ۇلى بريتانيا پرەمەر- ءمينيسترىنىڭ ابىرويى توگىلگەلى تۇر

نۇر- سۇلتان. قازاقپارات - لوكداۋن كەزىندە داۋنينگ- ستريتتە ۇيىمداستىرىلعان ساۋىق كەشى ۇلى بريتانيا پرەمەر- ءمينيسترىنىڭ جاعدايىن شايقالتۋى مۇمكىن.

بريتان باسپا ءسوزى حالىق جاپپاي اۋىرىپ جاتقان كەزدە اقسۇيەكتەردىڭ تويلاتۋى جايلى حابارلاپ، پوليتسيا تەرگەۋ باستادى. وپپوزيتسيالىق لەيبوريستەر مەن قاراپايىم بريتاندىقتار بۇل قوعامدىق ماڭىزى بار ماسەلە دەپ، ونى تەكسەرۋدى قولداپ وتىر. پرەمەر- مينيستر بوريس دجونسوننىڭ كەڭسەسىندەگى كەشكە بايلانىستى جاعداي كەشە جاڭا بەتبۇرىس الدى. كارانتيندىك شەكتەۋلەر كەزىندەگى داۋنينگ- ستريت قىزمەتكەرلەرىنىڭ بەيرەسمي كەزدەسۋلەرىن تەرگەۋگە لوندون پوليتسياسى قوسىلدى.

كرەسسيدا ديك، لوندون قالاسى پوليتسياسىنىڭ باسشىسى:

- قالالىق پوليتسيا سوڭعى 2 جىلدا داۋنينگ- ستريت پەن ۋايت- حوللدا وتكىزىلگەن بىرنەشە ءىس- شاراعا قاتىستى تەرگەۋ جۇرگىزىپ جاتقانىن راستايمىن. تەكسەرىس پاندەميا كەزىندە ەنگىزىلگەن شەكتەۋلەردى بۇزۋى مۇمكىن دەگەن اقپارعا بايلانىستى قولعا الىندى.

پوليتسيا تەرگەۋگە، اقپارات قۇرالدارى لوكداۋن كەزىندە دجونسوننىڭ تاعى ءبىر كەش ۇيىمداستىرعانى جايلى حابار تاراتقان سوڭ كىرىستى. وعان قاراعاندا 2020- جىلدىڭ ماۋسىم ايىندا ۇلى بريتانيا ۇكىمەت باسشىسى رەسمي رەزيدەنسيادا ءوزىنىڭ 56 جاسقا تولۋىن اتاپ وتكەن. تويعا 30 شاقتى ادام قاتىسقان. دجونسوننىڭ ءوزى قاۋىمدار پالاتاسىندا ىسكە قاتىستى تۇسىنىكتەمە بەرۋدەن باس تارتقانىمەن، تەرگەۋگە كەدەرگى كەلتىرمەيتىنىن ايتتى.

بوريس دجونسون، ۇلى بريتانيا پرەمەر- ءمينيسترى:

- بىرنەشە اپتا بۇرىن مينيسترلەر كابينەتىنە داۋنينگ- ستريتتەگى وقيعالاردى تاۋەلسىز تەكسەرۋ تۋرالى تاپسىرما بەردىم. سەبەبى بۇل ءىس- شارالار كەزىندە كارانتين ەرەجەلەرى بۇزىلعان بولۋى مۇمكىن. ءىس قۇقىق قورعاۋ ورگاندارىمەن ۇنەمى مالىمەت الماسۋدى قاجەت ەتەدى. سوندىقتان پوليتسيانىڭ جەكە تەرگەۋ جۇرگىزۋ تۋرالى شەشىمىن قۇپتايمىن. بۇل وقيعانىڭ ءمان- جايىن انىقتاۋعا كومەكتەسەدى دەپ ويلايمىن.

ءبىراق قاراپايىم تۇرعىندار ءۇشىن ءبارى تەرگەۋسىز- اق تۇسىنىكتى بولعانداي. رەيتەر اگەنتتىگى حابارلاعانداي، بوريس دجونسوننىڭ ابىرويىن توككەن جانجال وتكەن جىلدىڭ سوڭىنا تامان پايدا بولعان. ءبىرقاتار باسىلىم پرەمەر كەڭسەسى 2020 -جىلدان بەرى بارلىق كارانتين كەزىندە ساۋىق كەشتەرىن وتكىزىپ وتىرعانىن ايتادى. دجونسوننىڭ ءوزى تەك ءبىر كەشكە جۇمىس بابىمەن ۇيىمداستىرىلعان كەزدەسۋ شىعار دەپ قاتىسقانىن ايتىپ، كەشىرىم سۇرادى.

ال پوليتسيا تەرگەۋ قورىتىندىسىن قاشان جاريالايتىنى بەلگىسىز. ءبىراق وسى اپتادا سيۋ گرەي باستاعان كوميسسيا شەشىم شىعارۋى ءتيىس. دەگەنمەن جەرگىلىكتى اقپارات قۇرالدارى بۇل كوميسسيا ءوزىنىڭ قورىتىندىسىن تەك پوليتسيا تەرگەۋىنەن كەيىن جاريا ەتۋى مۇمكىن دەپ جازىپ جاتىر.

www.24.kz