مەدال الۋعا بارلىق كۇشىمىزدى سالامىز - ءمادىعالي قارسىبەكوۆ، شورت-ترەكتەن ۇلتتىق قۇرامانىڭ باس باپكەرى

نۇر-سۇلتان. قازاقپارات - XXIV قىسقى وليمپيادا ويىندارىنا قاتىساتىن قازاقستان قۇراماسى ەلدەگى سوڭعى جاتتىعۋلارىن اياقتاپ، بۇگىن بەيجىڭ قالاسىنا ۇشادى، دەپ حابارلايدى قازاقپارات ءتىلشىسى.

وسى ورايدا، شورت-ترەكتەن ۇلتتىق قۇرامانىڭ باس باپكەرى ءمادىعالي قارسىبەكوۆ مىرزاعا قوڭىراۋ شالىپ، وليمپيادا الدىنداعى دايىندىعى تۋرالى سۇراپ بىلدىك. تەلەفون تۇتقاسىن ەكى-ءۇش مارتە قوڭىراۋدان كەيىن كوتەرگەن باپكەر بىردەن قاتتى قاربالاس، كوپ سۇراققا جاۋاپ بەرۋگە ۋاقىتى جوق ەكەنىن ايتتى.

- وليمپياداعا اتتانعالى جاتىرمىز. تىم قاربالاس ەدىك، دەپ باستادى ءسوزىن باپكەر.

- جولدارىڭىز بولسىن! قانداي دايىندىقپەن كەتىپ بارا جاتىرسىزدار؟

- دايىندىعىمىز جامان ەمەس. جوسپار بويىنشا بارلىق وقۋ-جاتتىعۋدان وتتىك.

- بۇيىرسا «مەدال الۋعا مۇمكىندىگىمىز بار» دەيسىز عوي...

- مەدال الۋعا بارلىق كۇشىمىزدى سالامىز. ۇزدىك مامانداردى جيناپ جاتتىعۋ جاسادىق. قازاقستاندا دا، رەسەيدە دە جاتتىقتىق. كورشى ەلدەردىڭ ۇزدىك سپورتشىلارى سپاررينگ قارسىلاس بولدى. ەندى، مەدال الۋعا بەيجىڭدە بار كۇشىمىزدى سالامىز.

- ءسىزدىڭ شاكىرتىڭىز ابزال اجىعاليەۆ ەكىنشى مارتە وليپيادادا قازاقستان تۋىن الىپ شىعۋ قۇرمەتىنە لايىق دەپ تانىلدى. بۇل اجىعاليەۆكە ۇلكەن جاۋاپكەرشىلىك ەكەنى انىق. جالپى شاكىرتتەرىڭىزدىڭ ىشىنەن كىمدى جۇلدەگە لايىق دەپ سانايسىز؟

- بۇل جىگىتكە ۇلكەن ءۇمىت ارتىلىپ وتىرعانى انىق. الايدا مەن ءوزىم باپكەر رەتىندە بارلىق شاكىرتتەرىمدى جۇلدەگە لايىق دەپ ەسەپتەيمىن.

- شاكىرتتەرىڭىزبەن دە از-كەم اڭگىمەلەسسەك، قارسىلىعىڭىز بولماسا...

- رەنجىمەڭىز، وليمپياداعا دەيىن بارلىق شاكىرتتەرىم تىلشىلەرگە جابىق.

- راحمەت! ساتتىلىك سەرىك بولسىن...

اۆتور: كۇنسۇلتان وتارباي