كوروناۆيرۋسقا قارسى ۆاكسينا حالال ما، حارام با - يمام جاۋابى
وسى ورايدا كوپشىلىكتى مازالايتىن سۇراقتىڭ ءبىرى ۆاكسينا ادال ما جانە ەكپەگە قاتىستى ءدىن نە دەيدى؟ بۇل سۇراققا ەلورداداعى «ازىرەت سۇلتان» مەشىتىنىڭ باس يمامى ەربولات ءجۇسىپوۆ جاۋاپ بەردى، دەپ حابارلايدى قازاقپارات ءتىلشىسى.
«ءدىني تۇرعىدان «ۆاكسينا العان ءجون بە؟» دەگەن ساۋال كوپشىلىكتى تولعاندىرادى. شاريعاتتا دەنساۋلىقتىڭ امانات ەكەنى ايتىلادى. بىلمەگەن نارسەنى سول سالانىڭ ماماندارىنان سۇرا دەگەن ايات بار.
وسى ورايدا ءبىز ۆاكسيناعا قاتىستى دەنساۋلىق ساقتاۋ سالاسى ماماندارىنان سۇرايمىز. ولار ۆاكسينا الۋ كەرەك، ءتىپتى ماڭىزدى دەپ وتىر. سوندىقتان ىندەتتەن ساقتانۋ ءۇشىن ەكپە الۋدى ءبىز قولدايمىز. ءوز كەزەگىمىزدە مەشىتتەردە ءتۇسىندىرۋ جۇمىستارىن تۇراقتى ۇيىمداستىرىپ تۇرامىز. ياعني جاماعاتتى ۆاكسينا جانە ريەۆاكتسينا الۋعا شاقىرامىز. كوروناۆيرۋس ىندەتىن جەڭەمىز دەسەك، ەكپە العان ءجون»، - دەدى ەربولات ءجۇسىپوۆ.
سونداي-اق، يمام كوپشىلىكتى تولعاندىرعان ۆاكسينا حالال ما الدە حارام با دەگەنگە قاتىستى تۇسىنىك بەردى.
«جيى قويىلاتىن سۇراق. ءدىني سالاداعى ءپاتۋاعا جاۋاپتى ماماندار كوروناۆيرۋسقا قارسى ۆاكسينانى شاريعاتقا ساي ادال، رۇقسات بەرىلگەنىن ايتتى. جالپى ۆاكسيناتسيا ناۋقانى ەندى باستالعان كەزدە جاماعات تاراپىنان سۇراق كوپ بولدى. تۇراقتى ءتۇسىندىرۋ جۇمىسىنىڭ ناتيجەسىندە بۇگىندە ادامداردىڭ ەكپەگە قاتىستى پىكىرى وڭ دەۋگە بولادى»، - دەيدى ول.
بۇعان دەيىن حابارلاعانىمىزداي بۇگىن ەلوردادا ءدىني بىرلەستىكتەر وكىلدەرى ريەۆاكسينا جاساتتى.