جاپپاي تارتىپسىزدىك: اكىمدىك عيماراتىنا كىرگەن ەكى كوپبالالى انا ءۇيقاماققا الىندى
26 قاڭتار 15:01

جاپپاي تارتىپسىزدىك: اكىمدىك عيماراتىنا كىرگەن ەكى كوپبالالى انا ءۇيقاماققا الىندى

قىزىلوردا. قازاقپارات - قىزىلوردادا جاپپاي تارتىپسىزدىك كەزىندە بۇلىك شىعارعان ەكى كوپبالالى انانىڭ ۇستىنەن ءىس قوزعالدى، دەپ حابارلايدى قازاقپارات ءتىلشىسى.

وبلىس ورتالىعىندا 5- قاڭتار كۇنى جاپپاي تارتىپسىزدىك كەزىندە ەكى ازاماتشا بۇلىكشىلەرمەن بىرگە وبلىس اكىمدىگىنىڭ عيماراتىنا باسا كوكتەپ كىرىپ، تارتىپسىزدىككە ورىن بەرگەن. ۆيدەوجازبادا ولاردىڭ تاس لاقتىرىپ، اكىمدىكتىڭ قورشاۋىنا ءمىنىپ، بالاعات سوزدەر ايتقانى، عيماراتقا زاڭسىز كىرگەنى كورسەتىلگەن. ەكى ازاماتشاعا قاتىستى سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە قىلمىستىق كودەكستىڭ 272-بابىنىڭ 2-بولىگىمەن (جاپپاي تارتىپسىزدىككە قاتىسۋ) قىلمىستىق ءىس تىركەلدى. فاكتى بويىنشا جان- جاقتى جانە وبەكتيۆتى تەرگەپ- تەكسەرۋ جۇرگىزىلگەن.

ەكى ازاماتشا قىلمىستىق ارەكەتتەرىن تولىق مويىندادى. ولاردىڭ اسىراۋىندا كامەلەتكە تولماعان بالالارىنىڭ بولۋى جانە ولاردىڭ دەنساۋلىق جاعدايى مەن وزدەرىنىڭ ءوتىنىشى ەسكەرىلىپ، بۇلتارتپاۋ شاراسى ءۇيقاماققا اۋىستىرىلدى. ءاربىر دەرەك مۇقيات زەردەلەنەدى. ناتيجەلەرى بويىنشا قۇقىقتىق باعا بەرىلەتىن بولادى»، - دەپ ءمالىم ەتتى قىزىلوردا قالالىق پوليتسيا باسقارماسىنىڭ باسپا ءسوز قىزمەتىنەن.

ەسكە سالساق، بۇگىن جاپپاي تارتىپسىزدىك كەزىندە ۇيالى تەلەفون اكسەسسۋارلارىن ۇرلاعان قىزىلوردالىق ۇستالعانىن جازعان بولاتىنبىز.

اۆتور: ءادىلجان ۇمبەت

سونداي-اق... وقىڭىز

جاڭالىقتار