الماتىدا قالالىق بيۋجەت قايتا قارالدى
الماتى قالاسى ءماسليحاتىنىڭ كەزەكتەن تىس XIV سەسسياسى ءوتتى. قالانىڭ اكىمشىلىك جانە كۇشتىك قۇرىلىمدارىنىڭ تىنىس - تىرشىلىگىن قامتاماسىز ەتۋ ماسەلەلەرىن جەدەل شەشۋ ءۇشىن سونىمەن قاتار، كاسىپكەرلەرگە كەلتىرىلگەن زالالدى وتەۋگە جانە بيزنەس سەكتورىن ىنتالاندىرۋ ماقساتىندا ءماسليحات اكىمدىكتىڭ باستاماسى بويىنشا الماتى قالاسى بيۋجەتىنە ناقتىلاۋ جۇرگىزدى.
جالپى جەرگىلىكتى بيۋجەتتى ناقتىلاۋ 2021-جىلعى بيۋجەتتىڭ كىرىس بولىگىن 30 ميلليارد تەڭگە سوماسىنا اسىرا ورىنداۋ ەسەبىنەن جۇرگىزىلەدى.
ءبولىنىپ وتىرعان قارجى مەملەكەت باسشىسىنىڭ قالانى تەزىرەك قالپىنا كەلتىرۋ، حالىق پەن بيزنەس نىساندارىنا كومەك كورسەتۋ جونىندەگى تاپسىرمالارىن ىسكە اسىرۋ ماقساتىندا مىنانداي شىعىستارعا باعىتتالادى:
- تارتىپسىزدىك بارىسىندا زارداپ شەككەن كاسىپكەرلەرگە كەلتىرىلگەن زالالدى وتەۋ - 5 ميلليارد تەڭگە؛
- شوب سۋبەكتىلەرى ءۇشىن كوممۋنالدىق شىعىستاردى تولەۋ بويىنشا شىعىنداردى سۋبسيديالاۋعا (3 اي مەرزىمگە) - 1,5 ميلليارد تەڭگە؛
- حالىقتى جۇمىسپەن قامتۋ باعدارلاماسىن قارجىلاندىرۋ اياسىندا قوعامدىق جۇمىستارعا جۇمىسقا ورنالاستىرۋ ءۇشىن 6 مىڭ ادامعا 3,3 ميلليارد تەڭگە قاراجات قاراستىرۋ جوسپارلانۋدا؛
- شاعىن جانە ورتا بيزنەس سۋبەكتىلەرىن جەڭىلدىكپەن نەسيەلەۋ تەتىگىن ەنگىزۋگە 6,3 ميلليارد تەڭگە ءبولىندى؛
- قۇقىق قورعاۋ ورگاندارى قىزمەتكەرلەرىنىڭ ماتەريالدىق-تەحنيكالىق جابدىقتالۋىن نىعايتۋعا.
بۇل ماقساتتارعا 2,2 ميلليارد تەڭگە ءبولۋ جوسپارلانۋدا.
سونىمەن قاتار، قالانىڭ تىنىس-تىرشىلىگىن قامتاماسىز ەتۋ جانە قالپىنا كەلتىرۋ ءۇشىن الەۋمەتتىك ماڭىزى بار ءىس-شارالاردى قارجىلاندىرۋعا وزگە دە شىعىستار كوزدەلگەن.
«قازىرگى ۋاقىتتا قالا بيۋجەتىن ناقتىلاۋ جوباسى ازىرلەنۋدە، وندا مەگاپوليستىڭ تىنىس-تىرشىلىگىن قامتاماسىز ەتۋ مەن قالپىنا كەلتىرۋگە قاتىستى باسقا دا ماسەلەلەر قارالاتىن بولادى» - دەدى ءماسليحات حاتشىسى ستانيسلاۆ كانكۋروۆ.
سونداي-اق، ءماسليحات سەسسياسىندا «اق جول» پارتياسىنىڭ قالالىق تىزىمىنەن روتاتسيا بويىنشا جانە جەكە ارىزى نەگىزىندە يۋ. شيننىڭ وكىلەتتىگى توقتاتىلدى.
ونىڭ ورنىنا اۋماقتىق سايلاۋ كوميسسياسىنىڭ جانە «اق جول» پارتياسى فيليالى كەڭەسىنىڭ قاۋلىسىمەن «قازاقستاننىڭ ميكروقارجى ۇيىمدارى قاۋىمداستىعى» ز ت ب ديرەكتورى جانە بەلگىلى زاڭگەر ەربول ومارحانوۆتىڭ كانديداتۋراسى بەكىتىلدى.