قوسشىدا مەملەكەتتىك كىرىستەر باسقارماسى اشىلدى

نۇر-سۇلتان. قازاقپارات - قوسشى قالاسىندا مەملەكەتتىك كىرىستەر باسقارماسى قۇرىلدى.

بۇل تۋرالى ق ر قارجى مينيسترلىگىنىڭ مەملەكەتتىك كىرىستەر كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.

جاڭادان قۇرىلعان باسقارما قالا ورتالىعىندا رەسپۋبليكا كوشەسى، 3/3 ۇيدە ورنالاسقان. اۋدانى 200 شارشى مەتردى قۇرايدى. بيزنەس ءۇشىن قولايلى جاعداي جاساۋ اياسىندا جاڭا مەملەكەتتىك ورگان «Open space « فورماتىندا جۇمىس ىستەيدى.

سالىق تولەۋشىلەردىڭ قولايلىلىعى جانە مەملەكەتتىك قىزمەتتەردى ساپالى كورسەتۋ ءۇشىن سالىق ەسەپتىلىگىن قابىلداۋ ورتالىعىندا ەلەكتروندىق كەزەك جۇيەسى جانە حالىققا قىزمەت كورسەتۋ سالاسىنداعى باسقا دا زاماناۋي سيفرلىق شەشىمدەر قولدانىعان.

قوسشى قالاسىندا باسقارما تىركەۋگە جاتاتىن سالىق تولەۋشىلەردىڭ جالپى سانى - 22 مىڭ ادام.

سونىمەن قاتار، ەسەپكە تۇرۋ ءۇشىن سالىق تولەۋشىلەرگە ەشقانداي ءوتىنىش جىبەرۋدىڭ قاجەتى جوق، ءبارى اۆتوماتتى تۇردە جۇرگىزىلەدى.

«شتات سانى 12 قىزمەتكەردى قۇرايدى. مەملەكەتتىك كىرىستەر باسقارماسىنىڭ قۇرامىندا 3 ءبولىم - سالىق تولەۋشىلەرمەن جۇمىس ءبولىمى، سالىقتىق باقىلاۋ جانە ءوندىرىپ الۋ ءبولىمى، سونداي-اق ەسەپ، تالداۋ جانە ۇيىمداستىرۋ-قۇقىقتىق جۇمىس ءبولىمى جۇمىس ىستەيدى. ولار مەملەكەتتىك قىزمەتتىڭ 44 ءتۇرىن كورسەتەدى. بۇگىنگى تاڭدا 400 دەن استام سالىق تولەۋشى ءتۇرلى ماسەلەلەر بويىنشا تۇسىنىكتەمە الدى. جاڭا مەملەكەتتىك كىرىستەر ورگانى وسى جىلى بيۋجەتكە 1,4 ميلليارد تەڭگەدەن استام سالىق جيناۋدى جوسپارلاپ وتىر»، - دەپ اتاپ وتەدى كوميتەتتەن.

ايتا كەتەرلىگى، بۇعان دەيىن قالا تۇرعىندارى مەملەكەتتىك قىزمەتتەردى الۋ ءۇشىن قوسشىدان 60 شاقىرىم قاشىقتىقتا ورنالاسقان سەلينوگراد اۋدانىنىڭ اقمول سەلوسىنىڭ اۋدان ورتالىعىنا جۇگىنۋى قاجەت بولاتىن.