتۇسىنۋ كەيدە وتە قيىن. نازارىڭىزعا باي ادامداردىڭ ءبىرتۇرلى ادەتتەرىن ۇسىنامىز.
التىن كويلەك
نەسيە بەرۋ ارقىلى بايىعان ۇندىلىك ميلليونەر داتتا فۋگەنىڭ التىنعا دەگەن ۇلى ماحابباتى كوپشىلىككە بەلگىلى ەدى. 2013-جىلى فيۋگە ءوزىنىڭ سۇيىكتى مەتالىنان تاپسىرىس بويىنشا جەيدە تىگىپ، كوپشىلىكتى تاڭ قالدىردى. سالماعى 3,5 كەلى بولاتىن التىن كويلەك ءۇندىستاندىق بايعا 240 مىڭ دوللارعا تۇسكەن. ول التىن كويلەكتەن بولەك، ساقينا، توسبەلگى، بىلەزىك جانە باسقا دا ءتۇرلى اشەكەي بۇيىمداردى تاققاندى جاقسى كورگەن.
فۋگە بالا كەزىنەن ارمانداعان التىن ونى باقىتتى ەتە المادى. 2016-جىلى تۋعان كۇنگە شاقىرىلعان ول 12 ادامنان تاياق جەپ قايتىس بولعان.
ءوز اتىن عارىشتان كورىنەتىن ەتىپ جازدىرعان ميللياردەر
بىرىككەن اراب امىرلىكتەرىنىڭ ەكىنشى پرەزيدەنتى، كەمپىرقوساقتىڭ بارلىق تۇستەرىندەگى ەڭ قىمبات Mercedes اۆتوموبيلدەر توپتاماسىنىڭ يەسى رەتىندە تانىمال حاماد بەن حامدان ءال ناحايان ءوزىنىڭ ەسىمىن جەكە فۋتايسي ارالىنا جازۋدى ۇيعارعان. ونىڭ ەسىمى عارىشتان كورىنىپ تۇرۋى كەرەك بولعان.
وسى ماقساتتا جۇمىسشىلار تەرەڭ كانالداردى قازىپ، سۋعا تولتىرعان. ناتيجەسىندە ەنى 3 شاقىرىمعا سوزىلاتىن بەس ءارىپ - حاماد جازۋى بىرنەشە جىل بويى عارىشتان كورىنىپ تۇردى. الايدا كوپ ۇزاماي ميللياردەر ءوز شەشىمىن وزگەرتىپ، ونىڭ بۇيرىعىمەن جازۋ جويىلدى.
ەكىنشى «تيتانيك»
«اۋستراليالىق دونالد ترامپ» دەگەن اتپەن تانىمال كلايۆ پالمەر 2012-جىلى ايگىلى تيتانيك لاينەرىنىڭ كوشىرمەسىن قايتا جاساۋدى شەشتى. قۇرىلىس 2022-جىلى اياقتالادى دەپ جوسپارلانۋدا. سۋعا جىبەرىلگەننەن كەيىن كەمە ساۋتگەمپتوننان نيۋ-يورككە دەيىن ءوزىنىڭ بۇرىنعى باعىتىمەن جۇزەدى.
ميللياردەر جوسپارلاعانداي، ەكيپاج بەن كەمەنىڭ ديزاينى ⅩⅩ عاسىرداعىداي بولادى، جالعىز ايىرماشىلىعى - بۇل زاماناۋي تەحنيكالىق جابدىق. سونىمەن قاتار، ينجەنەرلەر 100 جىل بۇرىن بولعان اپات قايتالانباۋى ءۇشىن ءبارىن مۇقيات جوسپارلايدى. كلايۆ پالمەر تيتانيكتىڭ كوشىرمەسىن جاساۋ ءۇشىن 500 ميلليون دوللار جۇمساۋعا دايىن.
بەلمونت - بولاشاقتىڭ قالاسى
Microsoft كورپوراتسياسىنىڭ نەگىزىن قالاۋشى بيلل گەيتس 2017-جىلى ءوزىنىڭ Belmont Partners ينۆەستيتسيالىق فيرماسى ارقىلى اريزونا شتاتىنىڭ فەنيكس قالاسىنا جاقىن جەردى ساتىپ الدى. مۇندا ول «اقىلدى» قالا سالعىسى كەلەدى. ءوز يدەياسىن جۇزەگە اسىرۋ ءۇشىن ول جوباعا 80 ميلليون دوللار ينۆەستيتسيالادى. بەلمونتتا بارلىق عيماراتتار زاماناۋي تەحنولوگيامەن سالىنادى.
التىن مەديتسينالىق ماسكا
كوروناۆيرۋس ءورشىپ تۇرعان 2020-جىلى ءۇندىستاننىڭ ماحاراشترا شتاتىنىڭ تۇرعىنى، ميلليونەر شانكار كۋرادە كوروناۆيرۋس پاندەمياسىنان قورعانۋ ءۇشىن وزىنە التىننان جاسالعان قورعانىس ماسكاسىنا تاپسىرىس بەرگەن.
«التىن ماسكا جاساۋ يدەياسى ماعان كۇمىس بەتپەردە كيگەن ادامدى كورگەندە كەلدى. مەن التىندى جاقسى كورەتىندىكتەن جانە اۋىر التىن شىنجىرلار مەن ساقينالار تاعىپ جۇرگەندىكتەن، نەگە التىن ماسكا كيمەيمىن دەپ ويلادىم»، - دەگەن كۋرادە بۇل تۋرالى.
كەيىن ول جەرگىلىكتى زەرگەرگە التىن ماسكا جاساپ بەرۋىن وتىنگەن. ونىڭ سالماعى شامامەن 56,7 گرام بولعان. باعاسى - 3870 دوللار.
ءبىراق كاسىپكەردى كوروناۆيرۋستان بۇل دا قۇتقارماعان. 2020-جىلى قىركۇيەك ايىنىڭ سوڭىندا ول كوروناۆيرۋس جۇقتىرىپ، قايتىس بولدى.
امەريكالىق رەپەر ماڭدايىنا اسىل تاس ورناتقان
امەريكالىق رەپ ورىنداۋشى، Lil Uzi Vert دەگەن اتپەن تانىمال سايمير ۆۋدس 2021-جىلى ماڭدايىنا 24 ميلليون دوللار تۇراتىن گاۋھار تاس قويدىرعان.
وسى ماقساتتا حيپ-حوپ ورىنداۋشىسى 10 كاراتتى القىزىل گاۋھار تاس ساتىپ العان. ول 2017-جىلى وسى تۇستەس ناعىز گاۋھاردى كورگەن سوڭ اقشا جيناۋدى باستاعان. ال جاقۇتتىڭ قۇنى ونىڭ بارلىق مۇلكىن ياعني ءۇيى مەن اۆتوكولىگىن قوسقاندا قىمبات تۇرادى.
يمپلانتاتسيانى رەپەرگە تانىمال زەرگەر ەلليوت ەلليانتە جاساعان.
massaget.kz