تارتىپسىزدىكتەر كەزىندە زارداپ شەككەن بيزنەس نىسانداردىڭ ءبارى سالىقتان بوساتىلا ما؟

نۇر-سۇلتان. قازاقپارات - قاڭتار تراگەدياسى كەزىندە زارداپ شەككەن ءىرى بيزنەس سۋبەكتىلەرى دە سالىق جەڭىلدىكتەرىنە ءوتىنىش بەرە الادى، دەپ حابارلايدى قازاقپارات ءتىلشىسى.

بۇل تۋرالى مەملەكەتتىك كىرىستەر كوميتەتى ءادىسناما دەپارتامەنتىنىڭ ديرەكتورى ءاليا جەتىبايەۆا ورتالىق كوممۋنيكاتسيالار قىزمەتىندە وتكەن بريفينگتە ايتتى.

«بۇگىندە 2023-جىلعا دەيىن بۇكىل ميكرو جانە شاعىن بيزنەس نىساندارى سالىقتان بوساتىلعان. ال ءىرى سۋبەكتىلەر سالىق تولەمدەرىن كەيىنگە قالدىرعىسى كەلسە، مەملەكەتتىك كىرىستەر كوميتەتىنە كەلىپ، ءوتىنىش جازا الادى. سالىق كودەكسى بويىنشا، كەز كەلگەن بيزنەس نىسانىندا وسىنداي مۇمكىندىك بار. ال زارداپ شەككەندەرگە ۇكىمەتتىك كوميسسيا مەن «اتامەكەن» پالاتاسىنىڭ، اكىمدىكتەردىڭ ءتىزىمى بار. سول تىزىمدەگىلەر دە سالىق تولەمدەرىن شەگەرتكىسى كەلسە، ارىز جازا الادى»، - دەدى دەپارتامەنت ديرەكتورى.

ال مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆتىڭ ايتۋىنشا، توتەنشە جاعداي رەجيمى كەزىندە بيزنەس سۋبەكتىلەرىنە كەلتىرىلگەن زالالدى وتەۋ بەرىلەتىن تولەمگە سالىق سالىنبايدى. ەملەكەتتىك كىرىستەر كوميتەتى بۇل ماسەلەنى قازىر ۇلتتىق ەكونوميكا مينيسترلىگىنىڭ الاڭىندا پىسىقتاۋدا. الداعى ايدا اتالعان مينيسترلىك سالىق كودەكسىنە زارداپ شەككەن بيزنەس سۋبەكتىلەرى مەن حالىقتى قولداۋعا باعىتتالعان ءبىرقاتار تۇزەتۋلەر ۇسىنادى»، - دەدى كوميتەتى باسشىسىنىڭ ورىنباسارى.