ساۋد ارابياسىندا بالليستيكالىق زىمىران اتىلدى
«حۋسيت كوتەرىلىسشىلەرى دجيزان قالاسىنا بالليستيكالىق زىمىرانمەن اياۋسىز شابۋىل جاسادى. بۇل حۋسيتتەردىڭ يندۋستريالدى ايماقتاعى ءارتۇرلى ۇلت وكىلدەرىنىڭ بەيبىت تۇرعىندارىنا شابۋىل جاساۋىنىڭ ءۇشىنشى ارەكەتى. كەلتىرىلگەن شىعىن ەسەپتەلۋدە»، - دەلىنگەن ساۋد ارابياسى باستاعان حالىقارالىق كواليتسيانىڭ مالىمدەمەسىندە.
شابۋىل ناتيجەسىندە سۋدان مەن بانگلادەش ازاماتتارى بولىپ تابىلاتىن ەكى شەتەلدىك جاراقات الدى. سونداي-اق، ماتەريالدىق زالال تۋرالى حابارلاندى.
ساۋد ارابياسىندا اتىلعان زىمىراننىڭ بولىكتەرى يەمەن شەكاراسىنا جاقىن ورنالاسقان دجيزان قالاسىنىڭ احاد ءال-ماساريحا ونەركاسىپتىك ايماعىندا قۇلادى. ابۋ-دابي ۆاشينگتوننان حۋسيتتەردى تەرروريستىك توپ دەپ تانۋدى تالاپ ەتتى، ال 22- قاڭتاردا ب ا ءا ىشكى ىستەر مينيسترلىگى ۇشقىشسىز ۇشاقتار مەن جەڭىل سپورتتىق ۇشاقتاردى جەكە پايدالانۋعا تىيىم سالدى.
يەمەندە 2014-جىلدىڭ تامىز ايىنان بەرى ۇكىمەت كۇشتەرى مەن حۋسيتتەر اراسىنداعى قاقتىعىس جالعاسۋدا. ول ءوزىنىڭ ەڭ بەلسەندى كەزەڭىنە 2015-جىلدىڭ ناۋرىز ايىندا ساۋد ارابياسى باستاعان كواليتسيانىڭ ەلگە باسىپ كىرۋىمەن كىردى.
جەتى جىلدان استام ۋاقىت بويى جالعاسىپ كەلە جاتقان قاقتىعىس الەمدەگى ەڭ ءىرى گۋمانيتارلىق داعدارىستى تۋدىردى.