قاسىم- جومارت توقايەۆ: سىرتقى يگىلىكتىڭ شيكىزاتتىق لاعىنەتكە اينالعانىن بايقاماي قالدىق
«كەيىنگە كوز سالا وتىرىپ، شارتتى تۇردە ەكى ەكونوميكالىق بەتبۇرىستى بولە ايتۋعا بولادى. ءبىرىنشىسى، جوسپارلى ەكونوميكادان نارىقتىق ەكونوميكاعا كوشۋ. قازاقستان كۇردەلى كۇيزەلىستەر جانە شىعىندار ارقىلى اۋىرتپالىقتى، ءبىراق قاجەتتى رەفورمالار جۇرگىزە وتىرىپ كوتەرىلە، بەيىمدەلە الدى»، - دەپ اتاپ ءوتتى مەملەكەت باسشىسى ەلىمىزدىڭ ءىرى بيزنەس وكىلدەرىمەن كەزدەسۋى بارىسىندا.
ق ر پرەزيدەنتى بۇل وزگەرىستەردى قارجىلاندىرۋ كەڭەستىك جۇيەدەن مۇرا بولىپ قالعان مەملەكەتتىك مۇلىكتەردى جەكەشەلەندىرۋ ەسەبىنەن جۇزەگە اسىرىلعانىن اتاپ ءوتتى.
«سول ىرگەتاستا وتاندىق كاسىپكەرلىكتىڭ جاڭا ساناتى ءوسىپ شىقتى. ەكىنشى بەتبۇرىس نولدىك جىلدارداعى شيكىزاتتىق سۋپەرسيكلمەن بايلانىستى. ەكونوميكا جاھاندىق پروتسەستەرگە بەيىمدەلە الدى، شەتەلدىك ينۆەستورلارعا جاعداي جاسالىپ، بۇل ەلگە مول قاراجاتتى، ءبىرىنشى كەزەكتە وڭدەۋ جانە بانك سالالارىنا تارتۋعا مۇمكىندىك بەردى. بۇل قارجىلار قازاقستاندىق ەكونوميكانى قورلاندىردى جانە وعان تۇراقتىلىق بەردى. الەۋمەتتىك باعدارلانعان مەملەكەت قالىپتاستىرۋعا مۇمكىندىك تۋعىزدى. ءبىراق، ءبىز سىرتقى ءال- اۋقاتتىڭ ارقاسىندا سىرتقى يگىلىكتىڭ شيكىزاتتىق لاعىنەتكە اينالعانىن بايقاماي قالدىق. ءبىز ترانسفورماتسيادا ۇتقىر بولا المادىق. ساپالى تۇرلەنۋلەر مۇنداي تۇرلەنۋلەرگە قارسى ءتۇرلى توپتاردىڭ مۇددەسىمەن بەتپە بەت كەلدى. ناتيجەسىندە ءبىز ءارتاراپتاندىرىلعان ەكونوميكا قۇرا المادىق»، - دەپ اتاپ ءوتتى قاسىم- جومارت توقايەۆ.
اۆتور: مارلان جيەمباي