قازاقستان بەيجىڭدەگى وليمپياداعا ديپلوماتيالىق بويكوت جاريالاي ما - مينيسترلىك جاۋابى

نۇر-سۇلتان. قازاقپارات - ق ر مادەنيەت جانە سپورت ۆيتسە-ءمينيسترى سەرىك جاراسبايەۆ «قازاقستان بەيجىڭدە وتەتىن قىسقى وليمپياداعا باسقا ەلدەر سەكىلدى ديپلوماتيالىق بويكوت جاريالاي ما؟» دەگەن سۇراققا جاۋاپ بەردى، دەپ حابارلايدى قازاقپارات.

«كەيبىر ەلدەردىڭ بۇل ماسەلە بويىنشا ءوز ۇستانىمدارىن بىلدىرگەنى تۇسىنىكتى، ءبىراق ەل پرەزيدەنتى قاسىم-جومارت توقايەۆ ءبىزدىڭ سپورتشىلارىمىزدى، قۇراما كوماندالاردىڭ كاپيتاندارىن جانە پاراليمپياداشىلاردى قابىلداپ، ولارعا وليمپيادا ويىندارىنا اپاراتىن تۋدى تاپسىردى. ياعني، مۇندا ەشقانداي بويكوت تۋرالى ءسوز جوق. وعان قوسا، سىرتقى ىستەر مينيسترلىگى پرەزيدەنتتىڭ وليمپيادا ويىندارىنا قاتىسۋى ماسەلەسىن پىسىقتاپ جاتىر. ب ا ق- تا بەيجىڭ تاراپى ەل باسشىلىعىن رەسمي تۇردە شاقىرعانى تۋرالى اقپارات بولدى. وسىعان بايلانىستى، وليمپياداعا تولىققاندى قاتىساتىنىمىزدى ايتقىم كەلەدى، بىزدە كەيبىر ەلدەر كوتەرگەن ماسەلەلەرگە قاتىسۋعا ەش نەگىز جوق»، - دەدى سەرىك جاراسبايەۆ.

سونىمەن بىرگە، بۇل ماسەلەگە ۇلتتىق وليمپيادا كوميتەتىنىڭ وكىلى دە پىكىر ءبىلدىردى.

«كۇرىش پەن كۇرمەكتى - سپورت پەن ۇلكەن ساياساتتى اجىراتا ءبىلۋ كەرەك. بۇل ماسەلەدە دە ەكى ءتۇرلى نارسە بار. ءبىز مۇندا ەكى ءتۇرلى الەمنىڭ قاقتىعىسىن كورىپ وتىرمىز جانە سايكەسىنشە ءارقايسىسى وزىنشە ارەكەت ەتەدى. ءبىز ساياساتتى ەمەس، سپورتتى ويلايمىز. بۇل جەردە ءبىزدىڭ ۇستانىمىمىز بىردەي»، - دەدى قازاقستان ۇ و ك باس حاتشىسى اندرەي كريۋكوۆ.

ايتا كەتەيىك، XXIV قىسقى وليمپيادا ويىندارى قىتايدىڭ بەيجىڭ قالاسىندا، 2022-جىلدىڭ 4- 20- اقپان ارالىعىندا وتەدى. قازاقستاننان باراتىن 34 سپورتشى 87 سپورت تۇرىنەن ليتسەنزيا العان.