قاڭتار وقيعاسى كەزىندە نىسانداردى توناعاندار قالاي انىقتالىپ جاتىر
بۇل تۋرالى بۇگىن ورتالىق كوممۋنيكاتسيالار قىزمەتىندە ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ءمالىم ەتتى، دەپ حابارلايدى قازاقپارات ءتىلشىسى.
«ۇرلىق پەن توناۋ قىلمىسىن جاساعانى ءۇشىن 274 ادام ۋاقىتشا ۇستاۋ اباقتىسىنا قامالدى. ۇستالعانداردىڭ كىناسى ۇرلانعان تاۋارلار مەن قارۋ تۇرىندەگى الىنعان زاتتاي دالەلدەمەلەرمەن، سونداي-اق بەينەباقىلاۋ كامەرالارىنىڭ جازبالارىمەن، الەۋمەتتىك جەلىلەردەگى روليكتەرمەن، كۇدىكتىلەردىڭ وزدەرىنىڭ ۇيالى تەلەفوندارىنان تابىلعان دەرەكتەرمەن دالەلدەنەدى. مىسالى، 19- قاڭتاردا الماتى قالاسىندا 18 جاستاعى تۇرعىن ۇستالدى. ونىڭ ۇيالى تەلەفونىنان ازىق-تۇلىك دۇكەندەرىنىڭ بىرىندە ۇرلىق جاساعان بەينەجازبا، ۇرلانعان زاتتار اياسىندا «سەلفي» جاساعانى جانە ەڭ سوراقىسى، كوشەدە ءبىر پوليتسيا قىزمەتكەرىن توپ بولىپ قاتىگەزدىكپەن ۇرىپ-سوعۋعا قاتىسقانى انىقتالدى. بۇل بەينەجازبالاردىڭ بارلىعىن كۇدىكتىنىڭ ءوزى جاساعان. ول ۋاقىتشا ۇستاۋ اباقتىسىنا قاماۋعا الىندى»، - دەدى س. ءادىلوۆ.
وسى ورايدا ول مۇنداي فاكتىلەر كوپ ەكەنىن اتاپ ءوتتى.
«قازىرگى ۋاقىتتا وندىرىستەگى قىلمىستىق ىستەر بويىنشا ارىزدانعان زالالدىڭ الدىن الا جالپى سوماسى 87 ميلليارد تەڭگەدەن استى. زارداپ شەككەندەردىڭ ارىزدانۋى بارىسىندا بۇل سوما ءوسىپ كەلەدى»، - دەدى تەرگەۋ دەپارتامەنتىنىڭ باستىعى.
بۇدان بۇرىن حابارلانعانداي، تارتىپسىزدىك كەزىندە زاقىم كەلگەن نىساندار مەن كولىكتەر سانى بەلگىلى بولدى. سونىمەن قاتار، قارۋدى ۇرلاعانى ءۇشىن 98 ادام ۇستالىپ، ۋاقىتشا ۇستاۋ اباقتىسىنا قامالدى جانە ولاردى زاڭسىز ساقتاعانى ءۇشىن 61 ادام ۇستالدى. سانجار ءادىلوۆ ەلىمىزدەگى تارتىپسىزدىك كەزىندە قوزعالعان قىلمىستىق ىستەر تۋرالى ايتىپ بەردى.