USD 425.02 EUR 450.1
RUB 7.17 CNY 63.75
جاڭالىقتار

ولجاس قۇدايبەرگەنوۆ: باسشىلىق قىزمەتكە تانىس ارقىلى تاعايىنداۋ - وتكەن كۇننىڭ تاجىريبەسى

22 قاڭتار 11:57
:ءبولىسۋ
ولجاس قۇدايبەرگەنوۆ: باسشىلىق قىزمەتكە تانىس ارقىلى تاعايىنداۋ - وتكەن كۇننىڭ تاجىريبەسى

نۇر- سۇلتان. قازاقپارات - وتاندىق ەكونوميست ولجاس قۇدايبەرگەنوۆ قازاقستاندا باسشىلىق قىزمەتكە تانىستىق ارقىلى تاعايىنداۋ مەن ءىرى بيزنەس وكىلدەرىنىڭ لايىقسىز جولمەن بايۋىن سىنعا الدى، دەپ حابارلايدى قازاقپارات ءتىلشىسى.

«ادامداردىڭ ادال ەڭبەكسىز، لايىقسىز جولمەن بيزنەس يمپەرياسىنىڭ باسشىسى بولعان كەزدەر كەلمەسكە كەتۋى كەرەك. سونداي- اق، ءوزىنىڭ مارجاسىن ۇستاپ قالىپ، قۇنىن ارتتىراتىن پارازيت دەلدالدىق قۇرىلىمداردى جويعان ءجون. جانە جەكەمەنشىك مونوپوليالار دا كەتۋى كەرەك. ءىرى بيزنەس ءبىلىم بەرۋمەن ۇزاق مەرزىمدى نەگىزدە اينالىسۋى قاجەت. ياعني، ۋنيۆەرسيتەتتەرمەن ءوزارا ىنتىماقتاستىققا كەلۋدەن باستاپ ولارعا تولىق قامقورلىق كورسەتۋگە دەيىن. بۇل وقۋ ورىندارىن ءوزىنىڭ بيزنەس حولدينگىنە قوسۋ ارقىلى ەمەس، بەلسەندى دەمەۋشىلىك كورسەتۋ فورماتىندا بولادى دەپ ۇمىتتەنەمىن»، - دەدى ولجاس قۇدايبەرگەنوۆ.

ەكونوميستىڭ بولجاۋىنشا، ەندىگى ۋاقىتتا «بولاشاق» باعدارلاماسىندا تەحنيكالىق ماماندىقتارعا باسىمدىق بەرىلمەك.

«سامۇرىق- قازىنا» ءال- اۋقات قورى زاڭدى تۇلعا رەتىندە قالۋى مۇمكىن، ءبىراق ونىڭ فۋنكتسيونالدىق مۇمكىندىكتەرى ايتارلىقتاي ازايادى. ال باسشىلىعى وزگەرەدى. باسشىلىق قىزمەتكە تانىستىق ارقىلى تاعايىنداۋ، ديرەكتورلار كەڭەسىنىڭ فورمالدى قۇرامىن جاساقتاۋ، تاعى سول سياقتىلار - وتكەن كۇننىڭ تاجىريبەسى. جالپى، ادىلەتسىزدىك، بەيبەرەكەتسىزدىك پەن داندايسۋدىڭ زامانى اياقتالدى. قۇداي قالاسا، مەملەكەتتىك باسقارۋ جۇيەسىنە زەردەلى ءارى ءوز ورنىنا لايىقتى ماماندار كەلگەن كەزدە، بىرتىندەپ كادرلاردىڭ دۇرىس كۋبيك- رۋبيگى قالىپتاسادى»، - دەيدى ول.

ايتا كەتسەك، مەملەكەت باسشىسى كەشەگى ءىرى بيزنەس وكىلدەرىمەن كەزدەسۋىندە جەكەمەنشىك مونوپولياعا زاڭمەن تىيىم سالۋدى تاپسىردى. ودان بولەك، پرەزيدەنت ۇكىمەت ءباز بىرەۋلەردىڭ مۇددەسىن كوزدەيتىن جەكەلەگەن توپتاردىڭ ەمەس، حالىقتىڭ مۇددەسى ءۇشىن جۇمىس ىستەۋ كەرەكتىگىن باسا ايتتى.

فوتو: inbusiness.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات