قۇقىقتىق ءتارتىپ ءىس- شاراسى: پوليتسيا وكىلدەرى نە ىستەۋگە قۇقىلى

نۇر- سۇلتان. قازاقپارات - ىشكى ىستەر مينيسترلىگىنىڭ رەسمي وكىلى نۇردىلدا وراز ەلدىڭ بىرنەشە وڭىرىندە ءجۇرىپ جاتقان «قۇقىقتىق ءتارتىپ» ءىس- شاراسى اياسىندا پوليتسيا وكىلدەرى قانداي ارەكەتكە بارۋعا قۇقىلى ەكەنىن ءتۇسىندىردى، دەپ حابارلايدى قازاقپارات ءتىلشىسى.

«وڭىرلەردە ىشكى ىستەر ورگاندارى «قۇقىقتىق ءتارتىپ» جەدەل- الدىن الۋ ءىس- شاراسىن وتكىزىپ جاتقانىن ەسكە سالامىن. ونىڭ نەگىزگى ماقساتى - وڭىردەگى جەدەل جاعدايدى ساۋىقتىرۋ، زاڭدىلىق پەن قۇقىقتىق ءتارتىپتى، قاۋىپسىزدىكتى قامتاماسىز ەتۋ»، - دەدى ءنۇردىلدا وراز.

اتالمىش ءىس- شارا اياسىندا پوليتسيا قىزمەتكەرلەرى مىناداي ارەكەتتەر ورىنداي الادى:

- كولىك قۇرالىنىڭ جانە جەكە باستى كۋالاندىراتىن قۇجاتتاردى تەكسەرۋ، كولىكتى ءتىنتۋ جانە ازاماتتاردىڭ زاتتارىن تەكسەرۋ؛

- جالعا الىنعان پاتەرلەردى، يەسىز ۇيلەردى، حوستەلدەردى، ساياجايلاردى، بازارلاردى، تەحنيكالىق قىزمەت كورسەتۋ ستانسيالارىن، شارۋا قوجالىقتارىن، شالعايداعى ۋچاسكەلەردى، قىستاقتاردى جانە باسقا دا شالعاي جەرلەردى تەكسەرۋ؛

- اتىس، تراۆماتيكالىق جانە سۋىق قارۋدى، وق- دارىلەردى، جارىلعىش زاتتاردى تاركىلەۋ؛

- تۇراقتى تۇرعىلىقتى جەرى جوق ادامداردى، زاڭسىز كوشىپ- قونۋشىلاردى انىقتاۋ؛

- بۇرىن سوتتالعان جانە ىشكى ىستەر ورگاندارىندا ەسەپتە تۇرعان وزگە دە ادامداردى تەكسەرۋ.

«ءى ءى م ازاماتتاردى جەدەل- پروفيلاكتيكالىق ءىس- شارالارعا تۇسىنىستىكپەن قاراۋعا شاقىرادى»، - دەدى مينيسترلىكتىڭ رەسمي وكىلى.

اۆتور: ەسىمجان ناقتىباي