الماتىداعى تارتىپسىزدىك كەزىندە زارداپ شەككەن ازاماتتارعا وتەماقى تولەنەدى

الماتى. قازاقپارات - الماتىدا جاپپاي تارتىپسىزدىك كەزىندە زارداپ شەككەن جەكە تۇلعالارعا وتەماقى تولەنەدى.

بۇل تۋرالى الماتىنىڭ تىنىس- تىرشىلىگىن قالپىنا كەلتىرۋ جونىندەگى قالالىق شتاب وتىرىسىندا قالا اكىمىنىڭ ورىنباسارى ءىلياس وسەروۆ ايتتى، دەپ حابارلايدى قازاقپارات ءتىلشىسى.

الماتىدا بولعان تارتىپسىزدىكتەر كەزىندە مەملەكەتتىك ورگانداردىڭ، اۋرۋحانالار مەن ب ا ق- تىڭ 603 قىزمەتكەرى زارداپ شەككەن. ونىڭ ىشىندە، قۇقىق قورعاۋ ورگاندارىنىڭ 592 قىزمەتكەرى، توتەنشە جاعدايلار دەپارتامەنتىنىڭ 1 قىزمەتكەرى، جەرگىلىكتى اتقارۋشى ورگانداردىڭ 3 قىزمەتكەرى، «الماتى» تەلەارناسىنىڭ 1 قىزمەتكەرى جانە مەديتسينالىق ۇيىمداردىڭ 6 قىزمەتكەرى بار. ولاردىڭ بارلىعىنا وتەماقى تولەنەدى.

الماتى قالاسى اكىمىنىڭ ورىنباسارى ءىلياس وسەروۆتىڭ ايتۋىنشا، زارداپ شەككەندەرگە تولەمدەر كەلەسى دارەجەلەرگە قاراي بەرىلەدى. اۋىر دارەجەدە زارداپ شەككەندەر - 2 ميلليون تەڭگە، ورتاشا دارەجەدە - 1 ميلليون تەڭگە، جەڭىل تۇردە - 500 مىڭ تەڭگە تولەنەدى. سونىمەن قاتار، قالادا توتەنشە جاعداي كەزىندە جۇمىلدىرىلعان پوليتسيا دەپارتامەنتىنىڭ 3878 قىزمەتكەرىنە، توتەنشە جاعدايلار دەپارتامەنتىنىڭ 1207 قىزمەتكەرىنە، قوعامدىق دەنساۋلىق باسقارماسىنىڭ 3888 قىزمەتكەرىنە، قۇتقارۋ قىزمەتىنىڭ 93 قىزمەتكەرىنە 100 مىڭ تەڭگە قارجىلاي كومەك تولەنەدى.

«بۇگىن ءتيىستى قۇجاتتار قازىناشىلىققا جىبەرىلىپ، تۇستەن كەيىن العاشقى تولەمدەر جاسالادى»، - دەدى ءىلياس وسەروۆ.

سونداي- اق، ءتيىستى تەرگەۋ ارەكەتتەرى اياقتالعان سوڭ زارداپ شەككەن اۆتوكولىكتەرگە تولەمدەردى قامتاماسىز ەتۋ ءۇشىن پوليتسيا دەپارتامەنتىنە شامامەن 200 ميلليون تەڭگە مولشەرىندە باستاپقى سوما جىبەرىلەتىن بولادى. قاجەت بولعان جاعدايدا بۇل سوما كوبەيتىلەدى.