جانىڭىزعا جىگەر جەتپەسە
بۇل ساتيريك جازۋشى كۋرت ۆوننەگۋتتىڭ ءبىتىرۋشى تۇلەكتەر الدىندا سويلەگەن ءسوزى.
***
جاس كەزدەگى سۇلۋلىق پەن كۇش- جىگەردىڭ راحاتىن سەزىنىڭىز. قازىرگى ءومىرىڭىز ۇناماسا، الاڭداماڭىز، بۇل ءبىر كۇن عانا، وتەدى دە كەتەدى.
20 جىل وتكەندە قازىرگى فوتوسۋرەتتەرىڭىزگە قاراپ، ءوزىڭىز تۇسىنبەگەن سەزىممەن وسى شاقتى ەسكە الاسىز. قانشاما مۇمكىندىككە جول اشىق ەكەنىن، سونشالىقتى تارتىمدى بولعانىڭىزدى كورەسىز. ءار كۇنى باتىلىڭىز بارمايتىن ءبىر ءىستى ورىنداڭىز.
• ولەڭ ايتىڭىز؛
وزگەلەردىڭ جۇرەگىن جارالاماڭىز؛
سىزگە قىرىن قاراعان كىسىگە جالىنىشتى بولماڭىز؛
• ءتىسىڭىزدى تازالاۋدى ۇمىتپاڭىز؛
ءىشتارلىققا ۋاقىت جوعالتپاڭىز، بىردە الدا، بىردە ارتتا بولارسىز، مارەگە دەيىن جول ۇزاق، سوڭىندا وزىڭىزبەن ءوزىڭىز عانا قالاسىز.
• اتىڭىزعا ايتىلعان ماقتاۋ ءسوزدى ەستە ۇستاڭىز، ال داتتاۋلاردى دەرەۋ ويدان شىعارىڭىز؛
• ەسكى ماحاببات حاتتارىن ساقتاپ قويىڭىز، ال بانك قاعازدارىن لاقتىرىپ تاستاڭىز؛
• مەرزىمدى تۇردە جاتتىعۋ جاساڭىز. ءومىردىڭ ءمانىن تۇسىنبەگەن بولساڭىز، ءوزىڭىزدى كىنالى سەزىنبەڭىز. ومىرىمدە كەزدەسكەن ادامدار ىشىندە 22 جاسىندا تىرلىگىن قالاي وتكىزەرىن بىلمەي جۇرگەندەر ەڭ قىزىقتى ادام كورىنەتىن، ال 40 جاسقا كەلگەندە دە نە ىستەپ جۇرگەنىن بىلمەيتىن تانىستارىم بولعان.
كالتسي تۇتىنىڭىز. تىزەڭىزدى، بۋىندارىڭىزدى ساقتاڭىز. وسە كەلە ولاردىڭ قاجەتىن جەتە تۇسىنە تۇسەسىز. مۇمكىن نەكەگە تۇرارسىز، مۇمكىن تۇرمىس قۇرماسسىز. بالكىم بالالارىڭىز بولار، بالكىم بولماس. مۇمكىن قىرىق جاسقا جەتكەندە اجىراسىپ كەتەرسىز، مۇمكىن سەكسەن جاسقا جەتكەندە دە تاسىپ تۇرعان ماحابباتپەن ءومىر سۇرەرسىز. نە ىستەسەڭىز دە ءوزىڭىزدى جازعىرماڭىز جانە كوتەرمەلەپ تە جىبەرمەڭىز. تاڭداۋىڭىز بەن تاعدىرىڭىز ءتۇزۋ بولسىن دەپ تىلەڭىز. ورىننىڭ قولايلى- قولايسىزدىعىنا قاراماستان بيلەڭىز. ادەمى ءومىر تۋرالى جۋرنالداردى، جازبالاردى وقي كورمەڭىز. ول تەك ءوزىڭىزدى تومەن سەزىنۋگە «كومەكتەسەدى».
ءبىر تۋعان باۋىرلارىڭىزعا وتە مەيىربان بولىڭىز. ولار ءسىزدى وتكەنىڭىزبەن بايلانىستىراتىن جانە بولاشاقتا قانداي جاعداي بولسا دا جانىڭىزدان تابىلاتىن جاندار. دوستار ومىرىڭىزگە كەلەدى، كەتەدى.. . ءبىراق قيماستارىڭىز جانىڭىزدا قالۋىنا بار جاعدايدى جاساڭىز. سەبەبى جاسىڭىز ۇلعايا كەلە ءسىزدىڭ جاس كەزىڭىزدى بەس ساۋساعىنداي بىلەتىن ادامداردى اسا قاجەتسىنەسىز. ماسكەۋگە بارىپ ءبىراز تۇراقتاڭىز. ءبىراق ءبىر كۇنى كەتىپ قالىڭىز، سەبەبى ول ءسىزدى تاس جۇرەك ەتىپ جىبەرۋى مۇمكىن. بالي ارالدارىنا بارىپ تىرلىك كەشىڭىز، ءبىراق ول جەردەن دە قونىس اۋدارىڭىز، سەبەبى ول جاقتا شەكتەن تىس مەيىرىمدى بولىپ كەتەسىز. ءومىرىڭىزدى ساياحاتپەن وتكىزىڭىز.
شىندىقپەن بەتپە- بەت كەلە ءبىلىڭىز: باعا تۇراقسىز، وسە بەرەدى، ساياسات تا سان قۇبىلادى. ءسىز دە قارتاياسىز، سول كەزدە جاس كەزىڭىزدەگى باعالار عانا اقىلعا قونىمدى بولعانىن، ساياسات قايىرىمدى بولعانىن، ال بالالار قارتتاردى قۇرمەتتەگەنىن ەسكە الاسىز. ۇيدەگى قازىناڭىز - قارتىڭىزعا دا اسا جوعارى قۇرمەت كورسەتۋ قاجەت ەكەنىن دە ەستەن ەش شىعارماڭىز. ولار بۇگىن جانىڭىزدا، ەرتەڭ جوق. بىرەۋ ءسىزدى باعادى ەكەن دەپ سەنىپ قالماڭىز. ءدال ءقازىر اتا- اناڭىز نە جارىڭىز قارجىلاي قامتاماسىز ەتىپ وتىرعان شىعار. ءبىراق ولاردى دا تاعدىر سىزدەن قاشان اجىراتارىن بولجاپ بولمايسىز. شاشىڭىزعا كوپ تاجىريبە جاساماڭىز. قىرىق جاسقا جەتكەندە ولار سەكسەندەگى كارىنىڭ سەلدىر شاشىنداي بولعانىن كورگىڭىز كەلمەيتىن شىعار. ءبارىمىز دە ءبىر كۇنى باقۇلداسىپ كەتەمىز. ءبىراق سوڭعى دەمىمىز شىققانشا سەنىمدى جوعالتپاۋىمىز قاجەت. بار قيىندىق تا وسىندا سەكىلدى.. .
Massaget.kz