قازاقستاندا ازاماتتاردى اسكەرگە شاقىرۋ ۋچاسكەلەرىنە تىركەۋ ناۋقانى وتۋدە

نۇر-سۇلتان. قازاقپارات - اسكەري ەسەپكە الۋدىڭ العاشقى ءراسىمىن جەرگىلىكتى اسكەري باسقارۋ ورگاندارى جۇرگىزەدى.

الدىن الا اسكەرگە شاقىرۋ ۋچاسكەلەرىنە 17 جاستاعى 100 مىڭنان استام جاس ءوسپىرىم تىركەلەدى، دەپ حابارلايدى ق ر ق م باسپا ءسوز قىزمەتى.

اسكەرگە شاقىرۋ پۋنكتەرىنە كەلۋگە 2005-جىلى تۋعان جاس وسپىرىمدەر شاقىرۋ قاعازىن الادى. ولار بارلىق قاجەتتى قۇجاتتارمەن جەرگىلىكتى اسكەري باسقارۋ ورگاندارىنا كەلۋگە مىندەتتى.

جەرگىلىكتى اتقارۋشى ورگانداردىڭ شەشىمىمەن ازاماتتاردى تىركەۋ جانە مەديتسينالىق كۋالاندىرۋ جونىندەگى كوميسسيالار قۇرىلدى.

تىركەۋ بارىسىندا بولاشاق اسكەرگە شاقىرىلۋشىلاردىڭ سانى، اسكەري قىزمەتكە جارامدىلىق ساناتى، دەنە دايارلىعىنىڭ دەڭگەيى ايقىندالادى.

دەنساۋلىق جاعدايى ەرەكشە باقىلاۋعا الىنادى. ءاربىر جاس ازامات مىندەتتى مەديتسينالىق تەكسەرۋدەن وتەدى. جاس وسپىرىمدەردە قانداي دا ءبىر سىرقات انىقتالعان جاعدايدا، ولار ءتيىستى ەمدەلۋ ءۇشىن دەنساۋلىق ساقتاۋ ۇيىمدارىنا تىركەلەدى.

بارلىق راسىمدەردەن وتكەننەن كەيىن اسكەرگە شاقىرۋ جاسىنا دەيىنگىلەرگە اسكەري ەسەپكە قويۋ تۋرالى تىركەۋ كۋالىك بەرىلەدى.

- تىركەۋ كۋالىگى - اسكەري بيلەت سياقتى ماڭىزدى قۇجات. بۇل جاس ادام قىزمەتكە شاقىرىلعانعا نەمەسە زاپاسقا شىعارىلعانعا دەيىن جارامدى. اسكەري ەسەپتەن شىعارىلعاننان كەيىن جانە اسكەري بيلەتتى العاننان كەيىن تىركەۋ كۋالىگى الىنىپ، ونى جەرگىلىكتى اسكەري باسقارۋ ورگانىنا جويۋعا بەرىلەدى، - دەپ ءتۇسىندىردى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى پولكوۆنيك ازامات دوسىموۆ.

سونىمەن قاتار، جەرگىلىكتى اسكەري باسقارۋ ورگاندارى جاس وسپىرىمدەرگە اسكەري قىزمەتتىڭ ارتىقشىلىقتارى مەن پەرسپەكتيۆالارى، قازاقستان قورعانىس مينيسترلىگىنىڭ جانە الىس-جاقىن شەتەلدەردىڭ اسكەري وقۋ ورىندارىنا ءتۇسۋ ەرەجەلەرى جونىندە اقپارات بەرىلەدى.

ەستەرىڭىزگە سالا كەتسەك، رەسپۋبليكادا اسكەرگە شاقىرۋ ۋچاسكەلەرىنە تىركەۋ جىل سايىن قاڭتار مەن ناۋرىز ارالىعىندا جۇرگىزىلەتىن مىندەتتى ءراسىم بولىپ تابىلادى.