USD 425.02 EUR 450.1
RUB 7.17 CNY 63.75
جاڭالىقتار

بيىل ءبىلىم بەرۋ گرانتتارىنىڭ نەگىزگى بولىگى قاي سالاعا باعىتتالادى؟

24 قاڭتار 18:29
:ءبولىسۋ
بيىل ءبىلىم بەرۋ گرانتتارىنىڭ نەگىزگى بولىگى قاي سالاعا باعىتتالادى؟

نۇر-سۇلتان. قازاقپارات - بيىل قازاقستانداعى ج و و- لاردا وقۋعا ارنالعان ءبىلىم گرانتتارىنىڭ سانى تاعى 5 مىڭعا ارتادى.

وسىلايشا، گرانتتاردىڭ جالپى سانى 61 مىڭنان استى. جاڭا گرانتتار ستۋدەنتتەر اراسىندا سۇرانىسقا يە جانە وزەكتى ماماندىقتارعا بولىنەتىن بولادى. سونداي-اق ءبىلىم بەرۋ گرانتتارىن ءبولۋ كەزىندە ازاماتتاردىڭ الەۋمەتتىك وسال ساناتتارى ءۇشىن كۆوتالار كوزدەلگەن.

وسى ورايدا مەملەكەتتىك گرانتتار جايلى قازاقپارات اگەنتتىگىنە ق ر ب ع م جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ باسقارما باسشىسى جاننا ەسينبايەۆا ايتىپ بەردى.

- جاقىندا ءبىلىم گرانتتارىنىڭ سانى ارتاتىنى جايىندا حابارلاعان ەدى. وسى ورايدا بۇل گرانتتار قاي سالالارعا باعىتتالادى؟

- ق ر پرەزيدەنتىنىڭ تاپسىرماسىنا سايكەس، ەلىمىزدە مەملەكەتتىك ءبىلىم بەرۋ تاپسىرىسىنىڭ كولەمىن ۇلعايتۋ جوسپارلانعان. 2022-2023 جاڭا وقۋ جىلىنا گرانت سانى 5 مىڭعا ارتاتىن بولادى. وسى ورايدا جالپى كولەمى 61 مىڭ گرانتتان اسادى.

ەگەر 2021-جىلى بىزدە 56561 گرانت بولىنسە، بيىل 61560 گرانتتان استام بولىنەدى دەپ جوسپارلانعان. بۇعان قاراجات كوزى رەسپۋبليكالىق بيۋجەتتەن قاراستىرىلادى.

بۇل تۇرعىدا رەسپۋبيكالىق بيۋجەتتەن قاراجات ءبولۋ ماسەلەسى بويىنشا بارلىق جۇمىستار اياقتالدى، ياعني بۇل قادامدار ورىندالادى.

سايكەسىنشە، ءتيىستى قاۋلى شىعارىلادى. بۇل رەتتە ايتا كەتۋ كەرەك، ءبىز مەملەكەتتىك ءبىلىم بەرۋ تاپسىرىسىنىڭ باسىم بولىگىن تەحنيكالىق ماماندىقتارعا ءبولۋدى جوسپارلاپ وتىرمىز. وسىعان دەيىن شامامەن تەحنيكالىق ماماندىقتارعا بولىنەتىن گرانت سانىنىڭ ۇلەسى 40 پايىزدان اساتىن بولسا، قازىر ونىڭ كولەمىن 60 پايىزعا جەتكىزۋدى جوسپارلاپ وتىرمىز. مەملەكەتتىك ءبىلىم بەرۋ تاپسىرىسىن قالىپتاستىرۋ بارىسىندا ءبىز ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسە جۇمىستاردى اتقارامىز.

سەبەبى ەڭبەك مينيسترلىگى قاي سالادا قانداي ماماندىقتار تاپشى ەكەنىن ساراپتاپ كورسەتىپ بەرەدى. وسىنى جانە «اتامەكەن» پالاتاسىنىڭ، رەسپۋبليكالىق كوميسسيانىڭ ۇسىنىسىن ەسكەرە وتىرىپ، بەكىتەتىن بولامىز.

