قازاقستاندىقتار ۇلتتىق مۋزىكالىق اسپاپتاردى تەگىن ۇيرەنە الادى

نۇر- سۇلتان. قازاقپارات - بۇگىن ەلوردادا ءبىر توپ مادەنيەت جانە ونەر سالاسىنىڭ قىزمەتكەرى كوروناۆيرۋسقا قارسى قايتا ۆاكسينا سالعىزدى.

وسى تۇستا ونەر ماماندارى قالىڭ جۇرت ۆاكسينا الىپ، مادەنيەت مەكەمەلەرى قىزمەتىنىڭ قايتا جاندانعانىن قالايدى، دەپ حابارلايدى قازاقپارات ءتىلشىسى.

«بۇگىندە كىتاپحانالار وقىرمانسىز جۇمىس ىستەپ جاتىر. سول سياقتى تەاتر جۇمىسى دا ونلاين فورماتقا اۋىستى. وسى ورايدا تانىمال ونەر قايراتكەرلەرىنىڭ قاتىسۋىمەن تەاتر ونەرى تاقىرىبىنا ارنالعان ونلاين ءدارىس وتكىزۋدى جوسپارلاپ وتىرمىز. ونلاين كەزدەسۋ Zoom پلاتفورماسى ارقىلى وتەدى. كەيىن ونىڭ ۆيدەوسى YouTube جەلىسىنە جۇكتەلىپ، كەز كەلگەن ادام كورە الادى. ونلاين ءدارىس اقپان ايىندا باستالادى. سونداي- اق دومبىرا، جەتىگەن جانە باسقا دا مۋزىكالىق اسپاپتاردى ۇيرەنەم دەگەن جاندار ءۇشىن ە. راحمادييەۆ اتىنداعى اكادەميالىق فيلارمونياسىنىڭ قىزمەتكەرلەرى Zoom ارقىلى تەگىن ۇيرەتۋ ساباقتارىن وتكىزبەك»، - دەدى نۇر- سۇلتان قالاسى مادەنيەت باسقارماسىنىڭ باسشىسى سانات شاپاشوۆ تىلشىلەردىڭ سۇراعىنا جاۋاپ بەرە وتىرىپ.

ودان بولەك، باسقارما باسشىسى كارانتين تالاپتارى جەڭىلدەگەن ۋاقىتتا شىعارماشىلىقپەن ستۋديادا اينالىسۋعا بولاتىندىعىن العا تارتتى.

«كوروناۆيرۋسقا قارسى ۆاكسينا الۋ كەرەكتىگى الەمدە مويىندالىپ وتىر. سونىمەن قوسا ريەۆاكسيناتسيا قارقىندى ءجۇرىپ جاتىر. ءبىز مادەنيەت نىساندارىنىڭ قالىپقا ساي جۇمىس جاساعانىن قالايمىز. كورەرمەندەر تەاتر مەن كونسەرتكە ەمىن- ەركىن كەلسە دەيمىز. ءبىزدىڭ ماماندار كارانتيننىڭ اياقتالۋىن اسىعا كۇتۋدە. سوندىقتان ءبىز ونەر ادامدارى بارشانى ۆاكسينا جانە قايتا ۆاكسينا الۋعا شاقىرامىز»، - دەيدى ول.

ونىڭ ايتۋىنشا، ەلوردادا 2 مىڭعا جۋىق مادەنيەت جانە ونەر سالاسى قىزمەتكەرىنىڭ 1700- ءى ىندەتكە قارسى ۆاكسينا الدى. قالعانىندا ەكپە الۋعا مەديتسينالىق قارسى كورسەتىلىمدەر بار.

ايتا كەتسەك، بۇگىن نۇر- سۇلتان قالاسىندا مادەنيەت جانە ونەر قىزمەتكەرلەرى ريەۆاكسيناتسيا جاساتتى.