ق ر پرەزيدەنتى وليمپيادا جانە پاراليمپيادا قۇرامالارىنىڭ مۇشەلەرىمەن كەزدەستى

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ قازاقستاننىڭ وليمپيادا جانە پاراليمپيادا ۇلتتىق قۇرامالارىنىڭ مۇشەلەرىمەن كەزدەستى، دەپ حابارلايدى اقوردا.

مەملەكەت باسشىسى جۋىردا بەيجىڭ قالاسىندا وتەتىن قىسقى وليمپيادا جانە پاراليمپيادا ويىندارىنىڭ بارشا سپورتسۇيەر قاۋىم ءۇشىن ايتۋلى وقيعا ەكەنىنە توقتالىپ، قازاقستان وسى سايىسقا ەڭ ۇزدىك سپورتشىلارىن اتتاندىراتىنىن اتاپ ءوتتى.

- ءدۇبىرلى دودادا ەل نامىسىن قورعاۋ - مارتەبەلى مىندەت ءارى زور جاۋاپكەرشىلىك. ءبىزدىڭ سپورتشىلارىمىز وليمپيادا ويىندارىندا تالاي رەت جەڭىس تۇعىرىنا كوتەرىلدى. كوك تۋىمىزدى جەلبىرەتىپ، ءانۇرانىمىزدى اۋەلەتتى. سونداي ساتتە ءاربىر ازاماتىمىزدىڭ كەۋدەسىن ماقتانىش سەزىمى كەرنەيتىنى ءسوزسىز. سىزدەر الداعى سايىستا حالقىمىزدىڭ سەنىمىن اقتايسىزدار دەپ سەنەمىن، - دەپ جىگەرلەندىردى پرەزيدەنت.

مەملەكەت باسشىسى بۇعان دەيىن قازاقستان اتلەتتەرىنىڭ قىسقى وليمپيادا جانە پاراليمپيادا ويىندارىندا جالپى 2 التىن، 4 كۇمىس جانە 4 قولا مەدال ولجالاعانىن اتاپ ءوتىپ، وليمپيادا تاريحىندا ەسىمدەرى التىن ارىپپەن جازىلعان ۆلاديمير سميرنوۆ، ليۋدميلا پروكاشيەۆا، ەلەنا حرۋستاليەۆا، دەنيس تەن جانە يۋليا گالىشيەۆا سىندى سپورتشىلاردىڭ داڭقتى جەڭىستەرى ازاماتتارىمىزدىڭ پاتريوتتىق سەزىمىن ارتتىرعانىن ايتتى.

- الداعى وليمپيادادا سىزدەر دە لايىقتى ونەر كورسەتەتىندەرىڭىزگە سەنىمدىمىن. پاراليمپياداشىلار ءۇشىن دە ماڭىزدى ءسات جاقىندادى. ەلىمىزدە ينكليۋزيۆتى قوعامدى دامىتۋ جولىندا پاراليمپيادا ويىندارىنىڭ ماڭىزى زور. قازاقستاندىق پاراليمپياداشىلاردىڭ جەڭىستەرى - ماقساتقا ۇمتىلۋدىڭ، تاباندىلىق پەن ءوز كۇشىنە دەگەن سەنىمنىڭ ۇلگىسى. وكىنىشكە قاراي، ءبىزدىڭ سپورتشىلاردىڭ سوڭعى دايىندىق كۇندەرى قاڭتارداعى قايعىلى وقيعالارمەن تۇسپا-تۇس كەلدى. ەڭ باستىسى، ىنتىماق پەن بىرلىكتىڭ ارقاسىندا ءبىزدىڭ حالقىمىز مەملەكەتتىڭ تۇتاستىعىنا نۇقسان كەلتىرەتىن لاڭكەستىككە لايىقتى تويتارىس بەرە الدى. ءبىز بۇكىل ەل بولىپ ۇلتتىق قۇراماعا جانكۇيەر بولاتىن جارىس كۇندەرى دە جالپىۇلتتىق بىرلىگىمىزدى كورسەتەتىنىمىزدى بىلەمىن، - دەدى مەملەكەت باسشىسى.

پرەزيدەنت سپورتشىلاردىڭ وليمپيادا جولداماسى جولىندا جانكەشتىلىكپەن ەڭبەكتەنگەنىنە توقتالىپ، ولاردىڭ كاسىبي تۇرعىدان جەتىلە تۇسۋىنە بار كۇشىن سالعان باپكەرلەردىڭ دە ەڭبەگىن اتاپ ءوتتى.

- ەندى تۋىستارىڭىز بەن جاقىندارىڭىزدىڭ عانا ەمەس، ميلليونداعان قازاقستاندىق جانكۇيەردىڭ ءۇمىتىن اقتاۋ كەرەك. سىزدەردىڭ جەڭىسكە دەگەن جىگەرلەرىڭىز - وسكەلەڭ ۇرپاققا ۇلگى، - دەدى قاسىم-جومارت توقايەۆ.

مەملەكەت باسشىسى بۇقارالىق جانە بالالار مەن جاس وسپىرىمدەر سپورتى ءاردايىم ەلىمىزدىڭ باسىم باعىتى ەكەنىن ايتتى. بىلتىردان باستاپ ءوزىنىڭ تاپسىرماسىنا سايكەس سپورت سالاسىنداعى مەملەكەتتىك تاپسىرىستار بويىنشا جان باسىنا قارجى ءبولۋ ىسكە قوسىلعانىنا توقتالدى.

- بۇل شەشىم سپورت سەكسيالارى مەن اۋلا كلۋبتارىنىڭ دامۋىنا تىڭ سەرپىن بەردى. وزدەرىڭىز بىلەسىزدەر، 2022-جىلدى بالالار جىلى دەپ جاريالادىم. وسكەلەڭ ۇرپاقتىڭ ۇيلەسىمدى دامۋىن قامتاماسىز ەتۋ ءۇشىن مەملەكەت پەن قوعام كۇش بىرىكتىرۋى قاجەت. قولعا الىنعان وسى ءىس- ارەكەتتەر بالالارىمىزدىڭ دەنساۋلىعىن نىعايتۋعا، ولاردى رۋحاني، ادامگەرشىلىك تۇرعىسىنان تاربيەلەۋگە سەپتىگىن تيگىزەرىنە سەنىمدىمىن، - دەدى پرەزيدەنت.

كەزدەسۋ سوڭىندا وليمپيادا قۇراماسىنىڭ كاپيتانى ابزال اجىعاليەۆ پەن پاراليمپيادا قۇراماسىنىڭ كاپيتانى الەكساندر گەرليتس پرەزيدەنتتىڭ قولىنان مەملەكەتتىك تۋ الىپ، انت بەردى.

قاسىم-جومارت توقايەۆ سپورتشىلارىمىزدىڭ كوك تۋىمىزدى وليمپ شىڭىنا شىعارىپ، مەملەكەتىمىزدىڭ مەرەيىن كوتەرە بەرۋىنە تىلەكتەستىك ءبىلدىردى.