اتىراۋ وبلىسىندا ۇرلىققا كۇدىكتىنى ۇرىپ- سوققان ەكى پوليتسەي سوتتالدى

اتىراۋ. قازاقپارات - اتىراۋ وبلىسىندا ۇرلىققا كۇدىكتىنى ۇرىپ- سوققان ەكى پوليتسەي سوتتالدى، دەپ حابارلايدى قازاقپارات.

وبلىستىق سوتتىڭ باسپا ءسوز قىزمەتىنىڭ مالىمەتىنە سۇيەنسەك، پوليتسەيلەر ق ر قىلمىستىق كودەكسىنىڭ 146-بابى، 2-بولىگىنىڭ 1-تارماعى، 362-بابى، 4-بولىگىنىڭ 1,3-تارماقتارىن بۇزعان. قىلمىستىق ءىس جىلىوي اۋداندىق سوتىندا قارالدى.

«2021 -جىلدىڭ 20 - ناۋرىزىندا پوليتسيا ءبولىمىنىڭ جەدەل ۋاكىلدەرى ك. جانە ا. اقشا قاراجاتىن ۇرلاۋ دەرەگىمەن قوزعالعان قىلمىستىق ءىس بويىنشا كۇدىكتى رەتىندە تانىلعان جابىرلەنۋشى ا. -نى ۇيىنەن كۇشتەپ الىپ شىققان. پوليتسيا بولىمىنە جەتكىزىپ، زاڭسىز ۇستاپ، قورقىتىپ، ار- نامىسىنا تيەتىن سوزدەر ايتىپ، ۇرىپ- سوعىپ، دەنە جاراقاتتارىن سالعان. ك. جانە ا. جابىرلەنۋشىنىڭ ۇيالى تەلەفونىمەن بانككە سونىڭ اتىنان قوڭىراۋ شالىپ، ەسەبىندە قانشا اقشا بارىن انىقتاعان. تەلەفوندى الۋ تۋرالى حاتتاما تولتىرىلماعان. ياعني جابىرلەنۋشىدەن رۇقسات سۇراماي، ءوز وكىلەتتىكتەرىن اسىرا پايدالانىپ، ونىڭ زاڭمەن قورعالاتىن مۇددەلەرىنە ەلەۋلى تۇردە نۇقسان كەلتىرگەن. سوتتالۋشىلاردىڭ كىناسى جابىرلەنۋشىنىڭ جاۋابىمەن، سونداي- اق ساراپتاما قورىتىندىلارىمەن تولىقتاي دالەلدەندى»، - دەپ حابارلادى وبلىستىق سوتتىڭ باسپا ءسوز قىزمەتى.

سوت ۇكىمىمەن ك. جانە ا. -عا ق ر قىلمىستىق كودەكسىنىڭ 146-بابىنىڭ 2-بولىگىنىڭ 1-تارماعىمەن 1 جىل مەرزىمگە مەملەكەتتىك قىزمەتپەن اينالىسۋ قۇقىعىنان ايىرا وتىرىپ، 3 جىل مەرزىمگە، 362-بابىنىڭ 1-بولىگىمەن 1 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. اتالعان قۇجاتتىڭ 58-بابىنىڭ 3-بولىگىنە سايكەس، ولارعا تۇپكىلىكتى 1 جىل مەرزىمگە مەملەكەتتىك قىزمەتپەن اينالىسۋ قۇقىعىنان ايىرا وتىرىپ، 3 جىل مەرزىمگە باس بوستاندىعىنان ايىرۋ جازاسى تاعايىندالدى.

سونداي- اق، پوليتسەيلەر پوليتسيا اعا لەيتەنانتى، پوليتسيا كاپيتانى شەنىنەن ايىرىلدى. سوت ۇكىمى زاڭدى كۇشىنە ەنگەن جوق.

اۆتور: بەك مۇستافا