- مەملەكەتتىك گرانتقا ۇمىتكەر رەتىندە جىلىنا ورتاشا ەسەپپەن قانشا تالاپكەر قۇجات تاپسىرادى؟

- شامامەن 100 مىڭنان استامى كونكۋرسقا قاتىسادى. بىزدە كونكۋرسى جوعارى ماماندىقتار بولادى. وسى ورايدا كونكۋرسى جوعارى ماماندىقتاردىڭ قاتارىنا ەكونوميكالىق سالا كىرىپ وتىر. سودان كەيىن مەديتسينالىق ماماندىقتارعا، شەت ءتىلى باعىتتارىندا كونكۋرس جوعارى بولىپ كەلەدى. ياعني ۇمىتكەرلەر سانى كوبىرەك بولادى دا، گرانتقا ىلىكپەي قالعان بالا سانى كوپ كەزدەسەدى. ال كونكۋرسى ازداۋ باعىتتا اۋىل شارۋاشىلىعى ماماندىقتارى ەنىپ وتىر. بۇل سالادا شەكتى ۇپاي جيناعانداردا گرانتتى يەلەنۋ مۇمكىندىگى وتە جوعارى.

- تەحنيكالىق ماماندىقتارعا سۇرانىستى قالاي باعالار ەدىڭىز؟

- جالپى، تەحنيكالىق كاسىپتەرگە، ونىڭ ىشىندە IT - سالاعا، ينجەنەرلىك ماماندىقتارعا كەلەتىن بالا سانى وتە كوپ. وسى ورايدا مەملەكەتتىك گرانت اياسىنداعى كونكۋرس جاقسى دەڭگەيدە. مەكتەپ بىتىرەتىن تۇلەكتەردىڭ جالپى سانى 2024-2025-جىلدارعا دەيىن وسەدى دەگەن مالىمەتتەر ايتىلىپ جاتىر.

تۇلەكتەر سانى 180-190 مىڭعا دەيىن جەتۋى مۇمكىن. ولاردىڭ باسىم بولىگى ۇ ب ت تاپسىرۋعا كەلەدى. سوندىقتان بۇل بالالاردىڭ ەلەۋلى بولىگى تەحنيكالىق ماماندىقتاردى تاڭدايدى.

- مەملەكەتتىك گرانتتار اياسىندا قانداي كۆوتالار ەسكەرىلگەن؟

- اتالعان 5 مىڭ گرانت جالپى مەملەكەتتىك ءبىلىم بەرۋ تاپسىرىسىنا قوسىلادى. ەندى سول 61 مىڭنان استام گرانتتىڭ اراسىندا الەۋمەتتىك وسال توپتارداعى ازاماتتار ءۇشىن ارنايى كۆوتالار قاراستىرىلعان. جەتىم بالالارعا 1 پايىز كۆوتا ۇلەستىرەمىز، مۇگەدەكتىگى بار جاندارعا 1 پايىز، سونداي-اق قانداستارعا 4 پايىز قاراستىرىلعان. 30 پايىزى اۋىلدان كەلگەن بالالار ءۇشىن ەسكەرىلگەن، 10 پايىزى «سەرپىن» باعدارلاماسى بويىنشا جۇزەگە اسىرىلادى. 2021-جىلى جاڭادان ءۇش كۆوتا قوسىلدى. ءبىلىم جانە عىلىم مينيسترلىگى پرەزيدەنتتىڭ تاپسىرماسى بويىنشا حالىقتىڭ الەۋمەتتىك وسال توپتارىنان شىققان بالالاردىڭ مەملەكەت ەسەبىنەن ءبىلىم الۋىنا مۇمكىندىكتىڭ كوبىرەك بولۋى ءۇشىن جۇمىس جۇرگىزدى.

وسى ورايدا كوپبالالى وتباسىلار ءۇشىن 5 پايىز كۆوتا، تولىق ەمەس وتباسى مارتەبەسى بار وتباسىلاردان شىققان بالالارعا - 1 پايىز، سونداي-اق مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە 1 پايىز كوۆوتا بەرىلەدى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات